Read nya huba Yohana 6 Bible Online

Yohana 6 - nya huba bible

Yohana 6

¹Ahir nga Yesu tə təra biya tə ya fa'a Galili nda njo nga fa'a Tibariyas.

²Kəl dlama nji tə nəu nyi, aka a wurtə nda la'a səshinshin nda cha mər təkəra njir shiləka.

³Bəjir Ladər Dləgəlnda nə njir Yahuda kaɗa ɗa ləhəu. Ngə Yesu tə təra gyo məa, ga gi ngya ka shawa nyi.

⁵Nda Yesu tə har kəra cha, ngə cha la'a dlama nji kwa shili da cha, kəl cha nar nyi nə Filibus, aman məno uya sərsum ka nji na səma?

⁶Cha na ənga aka cha dzə nyi, aka zəndətə cha sənda cho məra.

⁷Ngə Filibus tə nar nyi, mada sərsum tlər wazəba nə hya chisəu[2] a da kwa nji ka madawa uya kushkush ku cha cha wa!

⁸Kəl vanya ndə zhang ku huɗa shawa nyi inda na tləm nyi Andrawus zamənya Shiman Bitrus, tə nar nyi,

⁹“Jan zər duwal da tangna, ana takwara tufu ba'a kalfi mətlə tsa cha. Kəl ja ya, mi cho nau mərtə nyi nə nji ɗang wi na?”

¹⁰Ngə Yesu tə na, “Nar nyi ma nə nji inga nda ngya.” A tangnda sar da fəllapəu, aku huɗa nji'inda ngya nda, ba shili tanyi dəbu tufu.

¹¹Yesu tə hətə takwara inda, ngə cha mərtə nyi usaku nə Hyel, cha təkənda nyi nə nji'inda tə ngya inda. Əngə tsəu cha mər na kalfi inda, madawa tə uya sənda tə nji nyi.

¹²Ahir nda nda səm ga nyi, cha nar nyi nə shawa nyi, “Tsəmtə ma sə nda həyadza, tsa cha da kikila.”

¹³Madawa tə səm ga nyi, ngə nda tsəmtə sə nda həyadza ku takwara tufu nda, tsəla kwabəmətləu.

¹⁴Ahir nda madawa tə la'a səshinshin nda cha məra, ngə nda na, “Vəlvəl ndə na, ndər mətakər Hyel nda kwa shili tə dunəya nda na.”

¹⁵Nda Yesu zəndətə ənda nda kwa gwa'a mbanda nyi kər təlkur na tuku, ngə cha ɓəl tanyi gyo mə zhang tanyi.

¹⁶Nda akə tə ɗa, ngə shawa nyi inda təra gwa nya fa'a dəgal nda.

¹⁷Ngə nda gwa ku param, aka ga nda dləgəlbiya fa'a nda, ka nda yi Kafarnahum. Aku bəji nda, kutla ɗa ti, ya a Yesu da ta shili dzən nda wa.

¹⁸Ngə gyang tə ghəya sə 'ual'ual ga hya'andə ɓiti nda.

¹⁹Nda shawa nyi inda tə mər ma'i kwa ɗa myal makər ndara fwaɗəu, ngə nda la'a Yesu kwa ma'i tə ɓiti, nda cho shili ləhə dzər param nda, ngə ləvər tə səya nda.

²⁰Kəl ja, cha nar nda naya na, ngwa hya da ləvər wa.

²¹Ahir nga, ngə nda dləukəri ngə nda fəunyi gu param nda. Kuskustanyi, kəl jan nda biyanya bam mbwa nda nda kwa gwa'a ya tə nda.

²²Həyadzər dlama nji'inda biya nya fa'a Tibariyas nda tə la'a kəl param zhang tanyi tangnda. Ya a zəndətə nda Yesu da gwa ku param nda ka shawa nyi tə gwa kwa nda wa, kəl ja, na nda səkənda tə təra.

²³Alenya param da vu Tibariyas, tə shili ləhə dzər vi nda dlama nji tə səm sərsum nda Tlakə Yesu tə mərtə nyi usaku nə Hyel tə kər nda.

²⁴Manda dlama nji'inda tə la'a Yesu ka shawa nyi da tangnda wa, ngə nda gwa ku param inda ga təra yi Kafarnahum ki gwa'a Yesu.

²⁵Nda həya nyi hinda, ngə nda jau nyi, Maləma, nawa shili kə tangna?

²⁶Yesu tə nar nda, “Vəlvəl yo nar hi a da aka hya ngabiya səshinshin ingə nə hyo gwa'a ɗa wa, kəl nda aka hya səm sərsum ga nyi ni.

²⁷Ngwa hya wendə kərnəhi tə vir gwa'a sə'inda kwa səuwa wi ka sərsum wa, kəl ja, hya gwa'a pi nda ba'anawa nda Zər Ndə kwa nə hi. Aka nacha ngə ndə nda Ada Hyel, tə tsau nyi gyalkur mər ənga ku cha cha.”

²⁸Ngə nda jau nyi, “Mi sənda eo mər ka ga ea nau mər chulkə tlər inda Hyel kwa ea?”

²⁹Ngə Yesu tə wum ga nar nda, “Tlər nda Hyel kwa i, nacha ngə hya nənyi jiri nə ndə nda cha səa.”

³⁰Ngə nda jau nyi, “Chulkə səshinshin manə ko mərtə ea la'a, ga ea nənghə jira? Manə ko məra?

³¹Aka jival kəea tə səm Manna nda səya kya huɗamələm kwa takəu, wi nda nja tsəfəbiya, ‘Musa tə nə nda sərsum nda səya kya huɗamələm nda səma.’ ”

³²Ngə Yesu tə nar nda, “Vəlvəl yo nar hi, a Musa ngə tə nə hi sərsum nda səya kya huɗamələm wa, Ada ɗa ngə ndə nda kwa nə hi sərsum nə pa'apa'anyi nda səya kya huɗamələm.

³³Aka sərsum nda kwa səya kya huɗamələm nacha ngə nda Hyel tə səa ga cha nənyi pi nda ba'anawa nə dunəya.”

³⁴Ngə nda nar nyi, “Maləm, nə ea chul ngəna sərsum wa'atanyi.”

³⁵Yesu tə nar nda, “Naya ngə sərsum nə pi, madawa tə shili da ya, a tsə'u huɓə da kwa tənyi ba'anawa wa, madawa tsəu tə na'a jiri, a tsə'u hili da kwa tənyi pa'a wa.”

³⁶“A nar hi təya, ya a la'a ɗa təhi, kəl ja, dəhə ka ənga a hya na'a jiri wa.

³⁷Dəhə ndə nda Ada na'a, cho shili da ya, ya madawa tə shili da ya tsəu, a yo gədlə nyi wa.

³⁸Aka ya səya kya huɗamələm, a da ka ga ya mər sənda kərɗa kwa i wa, kəl nda ka ga ya mər sənda ndə nda tə sə ɗa kwa i.

³⁹Sə nda ndə nda tə sə ɗa kwa chima nacha ngə ngwa yada wunənda mada zhang aku ba nji'inda cha na'a wa, kəl nda ya hya'andə nda yo pi nda ba'anawa bəji ngə zəkəu.”

⁴⁰“Aka sə nda Ada ɗa kwa i nacha nga, dəhə ndə nda kwa ndzam Zər Hyel ga nənyi jiri, cho uya pi nda ba'anawa, ya yo da hya'andə nyi bəji ngə zəkəu.”

⁴¹Ngə njir Yahuda ghəya huhuni təkəra cha, aka cha na, “Naya ngə sərsum nda səya kya huɗamələm.”

⁴²Təma nda na, a Yesu nə wa ya, zər Yusufu, nda ama nyi ana ada nyi kwa zəndə mən. Aman ngə cho na abəra, “Kya huɗamələm səya ya?”

⁴³Ngə Yesu tə nar nda, “Ngyar ma huhuni ku pama kərnəhi.

⁴⁴A ndə da kwa nau shili da ya wa, kəl nda Ada nda sə ɗa tə mbəlatə nyi shili da ya, na ya tsəu yo da hya'andə nyi bəji ngə zəkəu.

⁴⁵Zhang ku huɗa njir mətakər Hyel tə tsəfətə ga na, ‘Dəhəkura nda Hyel təkərnyi ngo dlədləɓə nə nda.’ Aka ənga, madawa ndə nda tə səndzə himi da Ada ga dlədləɓə tsa cha, cho shili da ya.

⁴⁶A vanya ndə da ta la'a Ada wa, kəl ndə nda səya kya da Hyel, kəl na cha ngə ndə nda tə la'a Ada.

⁴⁷“Vəlvəl yo nar hi, madawa tə nənyi jiri, pi nda ba'anawa tsa cha.

⁴⁸Naya ngə sərsum nə pi.

⁴⁹Jival kəhi səm tə manna kwa takəu, ya a kuɗətə nda.

⁵⁰Kəl ja, jan sərsum nda səya kya huɗamələm, nda ma ndə nda səma, a cho tə wa.

⁵¹Naya ngə sərsum pi nda səya kya huɗamələm, madawa tə səm chul nawa sərsuma, cho ngya ba'anawa. Sərsum ngə yo nə hi nga, kumər dzaya nga, aka ga dunəya uya mbəɗa.”

⁵²Kəl njir Yahuda tə hya'andə kəpal ku pama kərnənda, nda kwa na, “Aman ngəna ndə kwa nau nə mən kumər dza cha ka məna ɗəa?”

⁵³Ngə Yesu tə nar nda, “Vəlvəl yo nar hi ma a hya ɗə kumər dza Zər Ndə ga satsə mashi nyi wa, a da hyo uya pi nda ba'anawa wa.

⁵⁴Madawa tə ɗə kumər dza ya ga satsə mashi ɗa, cho uya pi nda ba'anawa. Ya yo nda hya'andə nyi bəji ngə zəkəu

⁵⁵Aka kumər dza ya sərsum cha, mashi ɗa tsəu sər sa cha tsa'anyata.

⁵⁶Madawa tə ɗə kumər dza ya ga satsə mashi ɗa, tlakə nyi aku dza ya cha, naya tsəu aku dza cha ya.

⁵⁷Wi nda Ada nda na pi tə sə ɗa, ya yo ngya aka Ada, əngə tanyi tsəu ndə nda tə fiya ɗa ka sərsum nyi cho ngya ka ya.

⁵⁸Jan sərsum nda səya kya huɗamələm. A da chulkə nda jival kəhi tə səm ga kuɗənda wa, kəl ja, dəhə ndə nda tə səm chul sərsum na, cho ngya na pi nda ba'anawa.”

⁵⁹Yesu tə pə ɓwanya inga sakanda cho dlədləɓə ku vi pətlənya vu Kafarnahum.

⁶⁰Ɗang ku huɗa shawa nyi nda nda ngatə ənga, kəl nda na, chulkə ɓwanya nga tədəɓəu, wa kwa nau dləukəra?

⁶¹A ndə da tə dəkar nyi wa, Yesu təkərnyi a zəndətə ənda shawa nyi inda kwa huhuni təkəra ngə na ɓwanya, ngə cha nar nda, “Ɓwanya ngə ɗatə wi bikə nə hi ya?

⁶²Aman ma hya la'a Zər Ndə kwa təra gya huɗamələm gyatə mbwar ngya nyi nda parangha?

⁶³Shanguɗə papa'a ngə kwa fəu pi ya a sakədar kumər dzə da wa. Ɓwanya ingə ya dəkar hi nga shanguɗə papa'a nga, ya pi nga.

⁶⁴Ya ba'a sakana alenya nji'inda ku huɗa hi a da ta na'a jiri wa. Yesu tə na ənga aka ɗəɗəm zəndətə cha nji'inda pa'a tə nə nyi jiri ku huɗa nda ana ndə nda kwa da tləɗa nyi.

⁶⁵Kəl cha tsakətə nar nda, nacha ngə sə nda gwa'atə ya dəkar hi, a ndə da kwa nau shili da ya təkərnyi wa, kəl ndara ma Ada tə i nyi ni.”

⁶⁶A təkəra nga, ɗanghə ku shawa nyi inda tə ɓəla yahi, a da nda zhaka ma'i ka cha wa.

⁶⁷Kəl Yesu tə jau shawa kwabəu mətlə inda, “Nahi tsəu ya, kwa i hi ma'a nahi hya ɓəl tahi ya?”

⁶⁸Ngə Shiman Bitrus tə wum nənyi, ga na, “Tlakəu, a kya da wa ea? Nakə ngə ndə nda na ɓwanyar pi nda ba'anawa.

⁶⁹Nənyi tə ea jiri ga zəndə ənda nakə ngə ndə Karti nə Hyel.”

⁷⁰Ngə Yesu tə wum nə nda, “A naya na ɗəmtsə hi kwabəmətlə ma? Dəhə ka ənga zhang ku pama hi sərtakəu.”

⁷¹Cho ɓwanya təkəra Yahuda zər Shiman Iskərayoti, aka na cha ngə ndə nda kwa da tləɗa nyi, madangə zhang cha ku huɗa kwabəmətlə inda.