Read nya huba Yohana 8 Bible Online

Yohana 8 - nya huba bible

Yohana 8

¹Ahir nga Yesu tə təra gyatə Dəgəl Zaitun.

²Tsəɗakə mbudla, cha səya ga gwa səkəu ku Mbwa'alə Hyel. Nji ɗang tə tsəmtədza, ngə cha ghəya dlədləɓə nə nda.

³Ka maləm gadlagadla ana ka njir Farisi tə shili na vanya malakə nda səya kwa mər kasalikur. Ngə nda ta'ində nyi aman nda,

⁴ga nar nyi nə Yesu, “Maləm, mala na, nja səya nyi cho mər kasalikur takwaɗəu.

⁵Aku gadlagadla kəea, Musa tə na, ‘Tuku chul ngə na mala nja vəvakənda nyi na hangu cha tah,’ mi ka na nə ngha?”

⁶Nda pə ənga ga nda ngəya nyi ləbam, aka ga nda uya nyi na bikəu. Kəl ja, Yesu tə uzhi cho tsəfa na kwalyanghar cha cha a hu'i.

⁷Nda nda uftənyi na jawa, ngə cha hya'atə ga nar nda, “Ndə nda zəndə a bikə da tsa cha wa, cha ɗa ka tangərmar ndə nda kwa ghəya vakə nyi na hangu.”

⁸Ngə cha uzhi səkəu cho tsəfa a hu'i.

⁹Ma nda nda ngatə ənga, ngə nda təra, kər zhang kər zhang, ghəya tə dəgal kənda ga ngyar kəl Yesu ana mala nda ta'iu.

¹⁰Ngə Yesu tə hya'atə ga jau nyi, “Malaka, aman nda? A ndə da tə nau tlanda nghə nəuma ma?”

¹¹Ngə cha na, “Tlakəu, a ndə da wa.” Ngə Yesu tə nar nyi, “Naya tsə'u a da ya tlanda nghə nəuma wa, ma'i tanghə ja, ngwa ka tsəu tsakətə mər səpəla'a wa.”

¹²Yesu tə tsakətə ndər nə nda səkəu, “Naya ngə vichamər dunəya, ma ndə nda tə nəu ɗa, a da cho ma'i ku kutlə wa, kəl nda cho uya vicham nda kwa chabiyanyi lakur pi.”

¹³Ngə njir Farisi tə nar nyi, “Sakanə ja anə ko pə sə təkəra kərngha, ya sə nə ko pə na, jiri da kwa wa.”

¹⁴Ngə Yesu tə wum ga nar nda, “Mada mafakər kərɗa nə ya kwa dəka, jiri kwa, aka ɓwanya ɗa tsa'atsa'a tanyi, a zəndətə ya mbwa nda ya hya'atə ti, ana mbwa nda yo ya ti. Kəl ja, nahi a da hya zəndə mbwa nda ya hya'atə ti, ana mbwa nda yo ya tə wa.

¹⁵Nahi, hya kwa mər nəuma chul nə ndəkurndəu, kəl nda naya a yo mər nəuma nə madawa wa.

¹⁶Mada yo mər nəuma ɗa, tsa'atsa'a yo məra, aka a da ya zhang taa ɗa wa, kəl ja, tsa ea na Ada nda sə ɗa.

¹⁷Tsəfətsəfə nyi cha ku gadlagadla kəhi, ənda ma ɓwanya tə biya ku nya nji mətləu, ɗatə jiri.

¹⁸Naya ngə tangərmar ndə nda ɓwanya təkəra kərɗa, Ada nda sə ɗa ngə mətləkunyi.”

¹⁹Ngə nda jau nyi, “Aman Ada ngha?” Ngə Yesu tə nar nda, “A hyo zəndə ɗa wa, ya a da hyo zəndə Ada ɗa wa, macha kwa zəndə ɗa hi, hyo kina zəndə Ada ɗa tsəu.”

²⁰Cha par nda ɓwanya inga sakanda cha kwa dlədləɓə ləhə dzər mbwar məɗəwa Mbwa'alə Hyel. Ya dəhə ka ənga a ndə da səya nyi wa, aka bəji nyi da taa ɗa gwadagə wa.

²¹Yesu tə nar nda səkəu, “Yo təra, hyo gwa'a ɗa. Hyo tə ku səpəla'a kəhi. Vi nda yo ya ti, a da hyo nau yi nda wa.”

²²Sə ngə cha na nga, tə gwa'atə njirawawa'ar Yahuda tə na, “Manə cho na, ‘Mbwa nda yo ya tə a da hyo nau yi nda wa?’ Aa cho tsəya kərnyi ya?”

²³Ngə Yesu tə nar nda, “Kya hu'i hi, naya səya ki ya. Na hi, nə dunəya hi, kəl ja, naya a da ya nə dunəya wa.

²⁴Nacha gwa'atə ya nar hi, hya kwa kuɗə ku səpəla'a kəhi, ma cha a hya na'a jiri ənda naya ngə nacha wa, hyo kuɗə ku səpəla'a kəhi.”

²⁵Ngə nda jau nyi, “Nakə wa ka?” Ngə Yesu tə wum ga na, “Naya ngə nacha nda ya dəkar hi tangərma nda.

²⁶Sə da ɗang yo nau dəkə təkəra hi, ya sə ɗang yo nau tlanda hi nəuma təkəri, kəl ja, a da yo mər wa, aka ndə nda tə sə ɗa ndər jiri cha, kəl sənda ngatə ya tsa cha nacha yo dəkə nə dunəya.”

²⁷Dəhə ka ənga a da nda ngabiya ənda təkəra Ada ngə Yesu kwa ɓwanya nə nda wa.

²⁸Ngə Yesu tə nar nda, “Ma bəji nda hya da kukwanda Zər Ndə tə taməngəla, hyo zəndə ənda naya ngə nacha, hyo zəndə tsəu ənda a da yo mər madami təkərɗa wa, kəl nda sənda Ada tə dlədləɓətə ɗa nacha yo məra.

²⁹Ndə nda tə sə ɗa tsa'a cha naya, a da cha ngya ɗa zhangta ɗa wa, aka mada sakamani yo mər sənda cho i.”

³⁰Ahir nda Yesu tə dəkə ɓwanya inga, nji ɗang tə nənyi jiri.

³¹Yesu tə nar nyi nə njir Yahuda inda tə nənyi jiri nda, ma hya nənyi jiri nə ɓwanya ɗa, vəlvəl shawa ɗa hi.

³²Hyo zəndə jiri, jiri tsəu kwa pəliya hi.

³³Ngə nda wum nə nyi, “Na ea nyandəla Ibrahim ea, a da ea ta mərtə nyi mavakur nə madawa wa. Manə ko na, njo da pəl ea?”

³⁴Ngə Yesu tə wum nə nda, “Vəlvəl yo nar hi, madawa kwa mər səpəla'a, mava səpəla'a cha.

³⁵Aka mava a da kwa nau ɗaka tlakə nyi wa, kəl nda zər ndə nda nənyi, zər ki nda cha wa'atanyi.

³⁶Aka ma Zər tə pəliya hi, hyo ngya tə butər kərnəhi.

³⁷A zəndətə ya nahi nyandəla Ibrahim hi, kəl ja, jan hyo gwa'a ɗa ka tsa, aka ɓwanya ɗa da gwa ku ɗufwa hi wa.

³⁸Yo dəkar hi sənda la'a ya tsa Ada ɗa, na hi tsə'u hyo mər sənda ngatə hi tsa adan hi.”

³⁹Ngə nda nar nyi, “A adan ea Ibrahim ma.” Ngə Yesu tə nar nda, “A'a, a hi nguli Ibrahim wa, macha nguli Ibrahim hi, hyo nda mər sə'inda Ibrahim tə məra.

⁴⁰Kəl ja, jan hyo gwa'a ɗa ka tsa, aka yo dəkar hi jiri nda ya ngatə tsa Hyel, ya a Ibrahim da mər əngə wa.

⁴¹Anə hyo mər tlər nda adan hi tə məra.” Ngə nda nar nyi, “A da nguli mazagwa ea wa, adan ea zhang tanyi na cha ngə Hyel.”

⁴²Ngə Yesu tə nar nda, “Macha Hyel Adan hi, kwa nda hya nyida ɗa, aka kyada Hyel səya ya, a naya tə sə kərɗa wa, nacha tə sə ɗa.

⁴³Mi sənda gwa'atə a da hya ngabiya ɓwanya ɗa wa? Aka a da hyo səsə'uti səndzə himi da ɓwanya ɗa wa.

⁴⁴Aka əngə ja, sərtakə ngə adan hi, jigadəma kəhi, kəl nda ga hya nyabiya chul tlər adan hi. Aka ɗəɗəm, ndər tsa ndə cha, a da cho i nəu jiri wa, aka a jiri da tsa cha wa. Dəhə bəji nda cho tla gəzhi nyi ti, aka kərnyi cho tla, aka na cha ndər gəzhi cha. Təl gəzhi cha tsəu.

⁴⁵Yo dəkə jiri, kəl ja, a da hya na'a jiri wa.

⁴⁶Wa nə ku pama hi ta səya ɗa na bikəa? Macha jiri yo dəkə ya, mya gwa'atə a hya na'a jiri wa?

⁴⁷Ndə nda nə Hyel, cho səhimi da ɓwanya Hyel. Sənda gwa'atə a da hyo səhimi da ya wa, aka a da hi nə Hyel wa.”

⁴⁸Njir Yahuda inda nar nyi, “Tsa'atsa'a tanyi ngə ea na, ndər Samariya ka, ya məlləm ku kəra ka.”

⁴⁹Ngə Yesu tə nar nda, “A məlləm da ku kəra ya wa. Səlir Ada ɗa ngə yo həa, ya janə hyo həyatə ya.

⁵⁰Ada naya ngə kwa gwa'a səli nə kərɗa wa, pam ndə nda kwa gwa'a səli na'a, ya nacha ngə ndər nəuma.

⁵¹Vəlvəl yo nar hi, madawa tə ɓəlatə ɓwanya ɗa, a tlakə nyi da kwa ɓə na tə pa'a wa.”

⁵²Kəl njir Yahuda inda tə nar nyi, “Sakan ja nənyi təea jiri məlləm ku kəra ka. Ibrahim təti, ka Njir mətakər, ya janə ko na, madawa tə ɓəlatə ɓwanya ɗa, a da cho ɓə na tə pa'a wa.”

⁵³A ndiya tə kə adan ea Ibrahim ndər mətakər ya? A tətə cha, maləm wawa'a kuɗətə tsəu. Aman ko la'a kərngha?

⁵⁴Ngə Yesu tə nar nda, “Macha yo həsəlir kərɗa, cho ɗa ka sə ɓwa'atanyi. Ada ɗa ngə kwa na'a səli. Ya nacha ngə Hyel kəhi.

⁵⁵A da hyo zəndə nyi wa, naya na'a, a zəndə nyi təya. Ma ya na a da yo zəndə nyi wa, a ndiya hi təya tla gəzhi. Kəl ja, a zəndə nyi təya, ga ɓəlatə ɓwanya nyi tsəu.

⁵⁶Adan hi Ibrahim, tə mər hirgyaɗi wi sə wa, ga cha la'a shili ɗa. A la'atə cha ga mər hirgyaɗi.”

⁵⁷Njir Yahuda nar nyi, “Naka, a da ka taa fa tufkumnyi wa, aman kə taa la'a Ibrahima?”

⁵⁸Kəl Yesu tə nar nda, “Vəlvəl yo nar hi, təvi nja ya Ibrahim, a da ya.”

⁵⁹Nda ngatə nda ənga, kəl nda fa'a hangu ka ga nda vakənda nyi ni. Ngə Yesu tə gwatanyi ku məkutla, ga biya tanyi ku Mbwa'alə Hyel nda.