Read nya huba Yohana 12 Bible Online

Yohana 12 - nya huba bible

Yohana 12

¹Pəchir Ladər Dləgəlnda tə həyadzə hanyi kwah. Ngə Yesu tə hya'atə ga təra yi Baitanya, mələm Li'azaru nda Yesu tə hya'andə ku hu nda.

²A hinda nja ɓatliya sərsum həsəli nə Yesu ku ki, Marta ngə mala təkə sərsuma, Li'azaru zhang ku huɗa nji'inda ngya ka səm sərsum nda ka Yesu.

³Ngə Maryamu tə hətə təkə mal nda nja mər na nardi tsa'amunyi. Nda njo ɗəlnda na kwaba 'ualəu, ya kwa shi'uni kwitkwitə wi sə wa. Ngə cha kəkəɗənda hya Yesu na shishir kəra cha, ga pətə mal nda ti, ngə taki nda tə gulbiya dzə na shi'uni mənakəu.

⁴Zhang ku huɗa shawa Yesu, ana tləm nyi Yahuda Iskərayoti, nda kwa da tləɗanda Yesu tə na,

⁵“Mya gwa'atə a nja nda ɗəlnda mal ngə təkəra kwaba 'ual nda kwa ɗa dinari gharəu makər nja nənyi nə njir ɗali wa?”

⁶Cha na ənga a da ka cho ɗəngha na njir ɗali wa, kəl nda aka ndər həl cha, aka nacha ngə kwa gəzə mbəl kwaba kənda, ya cho vəra həltsə cho vala kərnyi ni.

⁷Kəl ngə Yesu tə na, “Ngya nyi nji sənyi, mal nga, cha fiya ka ga cha ɓatliya pəchir haɗə ɗa.

⁸Aka mada sakamani na hi ka njir ɗali, kəl ja, naya a da yo ngya kə'i hi wa.”

⁹Nda dlama njir Yahuda tə ngatə ənda Yesu vu Baitanya, ngə nda təra yi nda. A da aka Yesu tanyi wa, kəl ja, aka ga nda yi la'a Li'azaru nda Yesu tə hya'andə ku hu nda.

¹⁰Kəl ja, wawa'ar fərist inda tə mbatə nya ka ga nda tsəya Li'azaru tsəu,

¹¹aka na cha gwa'atə njir Yahuda ɗang tə tlabiya kərnənda ga nənyi jiri nə Yesu.

¹²Vanya zəkə dlama nji ɗang tə shili ka Ladər nda, ngə nda ngatə ənda Yesu kwa shili Urshalima.

¹³Ngə nda ɓəltsə danjar dyabino, nda biya ta'i ka dləu nyi na kurakə dzəgam dzəgaməu, nda kwa na, “Hyel sər fal cha, Ndər papa'akur ngə ndə ngə kwa shili ku tləmər Tlakə nga. Ndər papa'akur ngə Təl njir Isra'ila!”

¹⁴Nda Yesu tə uya dalnjiɓa, kəl cha gyatə wi nda cha tsəfətsəfə nyi,

¹⁵“Nahi njir mələm Sihiyona[3] ngwa hya da ləvər madami wa, jan Təl kəhi kwa shili tə ya dalnjiɓa.”

¹⁶Tangərma, a shawa nyi inda da ngabiya sə'ingə wa, kəl ja, ahir nda Hyel tə chabiya səlir Yesu, ngə nda zəndəbiya ənda ɗaka tənji tsəfə təkəra cha ənga. Ya sa ɗatə na cha tang ənga.

¹⁷Nji nda tə la'a ənda cha ngabiya Li'azaru ku hwa ga hya'andənyi na pi, na nda ingə nji'inda kwa dəkə sənda la'a nda ana sənda tə ɗa.

¹⁸Aka səshinshin nda cha mər nga gwa'atə nji ɗang tə biya ka dləu nyi.

¹⁹Njir Farisi inda kwa ɓwanya ku pama kərnənda, nda kwa na, “A la'atə hi wa, sə da nau mən wa! Dəhə nji kwa nəu nyi!”

²⁰Njir Heleni da ku huɗa nji'inda tə təra yi Urshalima ka həsəli nə Hyel bəjir Ladər nda.

²¹Nda shili da Filibus ndər Betsaida tə hə'i Galili, kəl nda gədi nyi, nda na, “Maləm kwa i ea, ea la'a Yesu.”

²²Ngə Filibus tə yi dəkar nyi nə Andrawus, ngə kya'a nda tə yi nar nyi nə Yesu.

²³Ngə Yesu tə nar nyi nə nji, “Bəji ɗatə nda Hyel kwa hətə səlir Zər Ndəu.

²⁴Jiri yo nar hi, ma'a da nja tləka nda chuli uhi cha tə wa, cho ngya tyangəlyang tanyi, kəl ja, ma cha tah ga tsəa cho həkər mənakəu.

²⁵Dəhə ndə nda kwa i pya cha, cho tari, kəl ja, madawa tə sənda pya cha tə dunəya, aka tləm ɗa tlakə nyi kwa uya pi nda ba'anawa.

²⁶Madawa kwa gwa'a cha mər tlər ɗa, kəl nacha nəu dərpə ɗa, aka dəhə mbwa nda ya ti, kərnyi ma'a cha ɗa tangnda. Dəhə ndə nda tə la'a səli ɗa, Ada ɗa tsəu kwa la'a səli nyi.”

²⁷“Sakana ɗufwa ya tədəɓəu, kəl ja, mi sənda yo na? Ya na Ada dləuya ɗa tsa səngə ya? A da wa, aka a karə ngə shili ya, aka ga dəhə sə nyabiyadza.

²⁸Ada, hətə səlir kərngha.” Təma kurakə tə biya kya huɗamələm, “A wurtə ya hətə səlir kərɗa ya yo ɓəla hətə səkəu!”

²⁹Nji'inda tangnda tə ngatə kurakə nda tə na, “Par nga dəradla.” Ndə alenya nji, “Chama Hyel nga ɓwanya nə nyi!”

³⁰Ngə Yesu tə na, “A kurakə ngə hya ngatə ngə da na sakəda na'a wa, kəl nda aka sakəda kəhi ngani.

³¹Bəjir nəuma nə dunəya ɗati, bəjir həbiya təl dunəya tsəu shili ti.

³²Ahir ma nja hətə ɗa shi, yo tsəmtə madawa shili da ya.”

³³Yesu tə na ənga ga cha char chul tə nda cho da tah.

³⁴Ngə nji'inda tə na, “Gadlagadla tə dəkar ea Kəristi kwa ngya ba'anawa. Ya janə nakə kwa na, ‘Vəlvəl kəl nja hya'andi Zər Ndəu?’ Nacha wa ngə Zər Ndə nga?”

³⁵Ngə Yesu tə na, “Vicham tsəu kwa səkardzə ku pama hi. Hya ma'i tsə'u vichaməu, tsa vu'i da səya hi, aka madawa tə ma'i ku kutla, a da cho zəndə mbwar fiya hi wa.

³⁶Nənyi ma jiri nə vicham, tsə'u cha kə'i hi, aka hya ɗa ka nguli vicham.” Ahir Yesu tə dəkar nda wi nga, ngə cha ki mbu tanyi tsa nda.

³⁷Dəhə ka səshinshin ingə cha mər tə lya nda nga, a da nda nənyi jiri wa.

³⁸Sə'ingə dəhə aka ga ɓwanya Ishaya ndər mətakər Hyel cha nyabiyadza, bəra, “Tlakəu, wa tə nənyi jiri nə ɓwanya kəea? Anə wa tsəu gyalkur Hyel tə chabiyadza?”

³⁹Aka ənga, a da nda kwa nau nənyi jiri wa, aka Ishaya wurtə na tə vanya mbwa,

⁴⁰“Hyel wurtə wuləfənda lya nda, ga mərtə ɗufwa nda ɓaɓaləu, atsa nda da la'a na lya nda, nda gəzəya na ɗufwa nda, nda ɓəla shili da ya ga ya mbandə nda.”

⁴¹Ishaya tə na ənga aka la'atə cha səlir Yesu, ga ɓwanya təkəri.

⁴²Aku bəji nda, nji ɗanghəu, ma'a ku huɗa wawa'ar Yahuda tə nənyi jiri nə Yesu. Kəl ja, ləvər tə səya nda tsa njir Farisi, a da nda nau ɓwanya təkər tə babal wa, atsa nja da gədləbiya nda ku vi pətlənya.

⁴³Aka nda kwa i nda uya fal tsa nji ndiya matsa nda uya fal tsa Hyel.

⁴⁴Kəl Yesu tə har kuraka cha ga na, “Madawa tə na'a jiri, a da kəl a na'a tanyi ngə cha na'a jiri wa, kəl ja, ma'a nə ndə nda tə sə ɗa.

⁴⁵Madawa tə la'a ɗa, a la'atə cha ndə nda tə sə ɗa.

⁴⁶Ya shili tə dunəya wi vicham ga ya mbəl ku kutla, dəhə ndə nda tə na'a jiri, a tsə'u cho ngya ku kutlə wa.

⁴⁷Madawa tə ngatə mafakə ɗa ya a da cha ɓəlatə wa, a da ya kwa mər nəuma nənyi wa. Aka a da ya shili ka mər nəuma nə dunəya wa, kəl nda ka ga ya mbəɗandə dunəya.

⁴⁸Madawa tə shandə ɗa yi, ga ngyar dləu ɓwanya ɗa, a uyatə cha ndə nda kwa da mər nəuma nənyi. Səngə ya dəkar hi nga, nacha ngo ɗa ka sər mərtə hi nəuma ku batəbatər bəji.

⁴⁹Aka a da ya ɓwanya ngə təkərɗa wa, kəl nda ɓwanya Ada nda tə sə ɗa, nacha tə dəkətə ɗa sənda yo pəa.

⁵⁰A zəndətə ya ɓwanya nyi kwa shili na pi nda ba'anawa. Aku ba sənda yo dəka, nacha ngə sənda Ada tə nar ɗa ya dəka.”