Read nya huba Yohana 19 Bible Online

Yohana 19 - nya huba bible

Yohana 19

¹Ngə Bilatus tə na nja biya dəgə Yesu na wuɗa.

²Ngə Ləvaləva inda pəɗətə pahuɗə mbakər shikəɗi ga mbanda nyi kər ni, ga handzə nyi vanya ləkutə lipəlalipəla.

³Ngə nda kwa shili da cha ana ɓwanya həyatəvi, nda kwa na, “Usi ja Aləvari, təl njir Yahuda.” Nda kwa dəgənyi təmatəma.

⁴Ngə Bilatus tə zəbiya səkəu ga nar nyi nə dlama nji'inda, “Jan yo biya na cha nə hi, ga hya zəndə a da ya uya nyi na vanya bikə nda tsa'aka njo tsəya nyi wa.”

⁵Ngə Yesu tə zəbiya tə babal, ana mbakər shikəɗi, ana ləkutə lipəlalipəla nda dzə nyi. Ngə Bilatus tə na, “Jan ma ndə nda!”

⁶Manda wawa'ar fərist inda, ka njir ɓəla Mbwa'alə Hyel tə la'a nyi ta'iu, kəl dəhə nda tə hya'andə kurakəu, nda kwa na, “Kukwanda nyi nji! Kukwanda nyi nji!” Kəl Bilatus tə nar nda, “Hətə nyi ma ja hya ki kukwanda nyi təkərnəhi. A naya uya bikə nyi na'a wa.”

⁷Ngə wawa'ar Yahuda inda tsakətə na, “Gadlagadla kəea chartə tuku nja tsəya nyi, aka cho nga kərnyi Zər Hyel.”

⁸Nda Bilatus tə ngatə ɓwanya nga, ngə ləvəra udə səya nyi.

⁹Ngə cha ɓəla ya dzər Yesu səkəu, ga nar nyi, “Hya'atə ma ka?” Kəl ja, a Yesu da ɓəlakə nyi wa.

¹⁰Ngə Bilatus tə nar nyi, “A ko ndər na'a wa ya? A da ko zəndə ənda gyalkur wuniya nghə ana gyalkur kukwanda nghə da tsa ya ma?”

¹¹Ngə Yesu tə wum nənyi, “Macha a Hyel da nənghə gyalkur wa, a sə da ko nau mərtə ɗa wa. Kəl ja, ndə nda tə shili naya nə ngha, ndəɗə nghə tə səpəla'a.”

¹²Nda Bilatus tə ngatə chul ngəna ɓwanya, kəl cha gwa'a lakur wuniya Yesu. Ngə njir Yahuda inda hya'andə kurakə səkəu, “Maka wuniya ndə ngə cha təra, a tsə'u kə bazhinya Kaisar wa! Aka madawa tə fiya kərnyi ka təl, ndər dawa Kaisar cha!”

¹³Nda Bilatus tə ngatə ɓwanya nga, ngə cha biya na Yesu ga ngyata nyi ku dzəga nəuma, tə vanya mbwa nda njo nga, “Hangu dzəɓdzəɓa[6].”

¹⁴Səngə tə ɗa vanya zəkə Ladər Dləgəlnda. Nda pəchi tə gi tangkər, ngə Bilatus tə nar nyi nə njir Yahuda, “Janə ma təl kəhi ja!”

¹⁵Kəl nda hya'andə kurakə səkəu, “Tsəya nyi nji! Tsəya nyi nji! Kukwanda nyi nji!” Ngə Bilatus tə wuma, “Kwa i hi ya kukwanda təl kəhi ja?” Kəl wawa'ar fərist inda tə wuma, “Vanya təl kəea da wa, kəl Kaisar!”

¹⁶Ahir nga, ngə Bilatus tə nənda Yesu ka nda kukwanda nyi. Ngə nda hətə Yesu ga təra na cha.

¹⁷Ngə nda biya na Yesu, Yesu na kərnyi kwa hə taməngəla nda ya tə vanya mbwa da njo nga pəpənghər kər (ana nya njir Yahuda njo nga Golgota)

¹⁸Tangnda nja kukwanda Yesu, ana alenya nji mətləu dzə nyi, zhang təwa chisəm zhang təwa matsal, ana Yesu tə ghada.

¹⁹Ngə Bilatus tə na nja tsəfətə gya kəra Yesu, “Yesu ndər Nazarat, Təl njir Yahuda.”

²⁰Njir Yahuda ɗang tə kəratsənti, aka mbwa nda nja kukwanda Yesu tə nda da naɗə tsa mələm wa. Nja tsəfətə na nya njir Yahuda, nya njir Roma, ba'a nya njir Heleni.

²¹Ngə wawa'ar fərist inda tə nar nyi nə Bilatus, “Ngwa ka da tsəfə, ‘Təl njir Yahuda wa,’ kəl nda ka tsəfəti, cha na, ənda Təl njir Yahuda cha.”

²²Kəl Bilatus tə wuma, “Sənda ya tsəfətə a ngya tə ənda.”

²³Ahir nda ləvaləva inda kukwanda Yesu, ngə nda fa'atə dzaki nyi, ga təkəbiya fwaɗəu, madawa na nənyi. Ngə nda hətə sər tul nyi nda nja tsatə hwatə ki ta'i ki, a mbə da təwa.

²⁴Ləvaləva inda tə nar nyi nə kərnənda, “Ngwa mən da tau nacha ngə wa, a mən ɓəlshiu təkər ga məna la'a ndara wa kwa həti.” Chul ngəna sə tə ɗa, aka ga ɓwanya likatəkatə Hyel nda nyabiyadza wi nda nja na, “Nda təkəya dzaki ɗa ku pama kərnənda ga ɓəlshiu təkəra sər tul ɗa.” Ya əngə ləvaləva inda tə məra.

²⁵Ləhə dzər taməngəla Yesu, jan ka ama nyi ta'iu ana kwamənya ama nyi, Maryamu mala Kiliyobas ana Maryamu Magdaliya.

²⁶Nda Yesu tə la'a ama nyi, ana vanya shawa nyi nda cho nyida tə ta'i tangnda ka ama nyi, kəl cha nar nyi nə ama nyi, “Ama, jan zər ngha.”

²⁷Ngə cha nar nyi nə shawa nda cho nyida nda, “Hətə nyi cha ɗa ka ama ngha.” Pəshi nda tanyi shawa nda cho nyida nda təra na amanya Yesu yo ki nyi.

²⁸Yesu zəndətə dəhə sə ɗatə ga wura, aka ga ɓwanya likatəkatə Hyel nyabiyadza, cha na, “Hili kwa təɗa.”

²⁹A tangnda vanya bəng da pwaɗə na ɓiti mwamwaləu, ngə nda chiu sawa kwa ga mbatə tə gəda ga hatə nyi gyo nya cha.

³⁰Ahir nda Yesu tə shishiɓətsə ɓiti nda, ngə cha na, “A wurti!” Ngə cha ngəya kəra cha ga biya pi.

³¹Səngə tə ɗa vanya zəkə Pəchir Ngyaməngya (aka Pəchir Ngyaməngya nda, pəchi dəgal cha nə njir Yahuda), ya a wawa'ar njir Yahuda nda do i nji'inda səkə tə Pəchir Ngyaməngya tə taməngəla wa, aka ənga nda gədi Bilatus ka nda ɓəɓəliya hya nda nja həya nda.

³²Ngə ləvaləva inda shili ga ɓəliya hya ndə tangərma nda nja kukwanda kə'i Yesu nda, ana nə vanyi ndə nda.

³³Kəl ja, manda shili təkəra Yesu, ngə nda la'a, a wurtə cha biya pi, aka ənga a da nda ɓəl hya cha wa.

³⁴Ngə ləvaləva zhang tə dzaviya nyi na masəu ku yimbilya cha, kuskustanyi kəl mashi ana chim tə biya ku dza cha.

³⁵Ndə nda la'a sənda tə ɗa nga dəkə ɓwanya nga, ya sənda dəkə cha jiri nga. Ya kərnyi zəndə sənda cho dəkə jiri, aka nahi ma'a hya nənyi jiri.

³⁶Sə'ingə tə ɗa tsəu, aka ga ɓwanya likatəkatə Hyel nyabiyadza, wi nda nja na, “Mada ɗəhi nyi zhang a da njo ɓəl wa.”

³⁷Aku vanya tsəfə likatəkatə Hyel tsəu nja na, “Nda kwa da ndzam ndə nda nda dzaviya nda.”

³⁸Ahir nga, Yusufu ndər Arimatiya, shawa Yesu nda kwa nəu nyi tə ɗəwa, aka ləvər njir Yahuda. Cha gədi laku tsa Bilatus, nja ngya nyi cha həya dza Yesu. Ngə Bilatus tə nənyi laku, ngə cha həya dza Yesu ga təra nə ki haɗa.

³⁹Nikodimus tsəu, ndə nda tə ɗaka shili da Yesu vu'i nda, cha shili na mal a təvəra pam gharəu, nda nja mər na Mur gwaɗəgwaɗə nyi na Alos.

⁴⁰Ngə nda hətə dza Yesu, ga pəndzə nyi inda shi'uni kwitkwitə ga baɗəu nyi ku pa'ua haɗə nə lilin, wi nda njir Yahuda kwa haɗə ndəu.

⁴¹Vanya fa da tangnda nja kukwanda nyi tə nda. Aku fa nda tsə'u, taɗər hu da nda a da nja ta haɗə ndə kwa wa.

⁴²Manda vanya zəkə Pəchir Ngyaməngya nə njir Yahuda, ya hu nda tsəu ləhə tanyi, ngə nda haɗiya Yesu kwa.