Read nya huba Yohana 20 Bible Online

Yohana 20 - nya huba bible

Yohana 20

¹Tsəɗakə mbudla pəshir tangərmar hanyi ku suku, Maryamu Magdaliya tə təra ya tə hu nda tsəu vi shuɗshuɗəu, macha yi a dangəlnda tə nji hangu nda nja haɗətə nya hu nda ni.

²Kəl cha hwi yada Shiman Bitrus ana vanya shawa nda Yesu kwa nyida nda, cha nar nda, “A həbiya tə nji Tlakən mən ku hwa, ya a da ea zəndə mbwa nda nja ki fiya nyi tə wa!”

³Ngə Bitrus ana vanya shawa nyi nda tə biya ga təra ya tə hu nda.

⁴Kya'a nda ana hwi biya nda, kəl ja, vanya shawa nda tə ndiya Bitrus na hwi ga ghəya yi tə hu nda.

⁵Cha uzhi, cho ndzam gu hu nda, cha la'a kəl pa'ua lilin nda ba'a, kəl nda kərnyi da gwa wa.

⁶Səkardzə kushiu kəl jan Bitrus shili ti, ngə cha gwa ku hu nda, ma cha la'a kəl pa'ua lilin nda ba'a,

⁷ana sənda nja baɗənda kəra cha nə guvakəu təkətəkənyi na pa'ua lilin nda.

⁸Kəl shawa nda yi tangərma nda kərnyi tsəu, tə gwa ga la'a ga nənyi jiri.

⁹Aka ba'aka saka nga, a da nda ngabiya ənda likatəkatə tə na, tuku kəl na cha hya'atə ku hu wa.

¹⁰Ngə shawa inda ɓəl yo ki.

¹¹Tsə'u Maryamu ta'iu biyanya hu nda cho tiwi, tsə'u tanyi kwa tiwi ngə cha uzhi ga linghari gu hu nda,

¹²kəl cha la'a chama Hyel tsa'a mətləu ana sə pərtə dzən nda a tə ngya tə vi nda nja pinda Yesu tə nda, zhang ki təwa kəra cha, zhang səya təwa hya cha.

¹³Ngə nda nar nyi, “Malaka, mi ko tiwa?” Ngə cha na, “Tlakə ɗa ngə nja həbiya ku hwa, ya a da ya zəndə vi nda nja fiya nyi tə wa!”

¹⁴Ahir nda cha na ənga, macha sha kəl jan Yesu ta'iu, kəl ja, a Maryamu da zəndə ənda Yesu nda wa.

¹⁵Ngə Yesu tə nar nyi, “Malaka, mi ko tiwa? Wa nə ko gwa'a?” Maryamu tə har ndara tlakər fa nda nga, ngə cha nar nyi, “Saləu, macha nakə nga həbiya nyi, char ɗa vi nda ka pinda nyi ti, ga ya ki hətə nyi.”

¹⁶Ngə Yesu tə nar nyi, “Maryamu!” Ngə cha sha mbakəu ga nar nyi na nya njir Yahuda, “Rabboni!” Na cha ngə “Maləm.”

¹⁷Ngə Yesu tə nar nyi “Ngwa ka da tsəka ɗa wa, aka a da ya ta gya da Ada gwadagə wa, kəl nda ka təra ka ki nar nyi nə ka zamə ɗa inda, janə yo təra gya dzər Ada ɗa, Ada kəhi tsəu, Hyel ɗa, Hyel kəhi tsəu.”

¹⁸Kəl Maryamu Magdaliya tə hya'atə ga yada shawa nyi inda, cha nar nda, “A la'atə ya Tlakəu!” Ngə cha dəkar nda sənda Yesu tə nar nyi.

¹⁹Pəshi nda pəshir tangərmar hanyi ku suku a ba akəu, shawa nyi inda dəhə ku vi, nyavi dəhə tə haɗa aka ləvər njir Yahuda, kəl janə Yesu ta'i ku pama nda, ngə cha nar nda, “Piyarɗufə cha ngya tsa'a na hi.”

²⁰Ahir nda cha nar nda ənga, ngə cha char nda cha cha ana yimbilya cha. Ngə shawa nyi inda tə mər hirgyaɗi ana nda nda la'a Tlakən nda.

²¹Ngə Yesu tə nar nda səkəu, “Piyarɗufə cha ngya tsa'a na hi. Tang wi nda Ada tə sə ɗa, əngə tanyi tsəu yo sə hi.”

²²Nda cha nar nda ənga, ngə cha fəkə nda papa'akur ga na, “Dləutsə ma Shanguɗə Karti.

²³Dəhə ndə nda hya farbikə nyi, a fartə nji bikə nyi ndani. Madawa tsə'u a da hya farbikə nyi wa, a nji da farbikə nyi ndani wa.”

²⁴Toma (nda njo nga zər ɓəli) zhang cha ku huɗa nji kwabəmətlə inda, sakanda Yesu tə shili da shawa nyi inda a da cha ku pama nda wa.

²⁵Ngə alenya shawa inda tə nar nyi, “A la'atə ea Tlakəu!” Ngə Toma nar nda, “Ma a da ya la'a vir gədanya nda ku cha cha, ya fəu kwalyanghar cha ya ku vir gədanya nda, ana ku yimbilya cha wa, a da yo nənyi jiri wa.”

²⁶Ahir hanyi chisəu, shawa nyi inda ku vi səkəu, aku bəji nga nanda ka Toma. Ya nyavi kə nda tsa'a tə haɗa, kəl jan Yesu tə ta'i ku pama nda, ngə cha na, “Piyarɗufə cha ngya tsa'a na hi.”

²⁷Ngə cha nar nyi nə Toma, “Fəu kwalyanghar cha ka ku na, ndzamar cha ya i'i, hatə cha kə ka tsəkar yimbilya ya. Ngwa ka da ɗa kəla jiri wa, kəl nda ka ɗa ndər jiri.”

²⁸Ngə Toma nar nyi, “Tlakə ɗa, ana Hyel ɗa!”

²⁹Ngə Yesu tə nar nyi, “Kəl nda ka la'a ɗa ko dzəgwa na'a jiri ya? Njir papa'akur ngə nji'inda pa'ada la'a ɗa, ya nda na'a jiri!”

³⁰Yesu tə mər səshinshin pampaməu a tə lya ka shawa nyi, nda a da nja tsəfətə dəhə aku likatəkatə nə wa.

³¹Kəl ja, nja tsəfəbiya inən na, aka ga hya nənyi jiri ənda Yesu Kəristi ngə Zər Hyel, təwa nənyi jiri tsəu hyo uya pi nda ba'anawa aku Tləm nyi.