Read nya huba Yohana 2 Bible Online

Yohana 2 - nya huba bible

Yohana 2

¹Njo gha malakə vu mələm Kana, a tə hə'i Galili, ya amanya Yesu tə yi nda.

²A nar nyi tə nji nə Yesu ka shawa nyi tsəu,

³aku sakanda ɓitir anap tə wura, ngə amanya Yesu tə nar nyi, “A tsə'u ɓitir anap kənda da wa.”

⁴Ngə Yesu tə nar nyi, “Ama, manə ko nar ɗa sənga? Aka bəji ɗa da taa ɗa ka yo chabiya kərɗa wa.”

⁵Ngə amanya Yesu tə nar nyi nə mavi'i inda kwa mər tlər ladər nda, “Dəhə sə nda Cha nar hi, hya məra.”

⁶Tangnda giɗa wawa'a da kwah nda nja ɓatlətə ana hangu ga piya, nda kwa hətə gwashala wi fwaɗə fwaɗəu, nda njir Yahuda kwa maka chihi ana chi kwa təvi nda kwa həsəli.

⁷Ngə Yesu tə nar nda, “Nyandə ma giɗa ingə na ɓiti dəhəu.”

⁸Ahir nga cha nar nda, “Gətsə ma hya yi na nyi nə adar ladər.” Kəl nda gətsə ga yi ni.

⁹Nda adar ladər nda dləutsə ɓiti nda Yesu tə shandə ka ɓitir anap nda, cha ɗari paməu a da cha zəndə vi nda nja uyatə wa, kəl ja, mavi'i inda zəndəti, ngə cha ɓwanya na sal gambəl,

¹⁰cha na, “Madawa nja nga ka ladər, cho ghəya nə nda ɓitir anap nda məsəɗakəu. Ahir manda sa ga nyi, njo nda udiya na ɗimi nyi, janə nakə nəngha, ka fiya məsəɗakə nyi kəl sakana!”

¹¹Nənnə ngə tangərmar səshinshin nda Yesu tə məra, ya cha mər nyi avu Kana a tə hə'i Galili, ana əngə cha chabiya səli nda cha ni. Shawa nyi tsəu nda nənyi jiri.

¹²Ahir nda ladər nda tə wura cha hya'atə ga təra yi Kafarnahum nanda ka ama nyi, ka zamə nyi ana shawa nyi, nda yi hanyar pəchi kushə hinda.

¹³Sakanda bəjir ladər Dləgəlnda nə njir Yahuda kaɗa ɗa, kəl ngə Yesu tə hya'atə ga təra yi Urshalima.

¹⁴Nda cha gwa ku babal nə Mbwa'alə Hyel nda, cha həya alenya nji kwa ɗəlnda ka tla, ka kətəng, ka mbətla Masar, ana alenya nji tə ngya kwa bəlanda kwaba pampaməu.

¹⁵Kəl ngə cha ləmətə wuɗa nyi na pa ga gədləbiya nda ku mbwa'ala, ka tla inda, ka kətəng inda, ga uchinda kwaba nji'inda biya dəhə ka teɓər kənda.

¹⁶Ngə cha tsə njir ɗəlnda mbətla Masar inda, “Fa'abiya ma sə'ina, ngwa hya da shandə ki Ada ɗa, ka suku wa.”

¹⁷Ngə shawa nyi inda ɗənghatə ənda tsəfətsəfə nyi cha ku likatəkatə nə Hyel ənda, “Nyidar vi nghə kwa ndzəɗa ku ɗufwa ya 'ual'ualəu.”

¹⁸Alenya njir Yahuda tə wum ga nar nyi, “Səshinshin mi ko nau char ea, tsa'aka ea zəndə ənda gyalkur mər sə ingə da tsa ka?”

¹⁹Kəl Yesu tə wum ga nar nda, “Huɓənda ma mbwa'alə nga, aku hanyi makər yo hya'andi.”

²⁰Njir Yahuda tə na, “Mi! Fa fwaɗəkumənyi parnya kwah nja mər tə mbwar hər Mbwa'alə nga, nə ko na ya, aku hanyi makər tanyi ko nau hərta?”

²¹Kəl ja, mbwa'alə ngə Yesu tə ɓwanya təkər nga dza kərnyi nga.

²²Ahir nda Tlakə tə hya'andə Yesu ku hwa, kəl ɗəɗəu tanyi shawa nyi inda ɗənghatə Yesu nar nda tə ənga, kəl nda nənyi jiri ana sə nda likatəkatə Hyel tə na ana ɓwanya nda Yesu tə dəkar nda.

²³Sakanda Yesu vu Urshalima ka Ladər Dləgəlnda nə njir Yahuda nda, nji ɗang tə nənyi jiri nə tləm nyi aka səshinshin nda mər cha.

²⁴Kəl ja, a Yesu da dləukər na nda wa, aka a zəndətə cha sə nda ku ɗufwa nda,

²⁵A da cho gwa'a nja dəkarnyi sə təkəra nji wa, aka zəndətə cha sə nda ku ɗufwa ndəu.