Read nya huba Yohana 10 Bible Online

Yohana 10 - nya huba bible

Yohana 10

¹“Jiri yo dəkar hi, ndə nda a da tə gwa ku chiɓi kətəng təwa nyavi wa, ya ngə cha gwa təwa ngwa, ndər həl cha, ndər fa'avi tsəu.

²Ndə nda tə gwa təwa nya chiɓi, nacha ngə ndər ɓəla kətəng ɗa.

³Ndər ɓəla nyavi kwa wuniya nyi nyavi nə ndər ɓəla kətəng, kətəng tsəu kwa səhimi da kuraka cha, cho nga nda na tləm, cho dəliya nda.

⁴Macha dəliya nda, cho ma'i manə nda, kətəng i kwa nəu hi nyi, aka kwa zəndə nda kuraka cha.

⁵A da nda kwa nəu mihiɓi wa, kəl nda ndo hwi tsa cha, aka a da nda kwa zəndə kuraka cha wa.”

⁶Yesu tə mərtə nda ngəna ba'ada, ya a da nda ngabiya sə nda cho dəkə nə nda wa.

⁷Ngə Yesu tə nar nda səkəu, “Jiri yo nar hi, Naya ngə nyavi kətəng.

⁸Dəhə nji'inda tə shili təvi ya shili, njir həl inga ana njir fa'avi, kəl ja, a kətəng da səhimi da nda wa.

⁹Naya ngə nyavi. Madawa tə shili ga gwa təwa ɗa cho uya mbəɗa, aka cho gwa, cho biya ya cho uya bəɗakə mənakəu.

¹⁰Shilir ndər həl nənyi, kəl aka həl, ana tsəya, ana aka səwandi. Naya, ya shili aka ga nda uya pi nda ba'anawa, ana nda uya nyi bwaɓəu.”

¹¹“Naya ngə ndər ɓəla mənakəu, ndər ɓəla mənakəu kwa sənda pya cha aka kətəng nyi.

¹²Ndər mər tlər wazəba nənyi, a da cha ndər ɓəla mənakə wa, aka kətəng da nənyi wa, aka ma sakanda cha la'a ularvwa kwa shili cho hwi tanyi, kəl ularvwa nda kwa gwa ku pama nda cho səya alenyi, alenyi kwa wiɗa.

¹³Cho hwi tanyi aka tlər wazəba cho məra, a cho ɗəngha na kətəng wa.

¹⁴Naya ngə ndər ɓəla mənakəu. A kwa zəndə ya na'a, na'a tsəu kwa zəndə ɗa nda,

¹⁵Wi ngə Ada kwa zəndə ɗa, əngə tanyi tsəu kwa zəndə ya Ada, ana yo sənda pya ya ka kətəng inga.

¹⁶Alenya kətəng da tsa ya nda pa'a ta gwa ku chiɓi na, ya na'a nda. Tuku yo tsəmtə nda, aka ga nda səhimi da kuraka ya, nda ngya ku chiɓi zhang, ndər ɓəla zhang.

¹⁷Ada kwa i ɗa, aka yo sənda pya ya, ga ya ɓəla hətə səkəu.

¹⁸A ndər nau həbiya pya yada wa kəl nda na ikur ɗa. Gyalkur sənda da tsa ya, ya gyalkur ɓəla hətə da tsa ya. Na cha ngə sənda Ada ɗa nar ɗa ya məra.”

¹⁹Aka ɓwanya nga, kəpal tə gwa ku pama njir Yahuda səkəu.

²⁰Ɗang ku pama nda tə na, “Məlləm ku kəra cha! Nacha gwa'atə cho mər məlləmkur, mya gwa'atə hyo səhimi da cha?”

²¹Kəl ja, alenya nji tə na, “A da ɓwanya ndər səu kər ngə wa, kwa nau ndər məlləm wuniya lya ndər wuləfə ya?”

²²Nda bəjir Ladər nə Dzəviya Mbwa'alə Hyel vu Urshalima tə shili, ya bəjir fwakəu.

²³Yesu kwa zhuli ku pama Madləɓa Saloman anya nya Mbwa'alə Hyel.

²⁴Njir Yahuda inda tə təyadzəa, ga ɓandə nyi, ngə nda nar nyi, “Ba'a sakamani ko ngya ea ku tar zənda? Dəkar ea jiri tə babal, ma cha nakə ngə Kəristi?”

²⁵Ngə Yesu tə na, “A dəkar hi tə ya, ya a da hya na'a jiri wa. Tlər inə yo mər na aku tləmər Ada ɗa nə yo məra, nacha ngə tsəu kwa pə jiri təkəra ya.

²⁶A da hya kwa na'a jiri wa, aka a da hi kətəng ɗa wa.

²⁷Kətəng ɗa i kwa səhimi da kuraka ya, kwa zəndə ɗa nda, nda kwa nəu hiɗa tsəu.

²⁸Yo nənda pi nda ba'anawa, ya a da nda kwa kuɗə pa'a wa. A ndə da kwa nau dləuya nda ku cha ya wa.

²⁹Ada ɗa nda tə na'a nda, a ndiya tə dəhəu, ya a ndə da kwa nau gutsəbiya nda ku cha Ada ɗa wa.

³⁰Ada ana Naya zhang ea.”

³¹Njir Yahuda tə ɓəla fa'a hangu ka ga nda vakə nyi ni.

³²Ngə Yesu tə nar nda, “Səshinshin wawa'a ɗang nda ya mər hya'atə tsa Ada ɗa ku pama hi, mi ngə sə zhang ku huɗa nda nda hyo gwa'a vakə ɗa təkəra?”

³³Ngə njir Yahuda inda tə nar nyi, “A da ka sə mənakə nda ka mər ngə eo gwa'a vakə nghə wa, kəl nda ka ko pə ɓwanya həyatəvi, ko məməla kərnghə na Hyel, ya jan kə ndə tanyi.”

³⁴Yesu tə nar nda, “A tsəfətsəfə nyi cha ku gadlagadla kəhi ma, ənda Hyel tə na, ‘Nahi hyel hi.’

³⁵Aka zəndətə hi ɓwanya nda ku likatəkatə da kwa nau ɓəlnda dzə wa. Macha cho nga nji'inda ɓwanya Hyel tə shili da nda, ‘hyel i,’

³⁶aman hyo na nacha nda Hyel na kərnyi tə ɓatliya ga sətə shili tə dunəya kwa ngəl Hyel aka cha na naya Zər Hyel ya?

³⁷Macha a da yo mər tlər nda Ada ɗa kwa mər wa, ngwa hya da na'a jiri wa.

³⁸Kəl ja, macha ənga, mada a da hya na'a jiri wa, nənyi ma jiri nə tlər inga, aka ga hya ngabiya ana hya zəndə ənda Ada aku ya cha, naya tsəu aku cha ya.”

³⁹Ahir ngə səkəu, nda gwa'a laku aka ga nda səya Yesu, kəl ja, a da nda nau wa.

⁴⁰Ngə Yesu tə ɓəl tanyi biya tiya Dəl Urdun tangnda Yohana kwa ɗaka mər baɓtisma nə nji ti, ga ngyata nyi.

⁴¹Nji ɗang tə shili da cha, nda kwa na, “A Yohana da mər səshinshin wa, kəl nda aku dəhə sənda cha dəkə təkəra ndə na, jiri.”

⁴²A tangnda nji ɗang tə nənyi jiri nə Yesu.