Read nya huba Yohana 4 Bible Online

Yohana 4 - nya huba bible

Yohana 4

¹Njir Farisi tə ngatə ənda nji ɗang kwa shili da Yesu matsa Yohana, ya cho mər baɓtisma nə nda.

²Madangə a Yesu tə kərnyi da mər baɓtisma wa, kəl shawa nyi ingə kwa məra.

³Nda Yesu tə ngatə ənga cha hya'atə vu Yahudiya, ga ɓəl yi Galili.

⁴A tə lakur yi Galili tuku cho təra tahə Samariya.

⁵Cha shili ku vanya mələm tləm nyi Saikar aku hə'i Samariya ləhə dzər mbwa nda Jakop tə ɗaka nənyi nə zər nyi Yusufu.

⁶Ka'ur ɓiti sa nə Jakop da tangnda, ya Yesu həɗatə na ma'i, ngə cha yi ngyata nyi anya nya cha. Səngə tə ɗa pəchi tangkər.

⁷Vanya mala Samariya kwa shili ka gə ɓiti, ngə Yesu tə nar nyi, “Ɗaɗa ɓiti ya satsi.”

⁸Aku bəji nda shawa nyi dəhə təratə gu ta mələm ki ɗəl sərsuma.

⁹Kəl mala nda wum ga nar nyi “Aman nakə ndər Yahuda kwa gədi ɓiti sa tsa ya, naya nda kwa Samariya?” (Aka njir Yahuda do səm sə ku shala zhang ka njir Samariya wa).

¹⁰Kəl ngə Yesu tə wum ga nar nyi, “Ma cha kwa zəndə kə ga'ar Hyel ana ndə nə kwa nar nghə, ɗaɗa ɓiti ya satsə na, nakə na kərngha ma'a ko gədi ɓiti tsa cha, na cha tsəu cho nənghə ɓitir pi.”

¹¹Kəl ngə mala nda nar nyi “Maləm, a sər gə ɓiti da tsa kə wa, ka'u nə tsəu ndzuɗakəu, aman ko uya ɓitir pi nga?

¹²Ka ndiya adan ea Jakop ya? Nda ngya ea na ka'ur ɓiti na, nda nacha təkərnyi ana sərshishi nyi dəhə tə sa kwa ya?”

¹³Yesu tə wum ga nar nyi, “Madawa tə sa ɓiti na hili kwa ɓəla tə nyi.

¹⁴Kəl ja, madawa tə satsə ɓiti nə yo nənyi na, a tsə'u cho ngatə hili səkə wa, aka chul ɓiti ngə yo nənyi nga kwa ngya wi tsədzəɗə nə ɓiti ku cha, nda kwa shili na nyi pi nda ba'anawa.”

¹⁵Mala nda nar nyi, “Maləm! Ɗaɗa ɓiti nga, tsa yada ɓəla ngatə hili, məlna a tsə'u yo shili gə ɓiti nə wa.”

¹⁶Kəl ngə Yesu tə nar nyi “Ma'i ka ki shili na sal ngha.”

¹⁷Ngə mala nda wum ga nar nyi, “A sal da tsa ya wa,” Ngə Yesu tə nar nyi “Jiri ngə pə ka a da kə na sal wa,

¹⁸Aka shili nghə tufu ɗaka ɗa, ya nəkə nə sakanə na, a da sal nghə ngə wa. Aka ənga, pətə kə jiri.”

¹⁹Ngə mala nda nar nyi “Maləm, nənghə təya jiri ga zəndəbiya ənda nakə ndər mətakər ka.

²⁰Ajin ea ɗaka tə həsəli nə Hyel a kyo mə na, ngə nahi njir Yahuda tə na bəra kəl vu Urshalima njo kina həsəli nə Hyel.”

²¹Kəl Yesu tə nar nyi “Malakəu, na'a jiri, aka bəji kwa nda shili, a tsə'u nji kwa həsəli nə Ada mada a kyo mə nga, ana avu Urshalima wa.

²²Nahi njir Samariya hyo həsəli nə sə nda pa'a hya zəndi, kəl ja, naea njir Yahuda eo həsəli nə sənda ea zəndi, aka dləuya təwa njir Yahuda shili cha.

²³Kəl ja, bəji kwa shili, ya shili tə ma'a sakana, nda njir həsəli nə jirijiri kwa həsəli nə Ada wi ngə cha nga, njo həsəli nənyi na jiri wi nda cho i.

²⁴Aka Hyel ana kərnyi Shanguɗə cha, njir həsəli nənyi tsəu, tuku nda həsəli nənyi ku Shanguɗə ana jiri.”

²⁵Kəl mala nda tə nar nyi, “A zəndətə ya Kəristi kwa shili, nacha ngo ɗa ka Ndər Dləuya, ma cha shili, cho dəkəbiya ea dəhə səu.”

²⁶Ngə Yesu tə nar nyi, “Naya nə kwa ɓwanya nakə na, naya ngə Kəristi.”

²⁷Aku bəji nda, shawa Yesu inda shili ti, kəl nda mər məngəl na cha ənda cho ɓwanya na malakəu. Kəl ja, a ndə da ku pama tə nau nar nyi ənda “Mi ko gwa'a? Ətsəu a ndə da nau jau nyi ka mi ko ndər na mala ngə wa.”

²⁸Kəl ngə mala nda ngyar shala gwadəl nyi nda, ga ɓəl gu mələm, ga gwa nar nyi nə nji,

²⁹“Anda ma hya la'a vanya ndə nda tə dəkəbiya ɗa dəhə sənda ya ɗaka məra. Kwa nau cha ɗa ka Kəristi ya?”

³⁰Kəl ngə nji tə biya ku mələm ga yada Yesu.

³¹Aku bəji nda, shawa Yesu tə gədi nyi “Maləm, səm sərsuma.”

³²Ngə cha nar nda, “Naya, sərsum da tsa ya, kəl nda a da hyo zəndə sə təkər wa.”

³³Kəl shawa nyi inda ghəya jau kərnənda, aa vanya ndə tə nda shili na nyi sərsum ya?

³⁴Ngə Yesu tə nar nda, sərsum ɗa nacha ngə ya nyabiya sə nda ndər sə ɗa kwa i, ana ya mərtə tlər nda cha na'a.

³⁵Nja kwa na, ənda həyadzə hya fwaɗəu fwakə kwa ɗa. Ya yo nar hi, ndzam ma fa i, sə zwazwa ɗatə ka məra.

³⁶Ndər mər kwa uya zhar nyi, cho tsəməu sə zwazwa ya ku pi nda ba'anawa, aka ndər tləka ana ndər məra nda mər hirgyaɗi kya'a nda.

³⁷Ɓwanya ngə nji kwa na ənda, “Vanya ndə kwa tləka, vanyi kwa mər nga, jiri nga.”

³⁸Naya ngə tə sə hi, aka hya mərəya sənda pa'a hya sa ɓwaɓwatər tləka. Pam nji'inda tləka, ya jan hya uyatə zhar tləka kənda.

³⁹Njir Samariya ɗang ku mələm nda tə nənyi jiri aka ɓwanya mala nda, abəra, “Cha dəkəbiya ɗa dəhə sənda ya ɗaka məra yahi.”

⁴⁰Nda njir Samariya tə shili da cha ga ngatə ɓwanya nyi, ngə nda gədi nyi ka ga cha hanyar pəchi kə'i nda. Ngə cha hanyi mətlə tanyi kə'i nda.

⁴¹Nji ɗanghə tə nənyi jiri səkəu, nda nda ngatə ɓwanya nyi.

⁴²Ngə nji'inda nar nyi nə mala nda, sakan ja a nənyi tə ea jiri a da kəl ka ɓwanya nghə wa, aka naea təkərnəea ma'a hima ea ngatə ti, ya a zəndətə ea nacha ngə Ndər Dləuya dunəya.

⁴³Ahir hanyi mətlə nda, ngə cha hya'atə ga təra ya tə hə'i Galili.

⁴⁴(Aka Yesu na kərnyi tə na ənda, “Ndər mətakər Hyel da na səli ku mələm nyi wa.”)

⁴⁵Nda cha ya tə hə'i Galili, kəl njir Galili tə dləutsə nyi ana hirgyaɗi, aka a la'atə nda sənda cha mər vu Urshalima aku bəjir Ladər Dləgəlnda, aka dəhə nda tangnda ku bəji nda.

⁴⁶Cha ɓəl səkə shili Kana tə hə'i Galili, tangnda cha ɗaka shandə ɓiti tə ɗa ka ɓitir anap nda. Ləhə dza Kana aku mələm Kafarnahum, vanya ndə təltəl da ana zər nyi na shiləka.

⁴⁷Ahir nda ndə nda ngatə ənda Yesu ngyar tə hə'i Yahudiya ga ɓəl shili Galili, cha yi gədi nyi ga cha shili mbandə zər nyi, aka aku pama pi na tə cha.

⁴⁸Kəl ngə Yesu tə nar nyi, “Aka nahi, ma a hya la'a sər muniya ana sər məngəl wa, a da hyo na'a jiri wa.”

⁴⁹Kəl ngə ndə təltəl nda tə nar nyi, “Tlakəu, maki anda təvi zər ɗa tah.”

⁵⁰Ngə Yesu tə nar nyi “Ma'i, zər nghə kwa mbəa.” Ngə ndə nda tə nənyi jiri nə Yesu təkəra ɓwanya nyi nda ga təra.

⁵¹Atə lakur ɓəl kyo ki, ngə mavi'i nyi tə ɓə nacha, ngə nda nar nyi, zər nda mbəti.

⁵²Ngə cha jau ndara a tə bəji aman zər nga mbəa, ngə nda wum ga nar nyi ənda, “Ənah saka zhang nə pəchi cha mbə na gyang nda.”

⁵³Təma Ada nyi tə ngabiya, tang tə bəji nda ngə Yesu tə nar nyi “Zər nghə kwa mbəa,” kəl ngə dəhə nda ka ki nyi tə nənyi jiri.

⁵⁴Nənnə ngə mətləkunya səshinshin nda Yesu tə məra, ahir nda cha hya'atə vu Yahudiya ga ya tə hə'i Galili.