Read nya huba Luka 8 Bible Online

Luka 8 - nya huba bible

Luka 8

¹Ahir bəji kushiu, Yesu tə zhulitə mələm wawa'a ka shiɗəɗənyi, cho bəzə Mafakə Mənakə nə təlkur Hyel. Shawa nyi inda kwabəmətlə inda kə'i cha,

²daɓə alenya mahi'i nda nja təkəbiya na məlləm pəla'a ga mbandə shiləkə kənda. Aku huɗa nda vanya malakə nda njo nga Maryamu Magdaliya, nda nja gədləbiya məlləm məɗəfə ku kəra cha.

³Ana Yuwana mala Kuza gau a təkəra tləra ku ki Hiridus, tsa'a na Suzana, daɓə alenya mahi'i ɗang inda kwa vala Yesu ka shawa nyi inda ana sər cha nda.

⁴Sakanda dlama nji kwa tsəmdzə hya'ati ku mələm pampaməu nda kwa shili da Yesu, ngə Yesu tə ndər nənda ana ba'ada.

⁵“Vanya ndə tə biyar gwa tləka. Nda cho huɗa uchə chuli, ngə alenyi tə pəpə ku laku, nja dərɓənda, ngə eakə tə shili tsakuti.

⁶Alenya chuli tə pəpə səya tə hya fafa. Manda nda tsəa, təma nda ula, aka a ləsə da tangnda wa.

⁷Alenyi tsəu tə pəpə gu lya shikəɗi, ngə shikəɗi inda tə hə kə'i nda, ga tsakə nda chi.

⁸Alenya chuli inda tsəu tə səya tə hə'i mənakəu, nda tsəa ga həa, ga pəu li gharəu gharəu.” Nda Yesu tə wur na pə ba'ada nga, ngə cha har kurakə ga na, “Ndə nda na himi ngati, cha ngati.”

⁹Kəl shawa nyi inda jau nyi nda mi sənda ba'ada ngə təkəri.

¹⁰Ngə cha na, “Nahi, a ngya hi tə nji hya zəndəbiya dəhə sə'inda tə ɗəwa ku təlkur Hyel, kəl ja, ya kwa ɓwanya nə alenya nji ana ba'ada, aka mada nanda ndzama, a səda nda kwa la'a wa, mada nanda ngati, a da nda kwa ngabiya wa.”

¹¹“Jan sənda ba'ada ngə təkəri, chuli, nacha ngə ɓwanya Hyel.

¹²Chuli inda pəpə ku laku nda, nanda ingə nji'inda tə ngatə ɓwanya Hyel, kəl sərtakə tə shili ga həbiya ɓwanya nda ku ɗufwa nda, tsa nda da nənyi jiri nda uya mbəɗa.

¹³Inda səya tə hya fafa inda, nanda ingə nji'inda ngatə ɓwanya Hyel ga dləutsə na hirgyaɗi. Kəl ja, a da uya mbwar ngya ku ɗufwa nda wa. Nda nənyi jiri nə zər bəji kushiu, nda nda gwa ku sərmbukə təma nda far na jiri kənda.

¹⁴Chuli inda pəpə gu shikəɗi inda tsəu, nanda ingə nji'inda ngati, piya hya'ati, jigadəmar sər dunəya ana gwa'a gəna, ba'a i məsəɗakəkur tə katə nda tsa mərtə sakəda.

¹⁵Chuli inda səya tə hə'i mənakə nda tsəu, nanda ingə nji'inda ahir nda nda ngatə ɓwanya nga, nda dləutsə ana ɗufəu mənakəu, nda susu'a ga mər sakəda.

¹⁶“A ndə da kwa ngirnya hu'u nya təkəsəu kwa mbuya na shala ndara cha fiya gwada kiɗa sərpiya wa. Kəl nda cha hakəya tə chaka'i təkəsəu, ga njir gu taki la'a vimbəlmbəla.”

¹⁷“Aka njo chaɗəbiya dəhə sənda tə ɗəwa, dəhə sənda tə mbu tsəu, njo həbiya zəbiya tə babaləu.”

¹⁸“Hya gəla na ənda hyo səhimi. Ndə nda na ngabiya, njo tsakətə nyi, kəl ja, ndə nda pa'a da na ngabiya, njo dləuya mada kush nda cha kwa har wi a da tsa cha.”

¹⁹Kəl ka zamənya Yesu ka amanya Yesu tə yi ka nda la'a nyi, kəl ja, a nda nau yi dzə nyi wa aka ɗangkura nji.

²⁰Ngə vanya ndə tə nar nyi nə Yesu, “Jan ama nghə ka zamə nghə tə ta'i biya nda kwa i nda la'a ngha.”

²¹Ngə Yesu tə nar nyi nə nji'inda tangnda, “Nji'inda kwa ngatə ɓwanya Hyel ga mər sənda cha na, nanda ingə ama ɗa ana ka zamə ɗa.”

²²Vanya pəchi, Yesu ka shawa nyi tə gwa ku param, ngə cha nar nda, “A mən təra biya tiya fa'a na.” Ngə nda ghəya na ma'i.

²³Aku ma'i nda, ngə hanyi tə hənda nyi. Kəl jan gyang dəgal tə hya'ati, kwa fi təkəra fa'a nda. Aku ɓwaɓwatə nda 'ual'ualəu aka ɓiti ghəyatə gu param nda.

²⁴Ngə shawa inda yi hya'andə Yesu ga na, “Tlakəu! Tlakəu! Janə məno kuɗa!” Yesu tə hya'atə, cha tsə gyang nda ana ɓiti nda kwa mər məlləm nda, ngə gyang nda ta'i, ɓiti nda tə bugə ɗiyu.

²⁵Ngə cha nar nyi nə shawa inda, “Aman jirikur kəhya?” Ngə ləvəra səya nda gagaɗa, nda kwa mər məngəl, nda kwa na nə kərnənda, “Ndə manə kwa tsə ma'a gyang ana ɓiti, ya nda kwa ngatə nya cha?”

²⁶Yesu ka shawa nyi tə ma'i ku param nda shili ku hə'i njir Garasina, biya tiya fa'a Galili.

²⁷Səyakura Yesu ku param kəl jan vanya ndər mələm nda, ana məlləm ku kəra cha. Ndə nda səkar tə dzə cho ma'i dura'a, a da cha kwa nau ngya ku ki wa, mada sakamani a tə hu cho ngya.

²⁸Nda cha la'a Yesu, ngə cha hya'andə kurakə cho ləlla ga dla mar Yesu, cho na, “Yesu Zər Hyel mya həu nghə naya? Yo gədi ngha, ngwa ka da ba'a na'a ɓwaɓwatə wa.”

²⁹Cha na əngə aka Yesu wurtə tsə məlləm nda cha ngya nyi. Aka zhaka ɗang tanyi məlləm nda kwa dəgə nyi, njo mbiya nyi chi na hi ana dzəra lyang njo ɓəla nyi, kəl cho tlətləu dzəra nda, sərtakə nda kwa gədləu nyi gu lya wua.

³⁰Yesu tə jau nyi, “Wa tləm ngha?” Ngə ndə nda na, “Tləm ɗa Dlama,” aka məlləm ɗang ku kəra cha.

³¹Nda gədi nyi tsa cha da ba'a mbəlau nda yo ka'u nda a ɓələnyi da wa.

³²Ləhə tangnda, biri dəgal da nə dagəla nda kwa ɓəla dza sara məa, ngə məlləm inda gədi nja ngya nda nda gwa kwa. Ngə Yesu tə ngya nda.

³³Məlləm inda biya ku kəra ndə nda ga gwa ku dagəla. Ngə dəhə biri dagəla inda tə hya'atə na hwi kya dza sara mə nda, ga təra gu fa'a ga gwa kuɗə ku ɓiti.

³⁴Nda njir ɓəla dagəla inda la'a sənda ɗa, ngə nda hwi gu ta mələm ana mbwa inda ɓandə nyi ka nda par nyi nə nji.

³⁵Kəl nja zəbiya ka nda la'a sənda ɗa. Nda yi dza Yesu ga la'a ndə nda məlləm tə biya ku kəra cha nda tsatlə dza Yesu, cha handzə ləkutəu ya jigadəmanyi tsa'atsa'a, ngə ləvəra səya nda dəhə nda.

³⁶Nji'inda tangnda ma səngə ɗa, nda kwa ki pə nə nji ənda nja mbandə ndər məlləm nda.

³⁷Ləvəra səya dəhə njir mələm Garasina, ngə nda shili gədi Yesu cha ngyar mələm kənda. Nda Yesu tə gu param ka ga cha təra,

³⁸ngə ndə nda nja gədləbiya məlləm ku kəra cha nda tə shili gədi nyi ga na, “Ngya ɗa ya nəu ngha.” Kəl ja, Yesu tə nar nyi,

³⁹“Ɓəl kyo ki, ka ki pə sənda Hyel tə mərtə ngha.” Ngə ndə nda tahəya ta mələm cho dəkə sənda Yesu tə mərtə nyi.

⁴⁰Nda Yesu tə zəbiya tiya fa'a, ngə nja dləutsə nyi, aka kyaku nda njo səkə nyi.

⁴¹Kəl jan Yayirus vanya ndəradəgal nə vi pətlənya, tə shili da Yesu ga uzhi ma nyi. Cha gədi nyi cha yo ki nyi,

⁴²aka kwa nyi da ana fa nyi kwabəmətləu atə piya na shiləka cho gwa'a tah, ya wuɗəkər kwa nyi nda. Yesu tə gəzəya laku, dlama nji kwa hikənyi mada təwabari.

⁴³Aku huɗa nji'inda, vanya malakə da tə mər fa kwabəmətlə cho sa ɓwaɓwatə mashi kwa nəu nyi a ndə da tə nau mbandə nyi wa.[1]

⁴⁴Cha nəu pama nji, ga shili hir Yesu, cha tsəkar nyachira ləkutə nyi, təma mashi nda ta'i.

⁴⁵Ngə Yesu tə na, “Wanga tsəka ɗa?” Dəhə nji tə kəpala, ngə Bitrus tə na, “Tlakəu, nji tanyi ngə kwa hikə nghə mada təwabari.”

⁴⁶Dəhə ka əngə Yesu tə na, “A tsəka ɗa tə nji, aka a ngatə təya ənda gyalkur nə mbandə tə biya ku dzaya.”

⁴⁷Nda mala nda ngabiya ənda zəndəbiya nyi tə nji, ngə cha biyatə babal cho dzədzi, cha uzhi mar Yesu, ga par nyi sənda gwa'atə cha tsəka nyi, ana ənda cha mbə təma.

⁴⁸Yesu tə nar nyi, “Kwa ɗa, jirikur nghə mbandə nghə ti. Ma'i na piyarɗufəu.”

⁴⁹A da cha udiya ɓwanya wa, kəl jan ndə hya'atə ku ki Yayirus cho na nə Yayirus ndəradəgal nə vi pətlənya, “Kwa nghə tə ti, ngwa ka tsəu həɗandə maləm wa.”

⁵⁰Nda Yesu tə ngatə ənga, cha na nə Yayirus, “Ngwa ka da ləvər wa, nənyi tanghə jiri, kwa nghə kwa mbəa.”

⁵¹Nda nda həya ki nda, a cha i madawa gwa kə'i cha wa, kəl Bitrus, Yohana ana Yakubu, ba'a adanya kwa nda ana ama nyi.

⁵²Kəl tiwi tanyi njir ki nda kwa tiwi aka kwa nda. Ngə Yesu tə nar nda, “Ngwa hya da tiwi wa, a kwa nə da tə wa, hanyi ngə cho nja!”

⁵³Ngə nda mərtə nyi gyaɗi həyatəvi, aka zəndətə nda ənda a tətə cha.

⁵⁴Yesu tə gəzəya cha kwa nda cha har kurakə ga na, “Kwamalakəu, hya'ati!”

⁵⁵Pya cha ɓəla shili, təma cha hya'ati, ngə Yesu tə nar nda, nda nənyi sərsum cha səma.

⁵⁶Njir ya nyi inda tə mər məngəl, ngə Yesu tə təɗəhima nda ngwa nda ba'a par nyi sənda ɗa nə madawa wa.