Read nya huba Yohana 3 Bible Online

Yohana 3 - nya huba bible

Yohana 3

¹Vanya ndər Farisi da tləm nyi Nikodimus, maləm dəgal cha ku pama njirawawa'a Yahuda.

²Ngə cha shili da Yesu vu'i, ga nar nyi, “Maləm, a zəndətə ea nakə ngə ndə nda Hyel tə sə ka dlədləɓə nə ea. Aka a ndə da kwa nau mər səshinshin inə ka kwa mər nə wa, kəl ndə nda tsa'a na Hyel.”

³Kəl ngə Yesu tə wum ga nar nyi, “Vəlvəl yo nar ngha, ma a da nja ɓəla yabiya ndə təwa ɓiti ana Shanguɗə wa, a da cho nau gwa ku təlkur Hyel wa.”

⁴Ngə Nikodimus tə jawa, “Aman njo ɓəla yabiya ndə səkə ahir cha hala? Vəlvəl a cho nau ɓəl gu ta ama nyi aka nja yabiya nyi səkə wa.”

⁵Ngə Yesu tə wum ga nar nyi, “Vəlvəl yo nar ngha, ma a da nja ɓəla yabiya ndə təwa ɓiti ana Shanguɗə wa, a da cho nau gwa ku təlkur Hyel wa.

⁶Aka sənda tə biya ku kumur dza ndəu, ndə cha, kəl ja, sənda tə biya ku Shanguɗəu, Shanguɗə cha.

⁷Ngwa ka da mər məngəl ana ɓwanya ngə wa, aka ya nar ngha ‘Tuku kəl nja ɓəla yah nghə səkə wa.’

⁸Aka gyang kwa fi a ba nda cho i ti, kwa ngatə hi, kəl ja, a da hyo zəndə mbwa nda hya'atə cha tə ana ba nda cho ma'i tə wa. Əngə tanyi tsəu dəhə ndə nda Shanguɗə Hyel tə yabiya.”

⁹Kəl Nikodimus tə wum ga nar nyi, “Aman chul sə wi ngə kwa ɗa?”

¹⁰Ngə Yesu tə wum ga nar nyi, “Ma'a nakə nda maləm dəgal ku huɗa njir Isra'ila, a da ka nau zəndəbiya sə ngə wa?

¹¹Vəlvəl yo nar ngha, sənda ea zəndə nacha ngə sənda eo dəka, sənda ea la'a, na cha eo ɓwanya təkəri, kəl ja, ba'aka saka nga, a da hya nənyi jiri nə ɓwanya kəea wa.

¹²A ɓwanya tə ya nə hi təkəra sər dunəya a da hya nənyi jiri wa, aman hyo ɗana nda nənyi jiri ma ya ɓwanya təkəra sə'inda kya huɗamələma?

¹³Aka a ndə da ta gi huɗamələm wa, kəl ndə nda səya kya huɗamələm, nacha ngə Zər Ndəu.

¹⁴“Wi nda Musa tə hya'andə nda pwabu kwa takəu, tuku tsəu kəl nja hya'andə Zər Ndəu.

¹⁵Aka madawa tə nənyi jiri cho uya pi nda ba'anawa.

¹⁶Aka Hyel tə nyida dunəya gagaɗa, ngə cha sətə Zər nyi yayanyi zhang tanyi aka dəhə ndə nda tə nənyi jiri a da cho tə wa, kəl nda cho uya pi nda ba'anawa.

¹⁷Aka Hyel da tə sə Zər nyi shili tə dunəya ka ga cha tlanda nyi nəuma nə dunəya wa, kəl nda ga dunəya uya mbəɗa təwa nyi.

¹⁸“Dəhə ndə nda tə nənyi jiri, a tsə'u nəumar Hyel da təkəra cha wa, kəl ja, ndə nda pa'a tə nənyi jiri, tlakə nyi wurtə gwa ku nəumar Hyel, aka a da cha nənyi jiri nə Zər Hyel wa.

¹⁹Jan ənda nəuma ngə kwa ɗa, vicham tə shili tə dunəya kəl nda nja ndiya i kutla tsa vicham aka tlər kənda ɗimi.

²⁰Dəhə nji'inda kwa mər səɗimi ngyar tə nda vicham ya a da nda kwa shili ku vicham wa, aka nda kwa ləvər tsa tlər kənda da biya tə babal.

²¹Kəl ja, dəhə ndə nda kwa mər sə nda jiri, cho shili ku vicham, aka nja la'atə babal sə nda cha kwa məra kwa shili na səli nə Hyel.”

²²A hir nga Yesu ka shawa nyi inda təra ya tə hə'i Yahudiya, cha hanyar pəchi ka nda hinda cho mər baɓtisma nə nji.

²³Kərnya Yohana tsəu kwa mər baɓtisma ku Ainon nda ləhə dzər Salim aka ɓiti da tangnda dlum tanyi, ya nji ɗang kwa yi da cha ka cha mərtə nda baɓtisma.

²⁴Aku bəji nda a da nja ta fəu Yohana ku jarum wa.

²⁵Kəl kəpal tə gwa ku pama shawa Yohana ana vanya ndər Yahuda təkəra chinda dza wi nda tsaubar kənda tə chari.

²⁶Aka ənga nda shili da Yohana ga nar nyi, “Maləm, kwa ɗənghatə kə ndə nda hinə biya tə ya dəl Urdun nda ka ɓwanya təkər nda ya? Yau, wula cho mər baɓtisma madawa kwa yi da cha.”

²⁷Ngə Yohana tə wum ga na, “A ndə da kwa nau dləutsə madami wa, kəl ndə nda Hyel tə nənyi.”

²⁸Nahi təkərnəhi ma'a zəndətə hi ənda ya na a da naya ngə Kəristi wa, kəl ja, nja sə ɗa ka ga ya shili tangərma.

²⁹Ndə nda hə mala nacha ngə sal gambəl. Bazhinya sal gambəl nacha nənyi kəl səhimi da sal gambəl, cho mər hirgyaɗi ana ngatə kuraka sal gambəl. Aka ənga hirgyaɗi ɗa nyabiya tə dza.

³⁰Tuku cho tsaka naya tsəu tuku yo təuta.

³¹“Ndə nda səya kya huɗamələm a ndiya tə madawa. Ndə nda ku dunəya nə dunəya cha ɓwanyar dunəya cho dəka. Ndə nda kwa səya kya huɗamələm a ndiya tə madawa.

³²Sənda ngatə cha ana sənda la'a cha nacha cho dəka, dəhə ka ənga, a ndə da tə dləukər ɓwanya nyi wa.

³³Kəl ja, dəhə ndə nda tə dləutsə ɓwanya nyi a dləukərtə cha ənda Hyel ndər jiri nga.

³⁴Aka ndə nda Hyel tə səa, ɓwanya Hyel tlakə nyi kwa dəka, aka Hyel kwa nənyi Shanguɗə nyi, a ɓələnyi da wa.

³⁵Ada kwa i Zər nyi, ngə cha tsau nyi dəhə səu ku cha cha.

³⁶Madawa tə nənyi jiri nə Zər cho uya pi nda ba'anawa. Kəl ja, dəhə ndə nda pa'a kwa la'a səlir Zər, a cho uya pi wa, aka ənga huɗətlar Hyel ngya tə təkəra cha ba'anawa.”