Read nya huba Yohana 18 Bible Online

Yohana 18 - nya huba bible

Yohana 18

¹Ahir nda Yesu tə wur na pətlənya, ngə cha hya'atə ka shawa nyi inda ga tahəya dakə Kidron, ya fa da ləhə tangnda, ngə nda gu fa nda.

²Yahuda ndə nda tə tləɗanda Yesu nda kwa zəndə fa nda, aka zhaka ɗang tanyi Yesu kwa yi tangnda ka shawa nyi.

³Kəl Yahuda Iskərayoti tə nəuna ləvaləva ka njir ɓəla Mbwa'alə Hyel inda wawa'ar fərist ana njir Farisi tə sə yo fa nda, ana balmi kənda ana təkəsə na hu'u kwa.

⁴Nda Yesu wurtə zəndə sənda kwa ɗa na cha, ngə cha təra biyama, ga nar nda, “Wa nə hyo gwa'a?”

⁵Ngə da na, “Yesu Ndər Nazarat,” Ndə cha, “Naya na.” Jan Yahuda nda tləɗanda nyi ta'i kə'i nda.

⁶Ahir nda Yesu tə nar nda, “Na ya na.” Nda ɓəl tiyitiyi ga səya pəruɓu hu'i.

⁷Ngə Yesu tə jau nda səkəu, “Ya na ya, wa nə hyo gwa'a?” Ngə nda na, “Yesu Ndər Nazarat.”

⁸Ngə Yesu tə nar nda, “A nar hi təya, naya na. Ma cha naya nə hyo gwa'a, ngyar ma alenya nji'inə nda təra.”

⁹Sə'ingə tə ɗa ga cha nyabiya sənda Yesu tə na, “Ada, aku ba nji'inda ka na'a, mada zhang da sa kwa wa.”

¹⁰Shiman Bitrus ta'i na katsakər ku yimbilya cha, ngə cha tsəbiya ga katsənda himi nə chisəma mava gau fərist nda na tləm nyi Malkus.

¹¹Kəl ngə Yesu tə nar nyi nə Bitrus, “Ɓəlau katsakər nghə gu ki nyi! A da ka zəndə kəl naya sa ɓwaɓwatə nda Ada ɓatliya ka ya wa ya?”

¹²Kəl Ləvaləva nə njir Roma inda tangnda, ana wawa'a kənda ka njir ɓəla Mbwa'alə Hyel nə Njir Yahuda tə səya Yesu ga mbiya nyi.

¹³Ngə nda ghəya yi na cha huɗər vanya maləm dəgal tləm nyi Hanana, səlkənya Kayafa, nacha ngə gau fərist ku fa nda.

¹⁴Kayafa nga, nacha ngə ndə nda tə nar nyi nə wawa'ar njir Yahuda, “A ndiya tə vi ndə zhang ta aka dəhə nji.”

¹⁵Shiman Bitrus ana ndə zhang ku shawa inda tə nəu Yesu. Shawa nda, gau fərist kwa zəndə nyi kwaɗaɗakəu. Ngə cha təra gu ki gau fərist nda nanda ka Yesu.

¹⁶Bitrus nənyi cha ta'ita nyi biya nya nyaki. Ngə vanya shawa nda gau fərist kwa zəndə nda tə təra biya ga ɓwanya nə mala nda kwa ɓəla nyaki nda, ngə cha gwa na Bitrus.

¹⁷Ngə mala nda kwa ɓəla nyaki nda tə nar nyi nə Bitrus, “Nakə ya, a da zhang kə ku huɗa shawa ndə nə ma?” Ngə Bitrus tə na, “A da naya ngə wa.”

¹⁸Bəjir gyang cha, aka ənga mavi'i inda ka njir ɓəla Mbwa'alə Hyel inda tə gəɗətə hu'u nda kwa tləra. Kəl ngə Bitrus tə yi, nda kwa tlər hu'u nda dəhə nda.

¹⁹Ngə gau fərist nda tə jau Yesu a təkəra shawa nyi, ana chul sənda cho dlədləɓa nə nji.

²⁰Ngə Yesu tə na, “Mada sakamani tə babal yo ɓwanya nə nji, dəhə sənda ya dəka mada sakamani ku vi pətlənya ana mbwa'alə njir Yahuda, mbwa nda dəhə njo daɓə ti, a da yo dəkə madami tə ɗəuwa wa.

²¹Mya gwa'atə ko jau ɗa əna? Jawar nji'inda ngatə sənda ya pəa, aka a zəndətə nda sənda ya dəka.”

²²Ahir nda cha nar nda ənga, ngə vanya ləvaləva tangnda tə hya'ati ga zhau nyi chi nə Yesu ga nar nyi, “Əngə chul wum nda ko wum nə gau fərist ya?”

²³Ngə Yesu tə nar nda, “Macha ɓwanya ɗimi da tə biya ku nya ya, ka chabiya. Aa ya, ko dəgə ndə təkəra pə jiri ya?”

²⁴Ngə Hanana tə lətə nyi tə mba nə Kayafa gau fərist.

²⁵A tə bəji nda Shiman Bitrus ta'i kwa tlər hu'u, alenya nji tə jau nyi, “Nakə ya, zhang kə ku huɗa shawa ndə nə ya?” Kəl ngə Bitrus tə kəpal ga na, “A'a, a da ya kwa wa.”

²⁶Kəl jan vanya mava gau fərist njikə ndə nda Bitrus tə katsənda hima cha nda tə na, “A ya la'a hi ka ndə nə ku fa nda ma?”

²⁷Kəl Bitrus tə kəpal səkə ga na, “A'a, a naya ngə wa!” Təma vəgəm tə tiwi.

²⁸Nda nda hya'atə na Yesu a huɗər Kayafa, ngə nda təra na cha ya tə patla ngwamna njir Roma tsəɗakə mbudla. Kəl ja, nanda njir Yahuda inda da i yi gwa ku ki ngwamna njir Roma nda wa, tsa nda da səwandə kərnənda, aka bəjir səm sərsum nə bəjir Ladər Dləgəlnda kənda.

²⁹Kəl ngə Bilatus tə biya həya nda ga na, “A təkəra mi nə hyo wula ndə na?”

³⁰Ngə nda nar nyi, “Macha a ndə nə da ndər bikə wa, a da eo nda wula nyi nə nghə wa.”

³¹Kəl Bilatus tə nar nda, “Təra ma na cha ja, hya ki tlanda nyi nəuma wi sənda gadlagadla kəhi tə chari, ga hya mərtə nyi nəuma wi sənda hyo i!” Kəl njir Yahuda inda tə nar nyi, “A da ea na gyalkur tlanda nyi nəumar tə nə madawa wa.”

³²Sə'ingə dəhə tə ɗa aka ga nja nyabiya ba ɓwanya inda Yesu tə dəka təkəra laku nda cho da tə ti.

³³Kəl Bilatus tə ɓəl tanyi gwa, ngə cha nga Yesu ga nar nyi, “Nakə ngə təl njir Yahuda ya?”

³⁴Kəl Yesu tə na, “Ɓwanya kərnghə nə zəma, aa vanya ndə tə dəkar ngha?”

³⁵Ngə Bilatus tə na, “Maka fiya ya ndər Yahuda ya ya? A njikə hi ka wawa'ar fərist inga wula nghə na'a ma. Mi sənda mər ka?”

³⁶Yesu tə nar nyi, “Təlkur ɗa da nə dunəya nə wa. Macha təlkur ɗa nə dunəya nə cha, mada njir nəu ɗa kwa nda pa təkəra ya, atsa nja da nda chabiya ɗa nə wawa'ar Yahuda. Tsa'anyata, təlkur ɗa da nə dunəya nə wa.”

³⁷Ngə Bilatus tə na, “Əja ya, təl kə ya?” Yesu tə wuma, “Jangə ka nati, Təl ya, ya jiri ka, aka əngə nja yah ɗa. Əngə ya shili tə dunəya kari, aka ga ya dəkar jiri. Əngə ja, madawa ndə nda kwa i jiri, cho səhimi da kuraka ya.”

³⁸Bilatus tə nar nyi, “Sər mi ngə jiri nga?” Ahir nda Bilatus tə wur na ɓwanya nda, ngə cha biya dzər njir Yahuda inda, cha nar nda, “Naya səya bikər ndə nə wa.”

³⁹“Kəl ja, wi sənda ya tsəl na mər nə hi, ma bəjir Ladər Dləgəlnda tə ɗa yo dəliya hi zhang ku huɗa nji'inda ku jarum. Kwa i hi ya dəliya hi təl njir Yahuda ya?”

⁴⁰Kəl dəhə nda wuma ana kurakə dzəgam dzəgaməu, “A'a, a ndə ngə wa! Dəliya ea Barabas!” (Aka Barabas ndər fa'avi cha).