Read nya huba Luka 9 Bible Online

Luka 9 - nya huba bible

Luka 9

¹Ngə Yesu tə nga shawa kwabəmətlə inda shili tə mbwar zhang, ga nə nda gyalkur nə gədləbiya dəhə məlləm ku kəra nji ana nda mbandə shiləkə pampaməu.

²Cha sə nda, nda ki bəzə mafakər təlkur Hyel ana nda mbandə njir shiləka.

³Cha nar nda, “Ngwa hya da ba'a hə madami aka ma'i kəhi wa, ndara zəwa, ndara mbəl, ndara sərsuma, mada kwaba wa. Ya əngwa hya da ba'a hə vanya ləkutə pam matsa nda dzən hi wa.

⁴Ma ki nda nja dləutsə hi kwa, hya ngya tangnda kəl bəji da hyo ngyar mələm nda.

⁵Dəhə nji'inda ngyar dləu hi, ma hyo biya ku mələm nda, hya tsa nda bərbər mələm nda tə hya hi, ga cha ɗa ka matauli kəhi.”

⁶Ngə nda hya'atə ga ghəya na ɓa mələm i, nda kwa bəzə Mafakə Mənakəu, nda kwa mbandə njir shiləkə tə mbwa pampaməu.

⁷Nda Hiridus nda kwa səm təlkur Galili tə ngatə mafakər dəhə sə'ingə kwa ɗa nga, ngə ɗufwa cha tə tsafə gagaɗa, aka alenya nji kwa na ənda Yohana ndər mər baɓtisma nda na hya'atə ku hwa.

⁸Alenya nji tsəu kwa na ənda Iliya ndər mətakər Hyel ngə tə ɓəla shili. Ətsə'u alenya nji kwa na ənda zhang ku huɗa njir mətakər Hyel inda ɗəɗəm inda na hya'ati.

⁹Ngə Hiridus tə na, “A zəndətə ya ənda a tlanda tə ya kəra Yohana. Ya ndə manə nə yo ngatə chul sə'inə təkəra cha?” Ngə cha gwa'a ənda cho ɗa na la'a Yesu.

¹⁰Changhabal inda ɓəl shili ga nar nyi dəhə sə'inda nda mər nə Yesu. Ngə nda təra yo vanya mələm njo nga Betsaida nanda səkənda.

¹¹Kəl ja, nji ɗang tə zəndəbiya ga nəu nyi yi nda. Cha dləutsə nda, ga ndər nənda təkəra təlkur Hyel, ga mbandə njir shiləka.

¹²Nda pəchi kaɗə təɗa, ngə shawa kwabəmətlə inda shili da Yesu ga nar nyi, “Ngyar nji'inə nda təra gu mələm ka fa inə lələhə ina ga nda gwa uya sərsuma ana mbwar hanyi, aka a səda tangnə wa.”

¹³Ngə Yesu tə ɓəlakə nda, “Ya nənda ma sərsum ja nda səma.” Nda nar nyi, “Kəl takwara tufu ba'a kalfi mətlə tanyi nə tsa ea tangna, kəl nda macha eo ki ɗəlbiya nyi sərsum nə chul nji ɗang na.”

¹⁴(Shili kwa ɗa dəbu tufu). Kəl ja, cha nar nyi nə shawa nyi, “Nar nda ma nda ngya, nji tufkumnyi ku kala dzuku.”

¹⁵Ngə shawa inda mər ənga, dəhə nja uya mbwar ngya.

¹⁶Ngə cha hətə takwara tufu ana kalfi mətlə inda, cho ndzam shi huɗamələm cha usaku Hyel təkəri. Ngə cha pəpasəu takwara inda ga nənyi nə shawa nyi nda təkənda nyi nə dlama nji.

¹⁷Madawa tə səma ga nyi. Ngə shawa inda tə tsəmtə sənda həyadza, tsəla kwabəmətləu.

¹⁸Vanya bəji da Yesu tə ngyar dlama nji ka cha pətlənya zhang tanyi. Kəl nda shawa nyi ingə ka cha. Ngə cha jau nda, “Wa njo na naya?”

¹⁹Nda na, “Alenya nji kwa na Yohana ndər mər baɓtisma, alenya nji Iliya, alenya nji tsəu kwa na zhang ku huɗa njir mətakər inda haaɗa ngə tə ɓəla shili.”

²⁰Ngə cha jau nda, “Nahi nəkə hi ya, wa hyo na naya?” Bitrus tə wum ga na, “Nakə ngə Kəristi nə Hyel.”

²¹Ngə Yesu tə təɗəhima shawa nyi tsa nda da par nyi nə madawa.

²²Ngə cha nar nda, “Tuku Zər Ndə kwa sa ɓwaɓwatə pampaməu, njirawawa'a mələm, wawa'ar fərist ana ka maləm gadlagadla Musa kwa ngya nyi. Njo tsəya nyi, pəshir hanyi makərkunyi cho hya'atə na pi.”

²³Kəl Yesu tə nar nyi nə dlama nji, “Dəhə ndə nda kwa i nəu ɗa, tuku ngə cha ngyar kərnyi, cha hətə taməngəla nyi cha nəu ɗa.

²⁴Aka dəhə ndə nda kwa gwa'a cha mbəɗandə pya cha, cho sanda, ətsəu, dəhə ndə nda tə sanda pya cha ka ya, cho uya.

²⁵Mi zhar nda ndə kwa uya, macha uya dəhə sər dunəya ga tar pya cha?

²⁶Ma ka ngatə kuzhi ɗa ana kuzhir ɓwanya ɗa, Zər ndə kwa da ngatə kuzhi nghə tsəu macha da shili ku səli nyi ana səlir Ada nyi ana chama karti i nə Hyel.

²⁷Jiri yo nar hi, alenya nji da tangna sakana, a da nda kwa tə wa, kəl nda la'a shilir Zər Ndə ku təlkur Hyel.”

²⁸Ahir hanyi chisəu nda cha dəkə sə'ina, ngə Yesu tə hətə Bitrus, Yohana ba'a Yakubu kə'i cha nda təra gyo ma ka pətlənya.

²⁹Sakanda cho pətlənya, ngə huɗəma cha shabiyadza, dzaki nyi tsəu tə ɗa pərtə tyaləu.

³⁰Kəl janə nji mətləu, ka Musa ana Iliya kwa ɓwanya kə'i cha,

³¹nda chabiyadza ku səli nda kwa mbəla, nda ɓwanya ka Yesu təkəra laku nda cho nyabiya dəhə sənda Hyel tə nar nyi vu Urshalima.

³²Hanyi wurta hənda Bitrus ba'a alenya shawa inda, kəl ngə nda hya'ati ga la'a səli nyi kwa mbəla ana nji mətlə inda ta'i kə'i cha.

³³Ma nji mətlə inda kwa ngyar Yesu, ngə Bitrus tə nar nyi nə Yesu, “Tlakəu, mənakə gagaɗa təmən tangna, ma cha kwa i ka, yo latə madləɓa makər tangna, nənghə patləu, nə Musa patləu ana nə Iliya patləu.” (A Bitrus da zəndəbiya səngə cho ɓwanya təkər ngə wa).

³⁴Tsəu cha ku huɗa ndəra kəl ləmbəkə pərtə nda kwa mbəla tə səya haɗiya nda dərdla'a, ngə ləvər tə səya nda.

³⁵Kəl kurakə tə səya kyo ləmbəkə nda kwa na, “Nənna ngə Zər ɗa nda ya tabiya, sə ma himi da cha.”

³⁶Nda kurakə nda wur na ndəra, manda la'a kəl jan Yesu zhang tanyi. Shawa inda gəziya dəhə sənda nda la'atə ɗa, ya a da nda par nyi nə madawa ku bəji nda wa.

³⁷Vanya zəkəu nda Yesu ka shawa inda səya kyo mə nda, nda həya dlama nji kwa səkə nyi.

³⁸Vanya ndə ku pama dlama nji'inda tə nga ga na, “Maləm, ndzamar zər ɗa, kəl nacha ngə tsa ya tangəlanghəu.

³⁹Mələm ngo fəltənyi, cho bəzənda nyi cho ləlla kəl mburum tə biya ku nya cha. A cho ngya nyi wa kəl nacha takasiya nyi.

⁴⁰A gədi tə ya shawa nghə ka nda gədləbiya, ya a da nda nau wa.”

⁴¹Yesu tə wum ga na, “Kara, nahi njir bəji na, nji kəla jiri! Ba'a sakamani yo ngya kə'i hya? Ba'a sakamani yo səsə'u hya? Anda na zər nghə ngə tangna.”

⁴²Nda cho shili, kəl məlləm nda tsatə nyi hə'i kəl dzədzi cho dzədzi. Kəl ja, Yesu tə tsə məlləm nda, cha mbandə zər nda ga ɓəlandə nyi nə ada nyi.

⁴³Dəhə nji tə mər məngəl ana gyalkur Hyel. Tsə'u nda kwa mər məngəl ana sənda cha məra, ngə cha nar nyi nə shawa nyi,

⁴⁴“Səya ma himi mənakə da səngə yo gwa'a ya par hi nga! Njo tləɗanda Zər Ndə nə nji.”

⁴⁵Kəl ja, a da nda ngabiya kəra ɓwanya ngə wa. Nja hiwanda tsa nda aka əngə a da nda ngabiya wa, ya ləvər kwa tənda tsa jawa.

⁴⁶Ngə kəpala tə hya'atə ku pama shawa inda a təkəra nda wa ngə kwa ndiya na dəgalkur ku pama nda.

⁴⁷Kəl ja, nda Yesu tə zəndəbiya sənda ku ɗufwa nda, ngə cha nga zər kush ga ta'ində nyi ləhə dzə nyi.

⁴⁸Ngə cha nar nda, “Madawa tə dləutsə zər kush wi zər na, aku tləm ɗa, naya nda cha dləutsi, ma ndə nda dləutsə ɗa tsəu, a dləutsətə cha ndə nda sə ɗa. Ndə nda kush ku pama hi, nacha ngə dəgaləu.”

⁴⁹Yohana ndəra ga na, “Tlakəu, ea la'a vanya ndəu kwa gədlə məlləm ana tləm ngha, ngə ea gwa'a ea katə nyi aka a da cha nəkəmən wa.”

⁵⁰Ngə Yesu tə nar nyi, “Ngwa hya da ka nyi wa, dəhə ndə nda pa'a kwa mər dawa na hi, nəkə hi nda.”

⁵¹Nda kaɗə bəji ɗa ka njo hənda Yesu sha huɗamələm, ngə cha hətə ku ɗufwa cha ka cha təra yi Urshalima.

⁵²Ngə cha sə alenya nji ka ga nda təra biyama nyi, ngə nda go vanya mələm njir Samariya ka ga nda ɓatliya ka shili nyi.

⁵³Kəl ja, njir Samariya ngyar dləutsə nyi, aka zəndətə nda cha biya ka cha təra yi Urshalima.

⁵⁴Manda ka shawa nyi, Yakubu ana Yohana tə la'a ənga, nda na, “Tlaka, aa ea ngatə hu'u hya'atə kya huɗamələm a səya kwasənya nda ya?”

⁵⁵Kəl ngə Yesu tə sha ga tsə nda.

⁵⁶Ngə nda təra kyo vanya zər mələm paməu.

⁵⁷Nda nda kwa ma'i ngə vanya ndə tə nar nyi nə Yesu, “Ya kwa nəu ngha mada abari.”

⁵⁸Ngə Yesu tə wum ga nar nyi, “Hyawi, ka'u kənda da, eakə tsəu ki kənda da, kəl ja, a mbwar fiya kər da tsa Zər Ndə wa.”

⁵⁹Ngə cha nar nyi nə vanya ndəu, “Nəu ɗa.” Kəl ngə ndə nda na, “Tlakəu, ngya ɗa ya ki haɗənda ada ɗa gwadagəu.”

⁶⁰Ngə Yesu tə nar nyi, “ngyar nji kuɗəkuɗa nda haɗə nji kuɗəkuɗə kənda. Nakə nənghə ma'i ka ki bəzə mafakə təlkur Hyel.”

⁶¹Ngə vanya ndə tsəu tə na, “Tlakəu, yo nəu ngha, kəl ja, ngya ɗa ya yi par nyi nə njir kiɗa gwadagəu.”

⁶²Yesu tə nar nyi, “Ndə nda fətə cha cha tə gələ'u zwa, ga sha cho ndzam yahi, a da cho ki na təlkur Hyel wa.”