Read nya huba Yohana 21 Bible Online

Yohana 21 - nya huba bible

Yohana 21

¹Ahir nga, ngə Yesu tə tsakətə chabiya kərnyi nə alenya shawa nyi inda nya Fa'a dəgal nə Tibariyas. Jan ənda cha chabiya nda kərnyi.

²Shiman Bitrus ana Toma zər ɓəli nda, ana Natana'ilu ndər hə'i Kana ku Galili ana nguli Zabadi inda daɓə alenya shawa nyi tsa'a mətləu, dəhə nda a tə vir zhang.

³Ngə Shiman Bitrus tə nar nda, “Yo ki timi.” Ngə nda nar nyi, “A mər dəhəu.” Ngə nda biya ga gu param dəhə nda, kəl ja, əvu'i nda, a səda səya nda wa.

⁴Tsəɗakə mbudla, kəl jan Yesu ta'iu biya nya bam, kəl ja, a shawa nyi inda da zəndə ənda Yesu nda wa.

⁵Ngə Yesu tə nar nda “Nguli Tlakala, a uyatə hi kalfi ya?” Ngə nda na “A səda uya ea wa.”

⁶Ngə cha nar nda, “Sətə ma hiɗi kəhi ya təwa chisəma param nga, hyo uya kalfi.” Ngə nda sətə hiɗi nda, kəl ja, a da nda nau təɗətə shili wa, aka kalfi nyandə ti.

⁷Ngə shawa Yesu nda cho nyida nda tə nar nyi nə Bitrus, “Tlakən mən nga!” Nda Shiman Bitrus tə ngatə “Tlakən mən nga,” ngə cha handzə ləkutə nyi, aka tangərma cha səɗənda, ahir nga, ngə cha tləkəl gwatə ɓiti nda.

⁸Kəl ja, alenya shawa inda tə shili ku zər param, nda kwa təɗə hiɗi nda shili chaɓə na kalfi, aka a da nda naɗə tsa nya bam wa, wi jiga hi gharəu zhang tanyi.

⁹Manda nda biya nya bam, ngə nda la'a hahir hu'u ana kalfi ti, ba'a gwazhilakə dzəri.

¹⁰Ngə Yesu tə nar nda, “Anda ma na alenya kalfi aku ingə hya səya sakan nga.”

¹¹Ngə Shiman Bitrus tə dləgələu gu param nda ga təɗəbiya hiɗi nda biya nya bam, chaɓə na kalfi wawa'a gharəu na tufkumnyi parnya makərəu. Kəl ja, dəhə ka ɗanghəkura kalfi nda, a hiɗi nda da ta wa.

¹²Ngə Yesu tə nar nda, “Anda ma hya tlabiya nya hi.” Kəl ja, aku dəhə ba shawa nyi inda, a ndə zhang da tə mbiyahuɗə ga nar nyi, “Nakə wa nə wa.” Aka a zəndətə nda Tlakə nda.

¹³Ngə Yesu təkərnyi tə hətə gwazhilakə nda ga nənda; ngə cha nənda kalfi nda tsəu.

¹⁴Nacha ngə makərkunya bəji nda Yesu tə chabiya kərnyi a nə shawa nyi ahir nda cha hya'atə ku hwa.

¹⁵Ahir nda nda wur na səm sərsum nda, ngə Yesu tə nar nyi nə Bitrus, “Shiman zər Yohana, kwa nyida ɗa kə tsa'anyata ndiya nji'inə ya?” Ngə cha na “Ah, Tlakəu, a zəndə təka ənda yo nyida ngha.” Ngə Yesu tə nar nyi “nənyi sərsum nə kətəng ɗa.”

¹⁶Əsəkəu, Yesu tə nar nyi, “Shiman zər Yohana kwa nyida ɗa kə tsa'anyata ya?” Cha na “Ah, Tlakəu, a zəndətə kə ənda kwa nyida nghə ya.” Ngə Yesu tə nar nyi “Ɓəla kətəng ɗa.”

¹⁷Makərkunyi cha nar nyi, “Shiman zər Yohana, kwa nyida ɗa kə ya?” Ngə huɗa Bitrus tə tla təkəra makərkunya jau nda, “Kwa nyida ɗa kə ya?” Ngə cha na, “Tlakəu kwa zəndə kə sə dəhəu, ya zəndə təka ənda yo nyida ngha.” Ngə Yesu tə nar nyi, “Ɓəla kətəng ɗa.

¹⁸Vəlvəl yo nar ngha, sakanda kə tlakala, ko handzi nyi dzaki nə kərngha, ko ma'i ba nda kəra ka i ti, kəl ja, ku bəji nda ka halti ko har cha ka, ya vanya ndə pam kwa handzə nghə dzaki kwa ma'i nakə ba nda pa'a ko i ti.”

¹⁹Aku ɓwanya nyi, Yesu tə chari chulkə tə nda Bitrus kwa da tah, nda kwa hətə nyi səli nə Hyel. Ahir cha wur na ɓwanya, ngə cha na “Nəu ɗa!”

²⁰Nda Bitrus tə sha, ngə cha la'a shawa nda Yesu kwa nyida nda kwa nəu nda, (nacha ngə ndə nda tə dəhəndzə nyi kərnyi nə Yesu sakanda nda kwa səm sərsum ti ga jawa, “Tlakəu wa ngə kwa nda tləɗa nghə nga?”)

²¹Nda Bitrus tə la'a ndə nda, ngə cha na nə Yesu, “Tlakəu, aman ndə nənnə nənya?”

²²Ngə Yesu tə wuma, “Ma cha yo i cha ngya na pi kəl sakanda ya shili tə ya, mi nənghə kwa? Nakə nə ngha, tuku ko nəu ɗa!”

²³Aka ənga ɓwanya nga wiɗətədzə ku pama njir nəu Yesu inda, ənda shawa ngə do tə wa. Kəl ja, Yesu da na əngə wa, sənda na cha, “Ma cha yo i cha ngya na pi kəl sakanda ya shili ti, mi nənghə kwa?”

²⁴Na cha ngə shawa nda kwa ɓwanya tangna, ga tsəfəbiya dəhə səu, a zəndətə mən ənda ɓwanya nyi jiri.

²⁵Alenya sə da ɗanghəu, nda Yesu tə məra. Ma nja nda na njo tsəfəbiya dəhəu, yo hari, a dunəya da na vi nda kwa nau hətə likatəkatə kuranda wa.