Read nya huba Luka 7 Bible Online

Luka 7 - nya huba bible

Luka 7

¹Nda Yesu tə wur na dəkə dəhə sə'ingə nə nji, ngə cha dzəva vu Kafarnahum.

²Vanya dəgalər ləvaləva nə njir Roma da hinda, ana mava nyi nda cho nyida 'ual'ual tə piya na shiləkə wi a cho mbə wa.

³Manda cha ngatə mafakə təkəra Yesu, ngə cha sə alenya wawa'ar njir Yahuda, ka ga nda yi gədi Yesu cha shili mbandə mava nyi nda.

⁴Nda shili da Yesu ga gədi nyi na jiri, “Ndə na, a kiti cha uya vala tsa ka.

⁵Aka cho nyida njir Yahuda, ga həriya ea ma'a vi pətlənya.”

⁶Ngə Yesu tə təra kə'i nda. Nda cha ɗa ləhə dza ki nda, dəgalər ləvaləva nda sətə nyi ka bazhi nyi nda yi nar nyi nə Yesu, “Tlakəu, ngwa ka da wendə kərnghə təkəra ya wa! A da ya nji ka ko gwa ku ki ɗa wa.

⁷Nacha nga gwa'atə ya la'a a naya nji ka ya shili dakə wa. Ɓwanya tangha, mava ɗo mbəa.

⁸Aka naya ma'a a tə kiɗa gyalkur vanyi ndə ya, ya tsəu, ləvaləva da tə kiɗa ya i. Ya kwa nar nyi nə nənna, ‘Ma'i,’ ya cho ma'i, ya kwa nar nyi nə nanda nda, ‘Shili,’ ya cho shili. Ətsəu, ya kwa nar nyi nə mava ɗa, ‘Ɗa əna,’ ya cho məra.”

⁹Nda Yesu tə ngatə ənga, cha mər məngəl, ngə cha sha ga nar nyi nə dlama nji'inda kwa nəu nyi nda, “Yo nar hi, mada vu Isra'ila, a da ya ta uya ndə nda na jirikur 'ual wi nə ndə nə wa!”

¹⁰Ma nji'inda ɓəl yo ki, nda yi həya mava nda mbəti.

¹¹Ɗəɗəu tanyi ngə Yesu ka shawa nyi ana dlama nji tə təra yo vanya mələm nda njo nga Nayin.

¹²Nda nda ɗa ləhə dza mələm nda, kəl jan njo hə ndə təta, zhang tanyi tə 'ua ama nyi ya malafi. Nji ɗang tə zəbiya ku mələm nda ka nda ləbiya malafi nda.

¹³Nda Tlakə tə la'a mala nda, cha ngatə təhuɗə nyi, ga nar nyi, “Ngwa ka da tiwi wa!”

¹⁴Ngə cha yi tsəkar ləgagau nda, təma njir hə ndə tətə nda tə ta'i. Ngə Yesu tə na, “Tlakala, ya nar ngha, hya'ati!”

¹⁵Ngə ndə tətə nda hya'atə tə ngya, ga ghəya ndəra. Ngə Yesu tə nənyi nyi nə ama nyi.

¹⁶Ləvər tə səya nji'inda dəhəu, nda fal Hyel nda kwa na, “Jiri, jan dəgal dəgalər ndər mətakər nə Hyel shilitə ku pama mən! Hyel shili tə ka ga cha dləuya nənyi na nji!”

¹⁷Ɓwanyar səngə Yesu tə mər nga ma'i ba'amani ku dəhə hə'i Yahudiya ana mələm inda ɓandə nyi.

¹⁸Nda shawa Yohana ndər mər baɓtisma nar nyi dəhə sə'inda Yesu tə məra, cha nga mətlə ku pama nda,

¹⁹cha sənda yada Tlakəu, nda jawar nyi, “Nakə ngə ndə nda kwa shili nda zəma, aa ea səkə vanya ndə paməu?”

²⁰Nda shili da Yesu ga na, “Yohana ndər mər baɓtisma tə sə ea, ea jawar ngha, nda nakə ngə ndə nda kwa shili nda, ndara ea səkə vanya ndə paməu?”

²¹Aku bəji nda, Yesu tə mbandə njir shiləkə inda sa ɓwaɓwatə ɗanghəu, ana cha gədləbiya məlləm ku kəra nji, ana cha mbəɗiya lya njir wuləfəu.

²²Ngə Yesu tə wum nə nda, “Ɓəl ma, hya yi nar nyi nə Yohana sənda hya ngatə ana sənda hya la'a, ənda njir wuləfəu kwa la'a səu, njir gadal kwa ma'i, njir bibi kwa uya mbəa, nji'inda hima nda dadanyi, kwa ngatə səu, njo hya'andə nji'inda kuɗa, ana tsəu njo dəkə Mafakə Mənakə nə nji ɗaliɗali.

²³Ndər papa'akur ngə ndə nda pa'a da na kəpal təkəra ya!”

²⁴Ahir nda nji'inda Yohana tə sə inda tə təra, ngə Yesu tə ghəya na ɓwanya nə nji təkəra Yohana cho na, “Mi nda hya ki ndzam ku taka? Hya gwa ka ga hya la'a sar dzəgam dzəgam inda gyang kwa sə ya?

²⁵Macha a əngə wa, mi sənda hya ma'i ka ga hya ki la'a? Ndə nda pəndzə dzaki nda nja ɗəl na gəna 'ual ya? Nji'inda pəndzə dzaki nda nja ɗəl na gəna 'ualəu kwa sa wahə kənda tə patla təl nda kwa ngya.

²⁶Ya mi nda hya ki ndzama? Ndər mətakər Hyel ya? Jiri yo nar hi, a ndəɗə təcha ma'a ndər mətakər nə Hyel.

²⁷Aka a təkəra Yohana ngə ɓwanya Hyel tə na, ‘Jan ya sə tə ndə nda na mafakə ɗa cha təra biya mangha, ka cha ɓatliya nghə laku təvi ka shili.’

²⁸Yo nar hi, aku huɗa dəhə nji'inda mahi'i tə yah, a ndə da tə ndəɗə Yohana na dəgalkur wa. Dəhə ka ənga, ndə nda ndiya na kushkur ku təlkur Hyel ndəya tə Yohana na dəgalkur.”

²⁹Dəhə nji'inda ngatə ənga, ma'a njir tsəm tsachi, tə zəndəbiya ənda lakur Hyel tsa'atsa'a tanyi, aka nanda ingə nji'inda uya baɓtisma tsa Yohana.

³⁰Kəl ja, njir Farisi ana njir zəndə gadlagadla tə ngyar nəu sənda Hyel tə ɓatliya kanda təwa ngyar dləu baɓtisma tsa Yohana.

³¹Yesu tə tsakətə na, “Ana mi ya kwa məməlandə njir bəji na? Pabiya da mi nda?

³²Pabiya da ngulisha'a inda kwa ngya tə suku, nda kwa nga kərnənda nda kwa na, ‘Ea mbəɗə mbalau nə hi, ya a hya i utsə wa; Ea tiwi məsazau, ya a sələm kəhi da səya wa!’

³³Aka Yohana ndər mər baɓtisma tə shili, a cho səm sərsum wa, a cho sa ɓitir anap wa, ngə hya na, ‘Ndər məlləm cha!’

³⁴Zər Ndə tə shili, cho səma, cho sa, jan hyo na, ‘Kwa la'a hi wa, ndər wi, ana ndə bang huɓə nga, bazhinya njir tsəm tsachi, ana “njir mər səpəla'a.” ’

³⁵Dəhə ka ənga, dəmar Hyel kwa chabiyadza təwa nji'inda tə dləutsi.”

³⁶Vanya ndər Farisi tə nga Yesu yo ki nyi ka səm sərsuma, ngə Yesu tə yi ngya ka səm sərsum nda.

³⁷Vanya malakə da ku mələm nda, a ngya nyi da mənakəu wa. Nda cha ngatə ənda Yesu hyo ki ndər Farisi nda, ngə cha shili na təkə mal nda kwa shi'uni kwitkwitəu.

³⁸Cha shili ga uzhi tanyi ləhə dza hya Yesu cho tiwi. Nda sələm nyi tə ghəya na pə səya tə hya Yesu, təma cha kəkəɗənda ana shishir kəra cha, ga ghəya gaɓə hya Yesu, ngə cha ɓəsəya nyi mal nda kwa shi'uni kwitkwitə nda.

³⁹Nda ndər Farisi nda la'a sənda mala nda kwa məra, ngə cha na ku ɗufwa cha, “Macha ndə na, ndər mətakər Hyel cha, cho nda zəndəbiya ndara chul mala manə ngo tsəka nyi, kwa nda cha zəndə ənda ndər mər səpəla'a cha.”

⁴⁰Ngə cha nar nyi nə ndər Farisi nda, “Shiman, vanya sə da yo i ya nar ngha.” Ngə Shiman tə na, “Par ɗa maləm.”

⁴¹Yesu tə na, “Vanya ndə da kwa nəu alenya nji mətlə məl. Zhang njo nəu nyi kwaba nda ndər mər tlər kwaba kwa uya ku fa zhang na manyi, vanyi nda tsəu, 'ualkura kwaba nda ndər mər tlər kwaba kwa uya ku hanyi tufkumnyi.

⁴²Manda a da nda nau kinda nyi wa, ngə cha ngya nda na məl nda kya'a nda. Yau, aku la'a nghə ya, wa ngo ndiya nyida ndə nga?”

⁴³Ngə Shiman tə nar nyi, “Yo la'a wi ndə nda nja ngya nyi na kwaba 'ual nda.” Ngə Yesu tə ɓəlakə nyi, “Yawa! A ɓwanya tə kə tsa'atsa'a.”

⁴⁴Ngə cha ndzamar mala nda ga nar nyi nə Shiman, “A la'a təkə mala na? Ya səgwa ku ki ngha, ana ka na'a ɓiti chi hi wa, kəl ja, nacha, cha chinda hya ya na sələm nyi ga kəkəɗənda na shishir kəra cha.

⁴⁵Nda ya səgwa ku ki ngha, a naka gaɓtə ɗa wa, kəl ja, səgwakura ya, a mala nə da ngyar gaɓə hya ya wa.

⁴⁶Ana ka ɓəsəu ɗa mal ku kəra ya wa, kəl ja, nacha cha ɓəsətə ɗa mal nda kwa shi'uni kwitkwitə tə hya ya.

⁴⁷Əja yo nar ngha, a fartə nji bikər mala ngə 'ual nga, nacha gwa'atə cha char nyida 'ualəu. Kəl ja, ndə nda nja farbikə nyi kushiu, kush tanyi nyida nyi.”

⁴⁸Ngə cha nar nyi nə mala nda, “A fartə nji bikə ngha.”

⁴⁹Təma nji'inda nda kwa səm sərsum kə'iri inda tə ghəya na nə kərnənda, “Ndə manə kwa far ma'a bikər ndə na?”

⁵⁰Ngə Yesu nar nyi nə mala nda, “Jirikur nghə dləuya nghə ti, ma'i na piyarɗufəu.”