Read nya huba Luka 6 Bible Online

Luka 6 - nya huba bible

Luka 6

¹Atə vanya Pəchir Ngyaməngya, Yesu ka shawa nyi kwa ma'i tahə fa alkama. Ngə shawa nyi inda ghəya satə alkama nda, nda kwa kəkəɗə ku cha nda nda kwa ɗəa.

²Alenya njir Farisi tə jawa, “Mya gwa'atə hyo mər sənda gadlagadla tə katə nji tsa mər tə Pəchir Ngyaməngya?”

³Ngə Yesu tə wum ga nar nda, “A da hya kəratsəntə sənda Dauda tə mər ku bəji nda huɓə tə mbatsə nyi, nanda ka nji'inda kwa ma'i kə'i cha wa ya?

⁴Cha gwa ku vi həsəli nə Hyel ga gwa hətə gwazhilakə nda nja fiya mar Hyel ga ɓangha, sənda a da tsa'atsa'a ku gadlagadla kənda wa, nda kəl ka fərist ngə kwa kina ɓangha, cha nənyi ma'a nə nji'inda cha kə'iri.”

⁵Ngə Yesu tə udiya ga na, “Zər Ndə ngə Tlakəu, ma'a nə Pəchir Ngyaməngya.”

⁶Vanya Pəchir Ngyaməngya, Yesu tə gwa ku vi pətlənya cho dlədləɓə nə nji. Vanya ndə nda kunda, nda chisəma cha tətənyi.

⁷Ngə Njir Farisi ana Maləm gadlagadla inda kwa gwa'a laku nda ndo səya Yesu na bikəu, nda kwa ndzam nda la'a ndara Yesu kwa mbandə ndə tə Pəchir Ngyaməngya.

⁸Yesu zəndəbiyatə sənda ku jigadəma kənda. Ngə cha nar nyi nə ndə nda, “Hya'atə ka shili ta'i tangna.” Ngə ndə nda hya'ati ga shili ta'i tangnda.

⁹Ngə Yesu tə nar nda, “Yo jau hi, mi sənda gadlagadla na nja mər tə Pəchir Ngyaməngya? Sə mənakə zəma aa səɗimi? Nja mbəɗandə pi zəma aa nja tsəya?”

¹⁰Ngə cha ndzamtə nda dəhə nda, ga nar nyi nə ndə nda, “Ndəɗabiya cha ka.” Ngə cha ndəɗabiya cha cha, təma cha cha nda mbəa.

¹¹Ngə Njir Farisi ana Maləm dlədləɓə gadlagadla inda mər huɗətla gagaɗa, nda ghəya ɓwanya ku pama kərnənda təkəra sə nda nda kwa mərtə nyi nə Yesu.

¹²Aku hanyi inga Yesu tə təra gyo maka cha pətlənya, həm hanyi cho pətlənya nə Hyel.

¹³Nda vi tə wura, ngə cha nga shawa nyi inda ga ɗəmtsə nji kwabəmətlə ku huɗa nda, cha fəndzə nda tləm, “Changhabal.”

¹⁴Shiman (nda Yesu tə fəndzə nyi Bitrus). Ana Andrawus zamə nyi, Yakubu ana Yohana, Filibus ana Batalamaus,

¹⁵Matta ana Toma, Yakubu zər Halfa, ba'a Shiman (nda njo nga ndər nyida hə'i nyi),

¹⁶Yahuda zər Yakubu, ba'a Yahuda Iskərayoti nda tləɗanda nyi.

¹⁷Ngə cha təra səya ka nji'inda cha ɗəmtsə inda, ngə Yesu tə ta'ita nyi tə vanya mbwa nda na babal 'ualəu, ana alenya dlama shawa nyi. A tangnda tsəu jan nji ɗang hya'atə tə mbwa pampamə ku hə'i njir Yahudiya, ana Urshalima, ana mələm Taya ana Sidon inda nya fa'a dəgaləu.

¹⁸Nda shili ka ga nda ngatə Yesu, ana nda uya nja mbandə nda na shiləkə kənda pampaməu. Nji'inda məlləm kwa chinda tsə'u a mbandə nda tə nji.

¹⁹Madawa kwa i cha tsəkar Yesu, aka gyalkur da kwa biya ku dza cha nda kwa mbandə nji.

²⁰Yesu tə ndzamar shawa nyi i ga na, “Njir papa'akur hi, njir ɗali, hyo uya təlkur Hyel!

²¹Njir papa'akur hi nji'inda kwa ngatə huɓə sakana, aka hyo nyi! Njir papa'akur hi, nji'inda kwa tiwi sakana, aka hyo mər hirgyaɗi!

²²Njir papa'akur hi ma nja ngya hi, nda tlabiya hi, nda kwa ngəl hi nda kwa na ənda nji pəla'a hi, aka Zər Ndəu!

²³Ma sə wi ngə tə ɗa, məra ma hirgyaɗi, hya utsa ana hirgyaɗi, aka zhar kəhi 'ualəu kya huɗamələm. Tang wi ngə tanyi ka jival kənda tə mərtə nyi nə njir mətakər Hyel inda təra yahi.”

²⁴“Kəl ja, sər təhuɗə nahi Nji'inda na gəna sakana, aka a wurtə hya uya məsəɗakur ngya kəhi!

²⁵Sər təhuɗə nahi, nji'inda nyinyinyi sakana, aka hyo ngya na huɓwa! Sər təhuɗə nahi nji'inda kwa gyaɗi sakana, aka hyo mər huɗətla, hya kwa tiwi!

²⁶Sər təhuɗə nahi, nahi inda nji kwa fala, aka əngə tanyi ma'a ka jival kənda tə mərtə nyi nə njir mətakər gəzhi.”

²⁷Yo nar hi, nahi inda kwa sə hima da ya, nyida ma njir dawa kəhi, hya mərtə nyi mənakəkur nə nji'inda ngya hi.

²⁸Səkə nyi ma papa'akur nə njir ngəl hi, hya pətlənya ka nji'inda kwa izza hi.

²⁹Ma ndə nda dəgəu nghə chi ku judla kə zhang, shar nyi vanyi tsəu. Ma ndə nda dləuya daura ngha, səɗəya nyi ləkutə nghə tsəu.

³⁰Nənyi nə dəhə ndə nda gədi sə tsa ka. Ma ndə nda dləuya vanya sə tsa ka, ngwa ka da gwa'a cha ɓəlandə nghə wa.

³¹Mərtə nyi ma nə nji wi sənda hyo i nja mər nə hi.

³²“Macha kəl nji'inda kwa nyida hi tanyi hyo nyida ya, aman hyo ɗana uya papa'akura? Mada njir mər səpəla'a ma'a kwa nyida nda nji'inda kwa nyida nda.

³³Macha kəl nə njir mər mənakəkur nə hi tanyi hyo mər mənakəkur ya, aman hyo ɗana uya papa'akura? Əngə tanyi ma'a njir mər səpəla'a kwa ɗa.

³⁴Ya aman hyo uya papa'akur, macha kəl nə ndə nda kwa nau kinda hi məl kəhi hya kwa tlə məla? Mada njir mər səpəla'a kwa tlə nda məl nə kuvanda, ga nda uya nja kinda nda tsa'atsa'a!

³⁵Əja, nyida ma njir dawa kəhi, hya mərtə nda mənakəkur, tlənda ma məl ngwa hya har kəl nja kinda hi wa. Ma hya mər ənga, hyo uya zhar kəhi 'ualəu, ya hyo ɗa ka nguli Hyel. Aka kwa mər cha mənakəkur nə nji'inda pa'a kwa usaku ana nji pəla'a.

³⁶Ngya ma na təhuɗəu, tang wi nda Adan hi ndər təhuɗəu.”

³⁷“Ngwa hya da mbakənyi bikə nə madawa wa, tsa Hyel da mbakə hi bikə tsəu. Ngwa hya da tlanda nyi nəuma nə madawa wa, a Hyel do tlanda hi nəuma tsəu wa. Far ma bikər madawa, nahi tsəu Hyel kwa farbikə kəhi.

³⁸Nənyi ma nə madawa, nahi tsəu njo nə hi, shala nda nyi zəvzəvəu, njo shabiya hi. Shala nda hya dəkə kwa nə alenya nji, nacha njo dəkəu hi kwa.”

³⁹Ngə Yesu tə nənda vanya ba'ada ga na, “Ndər wuləfə kwa nau cha chatə nyi laku nə kuvanyi ndər wuləfəu ya? Macha mər ənga, kya'a nda kwa pəpə gu ka'u.

⁴⁰A shawa da kwa ndəɗə maləm nyi wa, kəl ja, dəhə shawa nda udiya kəratsən nyi, cho ɗa wi maləm nyi.”

⁴¹“Mya gwa'atə ko ndzam zər ngəɗəkə nda tə lya kuvangha, ya a da ko ɗəngha na zəmər gang nda tə lyakə wa?”

⁴²“A da ko nau nar nyi nə kuvangha, ‘Zama, ta'i ya hənda nghə ngəɗəkə tə lya ka,’ nakə nda pa'a do nau la'a zəmər gang nda ku lyakə wa. Ndə dəmən, ka ghəya hənda gang nda tə lya ka, tsa'aka ko nau la'a sə mənakəu ko hənda nyi ngəɗəkə tə lya kuvangha.”

⁴³“A wu mənakə da kwa ya nguli ɗimi wa, ya wu ɗimi da kwa ya nguli məsəɗakə wa.

⁴⁴Kala wua, njo zəndəbiya təwa yayanyi. A njo ɗəm yayar kanda ku wur shikəɗi wa, ndara yayar anap ku wur shikəɗi wa.

⁴⁵Ndə dur kwa nau mər sə mənakəu aka sə'inda ku ɗufwa cha mənakəu. Kəl ja, ndə pəla'a kwa mər səɗimi aka sə'inda ku ɗufwa cha pəla'a. Sənda nyandə ɗufwa ndəu, nacha cho pəa.”

⁴⁶“Mya gwa'atə hyo nga ɗa Tlakəu, Tlakəu ya a da hya kwa mər sənda ya na hya mər wa?

⁴⁷Yo char hi sənda ndə nda tə shili da ya, ga səndzə himi daya, ga mər sənda ya nar nyi cha məra kwa pabiya da.

⁴⁸Pabiya da ndə nda kwa gwa'a hər ki nyi cha, cha labiya hyavi ndzuɗakəu ga ghəya hya vi tə fafa. Nda dəla səya, mandza dəgə ki nda, dəhə ka ənga a ki nda nda dzədzi wa. Aka nja səya hya ki nda tə fafa.

⁴⁹Kəl ja, dəhə ndə nda tə ngatə ɓwanya ɗa, ya a da cha mər tlər nə wa, məlməl tanyi na ndə nda hərtə ki nyi tə mishishiu'a. Nda dəla səya, mandza tsə'u tə dəgə ki nda, təma ki nda səya ghərəzhəu.”