Read nya huba Yohana 9 Bible Online

Yohana 9 - nya huba bible

Yohana 9

¹Nda Yesu kwa tərabiya, ngə cha la'a vanya ndə nda nja ya wuləfəu.

²Ngə shawa nyi tə jau nyi, “Maləm, səpəla'a wanga gwa'atə nja ya ndə nə wuləfa? Nə kərnyi zəma, aa nə njir yah nyi?”

³Ngə Yesu tə nar nda, “A da səpəla'a kərnyi wa, ya a da nə njir yah nyi nga gwa'atə cha ɗa wuləfəu wa, kəl nda ga nja la'a gyalkur Hyel təkəra cha nga.

⁴A ɗatə tuku məno mər tlər ndə nda tə sə ɗa, wi nə tsə'u tanyi pəchi na, aka vu'i kwa shili, nda a tsə'u madawa kwa nau mər tlər wa.

⁵Wi nə ya tə dunəya na, naya ngə vichamər dunəya.”

⁶Ahir nda Yesu tə na ənga, ngə cha təfəya tuli hu'i ga zəkutə hə'i ni, ngə cha ɓəsətə tə lya ndər wuləfəu nda

⁷ga nar nyi, “Təra ka yi chinda huɗəma kə hyo fa'a Siləwam.” (nda njo nga “Sə sənyi”). Ngə ndə nda təra ga ki chinda macha, a tə lakur ɓəl shili, kəl jan cha kwa la'a səu.

⁸Ka təwul nyi ana dəhə nji'inda ɗaka zəndə ənda cho gədi, kwa na, “A ndər wuləfə nda kwa ngya tangnə kwa gədi da nə wa ya?”

⁹Alenya nji ku huɗa nda na, “Na cha nga.” Ndə alenya nji, “A da nacha ngə wa, kəl ja, a patə nda dza.” Kəl ndə nda na kərnyi tə na, “Naya nda na.”

¹⁰Kəl ngə nda jau nyi, “Aman lya ka ɗa na mbəɗa?”

¹¹Cha wum ga na, “Ndə ngə njo nga Yesu nda nga zəkutə hə'i ga ɓəsətə ɗa tə lya ya ga nar ɗa, ‘Ma'i ka yi chinda huɗəma ka aku fa'a Siləwam.’ Ma nda ya yi chinda, ngə ya ghəya na la'a səu.”

¹²Nda jau nyi, “Aman cha?” Ngə cha na, “A da ya zəndə wa.”

¹³Nda yi na ndər wuləfəu nda Yesu tə mbandə nda nə njir Farisi,

¹⁴aka tə Pəchir Ngyaməngya ngə Yesu tə zəkutə hə'i ga wuniya lya ndə nda ni.

¹⁵Ngə njir Farisi inda jau nya ndə nda ənda cha ghəya la'a səu. Ngə cha nar nda, “Cha ɓəsətə ɗa hə'i miɗakə tə lya ya, nda ya chinda ngə ya ghəya la'a səu.”

¹⁶Alenya njir Farisi inda tə na, “A da kyada Hyel ndə nə tə hya'atə wa, aka a cha ɓəlatə Pəchir Ngyaməngya wa.” Alenya nji tsəu tə na, “Ya aman ndər mər səpəla'a kwa nau mər səshinshin wi na?” Anya nda da shili zhang wa.

¹⁷Nda tsakətə jau ndər wuləfə nda səkəu, “Nakə nənghə ya, mi ko na təkəra ndə nga, nakə ngə cha mbəɗiya lya ka?” Ngə cha na, “Ndər mətakər Hyel nga.”

¹⁸Kəl ja, njir Yahuda da nənyi jiri ənda ndər wuləfəu cha ɗəɗəm, ya jan sakana kwa la'a cha səu wa, kəl nda nda nga njir yah nyi shili.

¹⁹Ngə nda jawar nya njir yah nyi, “Zər kəhi nə ndə nə ya? Hya na nja yah nyi wuləfəu? Aman nə cha kwa la'a sə sakana?”

²⁰Njir yah nyi tə wuma, “Sənda zəndə ea, zər kəea cha, ya zəndətə ea tsəu wuləfə yah nyi nji.

²¹Kəl ja, a da ea zəndə nda aman cha ɗana uya la'a sə wa, ndara wa tə wuniya lya cha a da ea zəndə wa. Jan cha jawar ma nya cha, aka ndə dəgal nga, cho nau ɓwanya təkəra kərnyi!”

²²Njir yah nyi tə na ənga aka nda kwa ləvər ɓwanyar njirawawa'a nə Yahuda, aka ɗəɗəm a ta'ində tə nda təkəra madawa tə na Yesu, Kəristi cha, kəl nja gədləbiya tlakə nyi ku vi pətlənya.

²³Nacha ngə sənda tə gwa'atə njir yah nyi tə na, “Ndə dəgal nga, jawar ma nya cha!”

²⁴Nda ɓəla nga ndə nda nja yah wuləfə nda gwa səkəu, ga nar nyi, “Ləvər Hyel, ka pə jiri! Kərnəea, a zəndətə ea ənda ndə nga ndər mər səpəla'a nga.”

²⁵Ngə ndə nda wum ga na. “Naya a da ya zəndə ndara ndər mər səpəla'a cha wa, sə zhang zəndə ya, sakanda wuləfə ya, ya jan yo la'a sə sakana.”

²⁶Nda tsakətə jau nyi, “Mi mərtə nghə cha? Aman cha wuniya lya ka?”

²⁷Cha nar nda, “A wurtə ya dəkar hi, ya a da hya səndzə himi wa. Mi sənda hyo i ya dəkar hi səka? Aa na hi tsəu ya, kwa i hi hya ɗa ka shawa nyi ya?”

²⁸Ngə nda hya'atə na ngəl nyi, “Nakə ngə shawa nyi səngha! Ba naea nəkəea, shawa Musa ea.

²⁹A zəndətə ea ənda Hyel tə ɓwanya nə Musa, sal ngə nənyi a da ea zəndə mbwa nda cha hya'atə tə wa.”

³⁰Kəl ndə nda wum ga na, “Jan ma səshinshin nya ja! A da hya zəndə mbwa nda cha hya'atə tə wa, ya jan cha wuniya tə lya ya!

³¹Aka zəndətə mən, a Hyel da kwa səhimi da ndər mər səpəla'a wa, kəl dəhə ndə nda kwa həsəli nə Hyel ana kwa mər sənda cho i.

³²Ɗəɗəm Hyel tə mər dunəya ya a məna ta ngatə vanya ndə tə wuniya lya ndə nda nja ya wuləfəu wa.

³³Macha ndə nga a da hya'atə kya kə Hyel cha wa, a da cho nda nau mərtə səngə wa.”

³⁴Nda wum ga nar nyi, “Nakə nda nja ya ku səpəla'a, nakə nə kwa dlədləɓə nə ea?” Kəl nda gədləbiya nyi biya ku vi pətlənya nda.

³⁵Yesu tə ngatə ənda nda gədləbiya ndə nda biya, nda cha həya nyi, cha jau nyi, “Nakə nənghə ya, a nənyi təkə jiri nə Zər Ndə ya?”

³⁶Ngə ndə nda wuma, “Maləm, dəkar ɗa nda wa cha, ga ya nənyi jiri.”

³⁷Ngə Yesu tə nar nyi, “A wurtə kə la'a nyi, ya nacha nə kwa ɓwanya na ka.”

³⁸Ngə cha nar nyi, “A nənyi tə ya jiri, Tlakəu!” Kəl cha uzhi huɗə Yesu, ga hətə nyi səli.

³⁹Yesu tə nar nyi, “Shili ɗa tə dunəya ka ga ya mərtə nyi nəuma nə njir dunəya, ga nji'inda pa'a kwa la'a səu nda la'a səu, nji'inda kwa hətə ənda kwa la'a nda səu tsəu, nda wuləfa.”

⁴⁰Nda njir Farisi inda ləhə dzə nyi inda tə ngatə ɓwanya nga, ngə nda jau nyi, “Ma'a naea wuləfə ea ya?”

⁴¹Yesu tə nar nda, “Ma cha njir wuləfə hi, a bikə kəhi da wa, kəl ja, mangə hya wur na kwa la'a hi səu, bikə kəhi mbiya hi ti.”