Read nya huba Yohana 17 Bible Online

Yohana 17 - nya huba bible

Yohana 17

¹Ahir Yesu tə wur na ɓwanya nyi, kəl cha har huɗəma cha shi huɗamələm cha gədi, “Ada bəji shili ti, hətə səlir Zər ngha, ga Zər ngha hətə səli nghə tsəu.

²Aka a wurtə kə nənyi gyalkur təkəra nji, ga cha nənyi pi nda ba'anawa nə dəhə nji'inda ka tsau nyi ku cha cha.

³Ənda nda kwa ɗana uya pi nda ba'anawa na cha ngə ga madawa zəndə ngha, nakə ngə Hyel zhang nda na jiri, ga nda zəndə Yesu Kəristi na cha ngə ndə nda ka səa.

⁴A chabiya təya səli nghə nə dunəya, a wurandə təya tlər nda ka na'a aka ga ya məra.

⁵Əja Ada, hətə səli ɗa ana səli nda ya nə təvi nja mər dunəya.”

⁶“A wurtə ya chabiya tləm nghə nə nji'inda ka na'a aku dunəya na. Aka nənghə nda, ngə ka na'a nda, ya a ɓəlatə tə nda ɓwanya ngha,

⁷a zəndətə nda dəhə sənda ka na'a atsa kə cha.

⁸A nənda təya ɓwanya nda ka na'a, ngə nda dləutsi, a zəndətə nda jiri kya dzə nghə hya'atə ya, a nənyi tənda jiri tsəu nakə tə sə ɗa.”

⁹“Aka nda nə ya kwa gədi, a da aka dunəya wa. Yo gədi ka nji'inda ka tsau ɗa aka nənghə nda.

¹⁰Dəhə sənda tsa ya nənghə cha, ana nənghə tsəu, na'a, səli ɗa tsə'u a shilitə təwanə nda.

¹¹Sakan ja, jan yo gya da ka, a tsə'u da yo ɗa ku dunəya nə wa, kəl ja, nanda aku dunəya nda. Maki Ada Ndə Karti! Ɓəlatə nda mənakəu aku gyalkur tləm ngha, tləm nda ka na'a, ga nda ngya zhang wi ngə təma na.

¹²Sakanda ea ka nda, ya ɓəlatə nda aku gyalkur tləm nghə nda ka na'a, a ɓəlatə nda təya, a mada zhang da sa aku ba sənda ka na'a wa, kəl zhang nda tə ɗa tuku cho sa ga cha nyabiya sənda likatəkatə tə na.

¹³Sakan ja, jan yo gya da ka, ya pə sə'inə nə nda wi nə təya tə dunəya na, aka ga nda uya hirgyaɗi bwaɓəu.

¹⁴Ya nə nda ɓwanya ngha, ngə dunəya ngya nda, aka a tsə'u nda nə dunəya wa, wi ngə kərɗa a da ya nə dunəya wa.

¹⁵“Gədi ɗa ja Ada, a da ka kə həbiya nda ku dunəya wa, kəl nda yo gədi nghə ka ga ka ɓəlatə nda tsa səɗimi.

¹⁶“Wi ngə a da ya nə dunəya wa, nanda tsə'u a da nda nə dunəya wa.

¹⁷Chinda nda ka ga nda ɗa ka nə ngha ku jiri, aka ɓwanya nghə jiri.

¹⁸Wi nda ka sətə ɗa shili tə dunəya, əngə tsəu yo sə nda gu dunəya.

¹⁹Aka nanda ya nənghə kərɗa ka kə mərtə ɗa karti, aka nanda tsəu nda ɗa ka nji'inda karti təwa jiri.

²⁰“Yo gədi, a da kəl ka nda wa, kəl ja, ma'a aka dəhə nji'inda tə na'a jiri təwa mafakə kənda.

²¹Ada, yo gədi nghə ka dəhə nda nda ɗa zhang. Wi ngə kə ku ya, naya tsəu aku ka, yo gədi ma'a nanda nda ngya aku ma. Aka ga njir dunəya nənyi jiri ənda naka sə ɗa.

²²Səli nda ka na'a, nacha ngə ya nənda ga nda ngya sə zhang wi ngə tə ma.

²³Naya ku nda, nakə tsəu aku ya, ga nda ɗa sə zhang tsa'anyata, ga dunəya zəndə naka sə ɗa, ka nyidatə nda tsəu wi nda ka nyidatə ɗa.

²⁴“Ada, kwa i ya nji'inə ka na'a na, nda ngya tsa'a na ya tangnda ya ti, kwa i ya nda la'a səli nda ka na'a, aka ko nyida ɗa təvi nja mər dunəya.

²⁵“Ada ndə tsa'atsa'a! Madangə a dunəya da kwa zəndə nghə wa, naya kwa zəndə nghə ya, nji'inə tsə'u a zəndətə nda ənda naka sə ɗa.

²⁶A chabiya nghə təya nənda, yo tsakətə chabiya nghə nənda səkəu, aka nyida nda ka nyida ɗa, cha ngya ku ɗufwa nda, naya təkərɗa tsəu yo ngya ku ɗufwa nda.”