Read nya huba Luka 22 Bible Online

Luka 22 - nya huba bible

Luka 22

¹Nda bəjir ladər gwazhilakə kəla tləlam nda njo na ni, “Ladər Dləgəlnda,” tə ɗa ləhəu,

²ngə ka wawa'ar fərist ka maləm gadlagadla Musa tə gwa'a ənda nda kwa tsəya Yesu. Nda mər əngə tə ɗəwa aka nda kwa ləvər nji.

³Ngə Shantan tə gwatanyi gu ɗufwa Yahuda nda njo nga Iskərayoti, zhang ku huɗa kwabəmətlə inda.

⁴Cha yi ɓwanya na wawa'ar fərist ka wawa'ar njir ɓəla Mbwa'alə Hyel təkəra ənda cho tləɗanda Yesu nə nda.

⁵Nda mər hirgyaɗi gagaɗa, ngə nda ɓatliya ənda nda kwa kinda nyi kwaba.

⁶Ngə Yahuda tə dləukər ni, cha ghəya na gwa'a lakur tləɗa Yesu a da na zəndəkur nji wa.

⁷Nda pəchir Ladər Gwazhilakə Kəla Tləlam tə ɓəla shili, pəshir hatəmachi na zər kətəng Ladər Dləgəlnda,

⁸Yesu tə sə ka Bitrus ana Yohana cha nar nda, “Ma'i ma hya ki ɓatliya mən sərsum nə Ladər Dləgəlnda məna səma.”

⁹Ngə nda jau nyi, “Aman ko i ea ɓatliya?”

¹⁰Cha nar nda, “Ma hya go ta mələm, hyo ɓə na vanya ndə kwa hə giɗa ɓiti. Hya nəu nyi kyo ki nda cho gwa kwa.

¹¹Hya nar nyi nə tlakər ki nda, ‘Maləm nə tə sə ea, ea nar ngha, “Aman vi nda yo səm sərsum Ladər Dləgəlnda naea ka shawa ɗa?” ’

¹²Cho char hi vanya vi bang da kya təkəra vanyi ɓatləɓatlənyi. A tangnda hyo ɓatliya mən madami.”

¹³Ngə nda təra ga ki həya dəhə sə tsa'atsa'a wi nda Yesu tə nar nda, ngə nda ɓatliya sərsum Ladər Dləgəlnda.

¹⁴Nda bəji tə ɗa, ngə Yesu ka shawa nyi tə ngya ka səm sərsuma.

¹⁵Ngə cha nar nda, “'Ual'ual chim ya aka ya səm sərsum Ladər Dləgəlnda nə kə'i hi təvi ya sa ɓwaɓwatəu!

¹⁶Yo nar hi, a tsə'u da yo tsakətə səm nyi səkə wa, kəl ma sənda cha kari tə nyabiyadzə ku təlkur Hyel.”

¹⁷Ngə cha hətə ɗeɗika, cha mər usaku nə Hyel, cha na, “Dləutsə ma hya təkəya ku pama hi.

¹⁸Yo nar hi fwatə tə bəji na a biyama tsəu yo tsakətə sa ɓitir anap wa kəl ma təlkur Hyel tə shili.”

¹⁹Ngə cha hətə gwazhilakə ga mər usaku nə Hyel, cha pəpasəu ga nənda cho na, “Nənna, dzaya na, nda nja lənda ka hi. Hya mər maka ənga aka ga hya ɗənghatə naya.”

²⁰Əngə tsəu ahir sərsum nda, cha hətə ɗeɗika nda, cha na, “Ɗeɗika na, taɗər alkawal na, ku mashi ɗa nda nja pənda kə'i hi.

²¹Kəl ja, jan ndər tləɗa ɗa tsatlə ku pama mən kwa səm naya!

²²Tuku Zər Ndə kwa tah, tang wi nda nja ɓatliya, kəl ja, sər təhuɗə na ndər tləɗanda nyi!”

²³Ngə shawa inda ghəya na jau kərnənda, nda wa ngə kwa mər chul ngəna sə ku pama nda.

²⁴Ngə kəpal tə hya'atə ku pama nda a təkəra nda wa ngə kwa ndiya na dəgalkur.

²⁵Yesu tə nar nda, “Ka təl ka təl nə nji'inda pa'a njir Yahuda kwa cha təlkur, wawa'a kənda tsəu kwa cha gyalkur, nda kwa nga kərnənda, ‘Njir vala nji.’

²⁶Nahi nəkə hi ngwa hya da mər əngə ku pama hi wa. Kəl nda ndə nda dəgal ku pama hi cha ɗa kushiu, gau kəhi tsə'u cha ɗa wi mava.

²⁷Wa ngə tə ndiya na dəgalkura, ndə nda tə ngya ka səm sərsum zəma, aa ndər təkə sərsuma? Kəpal da wa, ndə nda tə ngya ka səm sərsum ngə ndə nda dəgal. Ya jan ya ku pama hi wi ndər təkə sərsuma.”

²⁸“Nahi ngə nji'inda tə ta'i ka ya aku bəjir dzə ɗa.

²⁹Wi nda Ada ɗa tə na'a gyalkur ya səm təlkur, əngə tsəu yo nə hi.

³⁰Hyo səm, hyo sa naya ku təlkur ɗa, ya hyo ngya ku dzəga təlkur. Hyo səm təlkur təkəra nyavi kwabəmətlə nə Isra'ila.

³¹“Shiman, Shiman! Səya himi! Shantan gwa'atə laku ka cha dzə hi, cha pibiya hi, wi nda ndər zwa kwa pibiya chachang ku alkama.

³²Kəl ja Shiman, a gədi təya ka ka, tsa jirikur nghə da ba'a təuta. Maka da ɓəl shili da ya, ka tsakətə nyi dunama nə ka zamə nghə ina.”

³³Ngə Bitrus tə ɓəlakə nyi, “Tlakəu, a ɓatliya təya ya ma'i bətə kyo jarum naka. Macha tə tsə'u, yo tə naka!”

³⁴Ngə Yesu tə na, “Bitrus, yo nar ngha, təvi vəgəm kwa tiwi vu'i ənya, ko kəpal zəndə ɗa zhaka makərəu!”

³⁵Ngə Yesu tə jawar shawa nyi cha na, “Nda ya sə hi a kwaba wa, a mbəl wa, a ɓiɓi wa ya, vanya səda hya tar ya?” Nda na, “A səda Tlakəu wa!”

³⁶Cha nar nda, “Sakanə ja, ndə nda na kwaba ndara mbəl cha hətə cha gəziya, ndə nda pa'a da na katsakər tsəu, cha ɗəlnda daura nyi cha ɗəlbiya.

³⁷Aka yo nar hi, wi nda tsəfətsəfər ɓwanya Hyel tə na, ‘Nja jigau nyi ku pama njir mər səpəla'a,’ a ɗatə tuku cha nyabiyadzə təkəra ya.”

³⁸Shawa nyi tə nar nyi, “Tlakəu, jan katsakər mətləu.” Yesu tə na, “A njiti.”

³⁹Yesu tə ngyar ta mələm ga təra gyatə Dəgəl Zaitun wi nda cha tsəl ni, ngə shawa nyi inda nəu nyi.

⁴⁰Nda cha həya mbwa nda, cha nar nda, “Pətlə ma nya tsa hi da gwa ku sərmbukəu.”

⁴¹Ngə cha tsaɗəndadza wi ɓələr vakə hangu, ngə cha uzhi ga pətlənya.

⁴²Cha na, “Ada, macha kwa i ka, hənda ɗa ɗeɗika ɓwaɓwatə na. Dəhə ka ənga, a da sənda yo i wa, kəl nda sənda ko i ngə njo məra.”

⁴³Kəl chama Hyel tə chabiyadzə hya'atə kya huɗamələm kwa tsakə dunama nənyi.

⁴⁴Cha mbabiyadza ana pətlənya, aka ɗufwa cha ku ɓwaɓwatə gagaɗa, ngə vituku nyi tə ghəya na ndzə wi mashi.

⁴⁵Nda Yesu tə wur na pətlənya, cha ɓəl ya tə mbwa nda shawa inda ti ga həya nda nda kwa njihanyi aka huɗətla.

⁴⁶Cha nar nda, “Ka mi hyo njihanya? Hya'atə ma, hya pətlənya hya da ba'a gwa ku sərmbukəu.”

⁴⁷Tsəu cha kəla haɗiya nya cha, kəl jan dlama nji tə shili, Yahuda, zhang ku huɗa kwabəmətlə inda ngə tə shili na nda. Ngə cha dardzə yi aka cha gaɓətə Yesu.

⁴⁸Ngə Yesu tə nar nyi, “Yahuda, ana gaɓə nə kə kwa tləɗanda Zər Ndə ya?”

⁴⁹Nda shawa inda kə'i cha la'a sənda kwa ɗa, nda jau nyi ga na, “Tlaka, ea mər tlər na katsakər ya?”

⁵⁰Ngə zhang kənda tə dəgə mava gau fərist ga tlanda hima cha nə chisəm.

⁵¹Kəl ja, Yesu tə nar nda, “Ngyar ma, a njiti ənga.” Ngə cha tsəkar hima ndə nda ga mbandə nyi.

⁵²Ngə Yesu tə nar nyi nə wawa'ar fərist, kə'i nji'inda wawa'ar njir ɓəla Mbwa'alə Hyel, ka nji'inda wawa'a a təkəra nji, inda tə shili aka nda səya nyi, “Hya zəbiya ka sə ɗa ana katsakər ka zəwa. Naya ndər fa'avi ya ya?

⁵³Namən tanyi kə'i hi ku Mbwa'alə Hyel, a nahi səya ɗa wa. Kəl ja, bəji kəhi na ɗa ana nə gyalkur kutla.”

⁵⁴Nda səya Yesu ga təra nacha yo ki gau fərist. Bitrus tsəu kwa nəu hinda naɗəu.

⁵⁵Nda gəɗiya hu'u atə ghadar huɗəki nda, nda kwa tləra, ngə Bitrus tə ngyata nyi ku pama nda.

⁵⁶Nda zhang ku huɗa kwatəra inda kwa mər tlər ku ki nda tə la'a Bitrus anya hu'u, ngə cha ndzamtə nyi ga na, “Ndə nə tsəu na nda ka Yesu cha!”

⁵⁷Kəl Bitrus tə kəpal ga na, “Kwa na! A da yo zəndə nyi wa!”

⁵⁸Ahir bəji kushiu, vanya ndə tsəu tə la'a Bitrus, ngə cha na, “A kəpal da wa, nakə ma'a zhang kənda ka!” Kəl ja, Bitrus tə na, “Zah! A da naya ngə wa!”

⁵⁹Ahir wi saka zhang, vanya ndə tə chinda dzə ga na, “A kəpal dawa, kərnya ndə nə tsəu, na nda ka Yesu, aka ndər Galili na.”

⁶⁰Kəl ngə Bitrus tə na, “Zah! A da yo zəndə səngə ko ɓwanya təkər ngə pa'a wa!” Tsəu cha kəla wurandə ɓwanya, təma vəgəm tə tiwi.

⁶¹Tlakə tsəu tə sha ga ndzamar Bitrus. Ngə Bitrus tə ɗənghatə ənda Tlakə tə nar nyi, “Təvi vəgəm kwa tiwi vu'i na, ko kəpal zəndə ɗa zhaka makərəu.”

⁶²Ngə cha təra, ga biya tiwi gagaɗa.

⁶³Ngə nji'inda kwa ɓəla Yesu nda ghəya na mərtə nyi gyaɗi həyatəvi ga dəgə nyi.

⁶⁴Nda mbiya lya cha nda kwa jau nyi, “Takər nə ea, wanga dəgə ngha?”

⁶⁵Ngə nda par nyi alenya ɓwanya həyatəvi tsəu nda kwa ngəl nyi.

⁶⁶Nda vi tə wura, dəhə nji'inda wawa'a təkəra nji, kə'i wawa'ar fərist ka maləm gadlagadla Musa tə tsəmtədza, ga təra na Yesu ya tə patla njirawawa'a.

⁶⁷Nda na, “Par ea, nakə ngə Kəristi ya?” Ngə cha nar nda, “Mada ya par hi, a da hyo na'a jiri wa,

⁶⁸ma ya jau hi tsəu, a da hyo i ɓəlakə ɗa wa.

⁶⁹Sakana ba'a biyama, Zər Ndə kwa ngya tə chisəma Hyel ndər Gyalkur.”

⁷⁰Ngə dəhə nda tə na, “Nakə ya, Zər Hyel kə ya?” Cha wuma, “Jan hya nati, Naya na.”

⁷¹Ngə nda na, “Mi ɓwanya nda məno gwa'a səka? A ngatə təmən sənda cha na ana nya cha!”