Read nya huba Yohana 15 Bible Online

Yohana 15 - nya huba bible

Yohana 15

¹“Naya ngə wur Anap nə jirijiri, Ada ɗa ngə ndər zwa.

²Dəhə cha wu nda pa tə yah cho tsaunda nyi, cha wu nda kwa yah tsəu, cho ɓatlətə nyi mənakəu, aka ga cha tsakətə yah ngulisha'a.

³Sakana chichinyi hi, aka ɓwanya nda ya dəkəbiya hi.

⁴Gəzətə ma kərnəhi, naya tsəu yo gəziya hi. Wi nda a cha wu da kwa nau yah təkərnyi wa, kəl nda cha tlə tə hatla wua. Nahi tsə'u a hyo mər sakəda wa, kəl nda ma hya daɓətəkər naya, hya ngya ku dza ya.”

⁵“Naya ngə wur Anap, nahi ngə cha cha. Madawa tə daɓətəkər naya, yo ngya ku cha, cho yah ɗang wi wur Anap, aka ma'a da hi ku ya wa, sə da hyo nau mər təkərnəhi wa.

⁶Ma ndə nda pa'a tə daɓətəkər naya njo tsaunda nyi wi ngə tə cha wua, ba sənda nyi cha 'ula, kəl nda nja tsəmtə nja hau hu'u kwa, cha ngi kəɗətsəu.

⁷Kəl ja, ma hya daɓətəkər naya, ɓwanya ɗa tsəu ku ɗufwa hi, hyo gədi sənda hyo i, ya njo nə hi.

⁸Nacha ngə laku nda njo hətə səlir Ada ɗa ti, ma hya yah ɗang wi wur anap, təwa əngə hyo ɗa ka shawa ɗa.

⁹“A nyida hi təya wi ngə Ada ɗa tə nyida ɗa, ngwa hi da təkə na nyida ɗa wa.

¹⁰Ma hya ɓəlatə tsaubar ɗa, a yo təkə na nyida hi wa, wi nda ya ɓəlatə tsaubar Ada ɗa, a da cha təkə na nyida ɗa wa.

¹¹A wurtə ya dəkar hi sə'inga aka ga hirgyaɗi ɗa cha ngya ku ɗufwa hi, ga hirgyaɗi kəhi nyabiyadza.

¹²Jan na'a na tsaubar, ənda hya nyida kərnəhi tang wi ngə ya nyidatə hi.

¹³A vanya nyida da kwa ndiya nənnə wa, ənda ndə kwa sənda pya cha aka bazhi nyi.

¹⁴Hyo ɗa ka bazhi ɗa, ma hya mər sənda ya dəkar hi.

¹⁵A yo nga hi mavi'i wa, aka mava da kwa zəndə sənda tlakə nyi kwa mər wa. Yo nga hi bazhi, aka a nar hi təya dəhə sənda ya ngatə tsa Ada ɗa.

¹⁶A nahi ngə tə tabiya ɗa wa. Naya nga ɗəmtsə hi, ya ɓatliya hi təya ga hya ki yah ngulisha'a, ga nguli kəhi ngya ba'anawa. Aka dəhə sənda hyo gwa'a tsa Ada ɗa ku tləm ɗa cho nə hi.

¹⁷Tsaubar ɗa nə hi nacha ngə hya nyida kərnəhi.

¹⁸“Ma dunəya ngya hi, hya zəndə naya cha ghəya ngyari tangərma.

¹⁹Macha nə dunəya hi, təki cho nda i hi, kəl ja, a da hi nə dunəya wa; aka a wurtə ya ɗəmbiya hi aku dunəya, nacha gwa'atə dunəya ngya hi.

²⁰Ɗənghatə ma sənda ya nar hi, ənda ‘A mava da kwa ndiya tlakə nyi wa?’ Wi ngə nda ɗa məndza'u naya nga, əngə tanyi tsəu nda kwa mərtə hi, macha a hətə nda səlir ɓwanya ɗa, nda kwa hətə səlir nəkə hi tsəu.

²¹Dəhə sə nja kwa mərtə hi aka naya, aka a da nda zəndə ndə nda tə sə ɗa wa.

²²Ma pa'a aka ɓwanya nda ya dəkar nda nə wa, bikər səpəla'a kənda da wa, kəl ja, sakana a tsə'u ɓwanya kənda da təkəra səpəla'a kənda wa.

²³Madawa tə ngya ɗa, a ngyar tə cha Ada ɗa tsəu.

²⁴Ma pa'a aka ya mər səshinshin nda a vanya ndə da tə ɗaka mər ku pama nda wa, a bikər səpəla'a kənda da wa. Kəl ja, sakana a la'atə nda dəhə sənda ya məra, dəhə ka ənga, a ngya ea tə nda kya ea na Ada.

²⁵Sə'ingə dəhə aka ga ɓwanya nda nja tsəfətə ku gadlagadla kənda cha nyabiyadza, bəra, ‘Nda ngya ɗa a da ka vanya sə wa.’

²⁶“Ma ndər vala nda yo sətə hi hya'atə kya dza Ada nda tə shili da hi. Nacha ngə Shanguɗə nə jiri nda hya'atə kya dza Ada, nacha ngo da dəkəbiya ɓwanya təkəra ya.

²⁷Nahi ma'a ɗatə tuku hya dəkə ɓwanya təkəra ya, aka tangərma namən tanyi kə'i hi.”