Read nya huba Luka 23 Bible Online

Luka 23 - nya huba bible

Luka 23

¹Ngə dəhə daɓədzər njirawawa'a inda hya'ati ga təra na Yesu ya huɗə Bilatus.

²Nda ghəya ɓwanya təkəra cha nda kwa na, “Ea səya ndə na cho shakər nə njikə ea, cho na ənda ngwa nda da ba'a ki tsachi nə Kaisar wa. Cho na ənda Kəristi cha, tələu.”

³Ngə Bilatus tə jau nyi, “Nakə ngə təl njir Yahuda ya?” Yesu tə nar nyi, “Nakə ngə tə pəbiya na kərngha.”

⁴Kəl ngə Bilatus tə nar nyi nə wawa'ar fərist ana dlama nji, “A na ya səya ndə nə na vanya bikəu na'a wa!”

⁵Nda tsakətə ɓwanya na dunama nda kwa na, “Ana sə'inda cho dlədləɓə nə nji ngə cho tlə mwali aku dəhə hə'i Yahudiya. A hi Galili ghəya cha, jan cha shili tə nə tangna.”

⁶Nda Bilatus tə ngatə ənga, cha jawa, “Ndər Galili nə ndə nə ya?”

⁷Nda cha ngatə ənda Yesu tə zəbiya ku ɓələr hə'i nda Hiridus kwa səm təlkur ti, ngə cha na, nja təra na Yesu ya huɗər Hiridus, aka aku bəji nda kərnya Hiridus avu Urshalima cha.

⁸Hiridus tə mər hirgyaɗi na la'a Yesu gagaɗa, ɗəɗəm cha chim ka cha la'a nyi, aka a wurtə cha ngatə ɓwanya təkəra cha, ya cho i ka cha la'a vanya səshinshin nda Yesu kwa məra.

⁹Hiridus tə jau Yesu ɗanghəu, kəl ja, a sə da Yesu tə ɓəlakə nyi nə wa.

¹⁰Kəl wawa'ar fərist ka maləm gadlagadla Musa inda ta'i tangnda inda tə wula Yesu ndo ɓwanya na kurakə dzəgam dzəgam ənda ndər mər səɗimi cha.

¹¹Hiridus ka ləvaləva nyi tə mərtə nyi sər həyatəvi ga gyaɗənda nyi, ngə nda handzə nyi ləkutə nji təltəl, ga na nja ɓəlandə nyi yada Bilatus.

¹²Ka Hiridus na Bilatus da kwa ɗa parang pa'a wa, kəl ja, pəshinda nda ɗa bazhibazhi.

¹³Bilatus tə tsəmtə wawa'ar fərist, ka nji'inda wawa'a təkəra nji ana dəhə nji,

¹⁴cha nar nda, “Hya shili na ndə nə huɗə ɗa, abəra cho shakər nə nji. Jan ya ngwahibiya nyi tə biyaman hi, a naya uya nyi na bikə ngə hya wula nyi təkər ngə wa.

¹⁵Əngə Hiridus tsəu, nacha ngə sənda gwa'atə cha ɓəlandənyi shili da ya. A ndə nə da mər sənda njo kina tsa nyi təkəri wa.

¹⁶Aka əngə ja, yo dəgənyi ba'a ngya nyi cha təra.”[8]

¹⁷

¹⁸Ngə dəhə nji'inda tə pə kurakə ga na, “Tsəya nyi nji, nja dəliya ea Barabas!”

¹⁹(Nja ɗaka fəu Barabas ku jarum təkəra bikə tlə mwali nda cha ɗaka məra ku mələm dəgal ana tsa ndəu.)

²⁰Ngə Bilatus tə tsakətə ndər nə nda, aka cho i cha wuniya Yesu.

²¹Kəl kurakə nda kwa pəa, nda kwa na, “Kukwanda nyi nji! Kukwanda nyi nji!”

²²Ngə Bilatus tə tsakətə nar nda makərkunyi, “Aka mya? Bikə mi ndə na məra? Ba naya na'a, a naya uya ndə nə na bikə nda njo kina tsa nyi wa. Yo dəgənda nyi ba'a ngya nyi cha təra.”

²³Nanda tsəu kəl kurakəu nda kwa pə 'ual'ualəu, nda kwa gwa'a nja kukwanda nyi. Ngə nja dləukər na ɓwanya kənda.

²⁴Ngə Bilatus tə tlanda nyi nəumar tə nə Yesu wi sənda nda gwa'a.

²⁵Cha dəliya nda ndə nda nda kwa i, ndə nda nja fəu ku jarum təkəra bikəu tlə mwali ana tsa ndəu. Kəl ja, cha nənda Yesu nda mərtə nyi dəhə sənda nda kwa i.

²⁶Nda ləvaləva kwa ma'i na Yesu, ngə nda ɓə na vanya ndə hya'atə ku vanya zər mələm, tləm nyi Shiman, ndər mələm Sayirin. Nda səya nyi, ga nar nyi cha hə taməngəla cha nəu hir Yesu.

²⁷Nji ɗang gagaɗə tə nəu hi nyi, aku huɗa nda ma'a alenya mahi'i inda kwa tiwi nda kwa lələ aka cha.

²⁸Kəl ja, Yesu tə sha təwanə nda ga na, “Mahi'i Urshalima! Ngwa hya da ba'a tiwi ka ya wa, hya tiwi ka kərnəhi ana ngulisha'a kəhi.

²⁹Aka bəji kwa shili nda nji kwa na, ‘Njir papa'akur ngə mahi'i nda pa'a da ta yah, inda pa'a da kwa yah, inda pa'a ngulisha'a tə sa 'ua nda.’

³⁰Aku bəji nda, Nji kwa nar nyi nə mə i, ‘Dla ma təkəra ea!’ Nda kwa na nə dəgəl tsə'u, ‘Haɗiya ea ma!’

³¹Aka macha nda kwa mər chul sə'inə tsəu nə wu miɗakə ya, aman cho ɗa ma cha 'ual ja?”

³²Nja yi na alenya njir bikə mətlə aka nja tsəya nda ka Yesu.

³³Nda həya vanya mbwa njo nga “Pəpənghər kər,” nda kukwanda nyi tangnda, ana alenya njir bikə mətləu, ndə zhang təwa chisəma cha ana ndə zhang təwa matsala cha.

³⁴Kəl Yesu tə na, “Farbikə kənda Ada, aka a da nda kwa zəndə sənda nda kwa mər wa.” Nda tətəkəya dzaki nyi ku pama nda təwa ɓəlshi'u.

³⁵Nji ta'i tangnda kwa ndzama. Njirawawa'a inda tsəu tə par nyi ɓwanya dlənyarvi nda kwa na, “A dləuya tə cha alenya nji, cha dləuya kərnyi ja, macha nacha ngə Kəristi nda Hyel tə Tabiya!”

³⁶Ləvaləva inda tsəu tə həyatə cha, nda shili da cha ga nənyi ɓitir anap nda mwamwaləu.

³⁷Nda kwa na, “Macha təl njir Yahuda ka, dləuya kərnghə ja!”

³⁸A gi kəra cha, nja tsəfəya, “Ndə nənnə ngə təl njir Yahuda.”

³⁹Zhang ku huɗa njir bikəu inda nja kukwanda kə'i cha tə mərtə nyi ɓwanya həyatəvi, cha na, “A nakə ngə Kəristi ma? Ya dləuya kərnghə ja, ana na ea tsəu!”

⁴⁰Ngə vanya ndə nda tsə sal nda ga na, “A da ko ləvər Hyel wa ya? Nja tlanda nghə nəuma məlməl na nənyi.

⁴¹Na ma ya, tsa'atsa'a tanyi ngə nja mərtə ma, aka zhar bikə kəma nə ma uya, kəl ja, ndə na a bikə da mər cha wa.”

⁴²Cha na tsə'u, “Yesu, ɗənghatə naya ma ka gwa kwa təlkur ngha!”

⁴³Yesu tə nar nyi, “Jiri yo nar ngha, ənya nənna ko ngya tsa'a naya ki huɗamələm.”

⁴⁴Pəchi tangkər, ngə kutla tə haɗiya dəhə hə'i nda, kəl saka makər a ba akəu.

⁴⁵Pəchi tə gu kutla ana miɗi Mbwa'alə Hyel tə tau dzaɗə mətləu.

⁴⁶Ngə Yesu tə har kuraka cha ga na, “Ada! Aku cha ka ya tsau mambəl ɗa.” Nda cha na ənga, cha biya pi.

⁴⁷Nda dəgalər ləvaləva nda tangnda aku bəji nda tə la'a sənda tə ɗa, ngə cha fal Hyel cho na, “Ndə na ndər mər sə tsa'atsa'a na!”

⁴⁸Nda nji'inda tsəmtədzə ka ndzama tə la'a sənda ɗa, ngə nda ɓəl kyo ki, nda kwa dəgə hatla nda ana huɗətla.

⁴⁹Dəhə nji'inda kwa zəndə Yesu kə'i mahi'i inda nəu nyi hya'atə vu Galili, nda ta'i naɗəu nda kwa ndzama.

⁵⁰Vanya ndə da, tləm nyi Yusufu ndər mələm Arimatiya, atə hə'i Yahudiya. Ndər mər sə tsa'atsa'a cha ndər ləvər Hyel. Cho chim təlkur Hyel shili. Nacha tsəu zhang cha ku huɗa njirawawa'a nə Yahuda, kəl nda ana cha dləukə nda na sənda nda ɓatliya ana sənda nda mər wa.

⁵¹

⁵²Ngə cha yada Bilatus ka cha gədi nja nənyi dza Yesu.

⁵³Ngə cha həya dza Yesu ga baɗəu nyi ku pa'ua haɗə ndəu nə linin, cha fəu nyi gu vanya hu nda nja dzəɗəbiya ku məa, a da nja ta haɗə ndə kwa pa'a wa.

⁵⁴Səngə tə ɗa, tə bəjir akəu vanya zəkəu, Pəchir Ngyaməngya nə njir Yahuda.

⁵⁵Mahi'i inda nəu Yesu hya'atə hi Galili, tə təra ka Yusufu ka ga nda ki la'a mbwa nda hu ti, ana ənda nja haɗə Yesu.

⁵⁶Nda dzəgwa ɓəl kyo ki, nda ɓatliya sə nda kwa shi'uni kwitkwitə ana mal ɓəsa. A tə Pəchir Ngyaməngya nda ɓəliya sar tang wi nda gadlagadla tə na.