Read nya huba Tlər kə'i Changhabal 1 Bible Online

Tlər kə'i Changhabal 1 - nya huba bible

Tlər kə'i Changhabal 1

¹Tiyofilus, aku tangərmar likatəkatə ɗa, ya tsəfətə ngha a təkəra dəhə sə'inda Yesu tə ghəya məra ana sə'inda cha dlədləɓa anə nji,

²tsa'a tə bəji nda nja hətə nyi shi huɗamələm, ahir cha tsau nyi bar təwa Shanguɗə Karti nə Changhabal nyi inda ɗəmtsə cha.

³Aku hanyi fwaɗəkumənyi ahir nja kukwanda nyi, cha chabiya nda kərnyi zhaka ɗang tanyi aku laku nda nda kwa zəndəbiya ənda ana pi cha. A la'a nyi tə nda, cha ndər nənda a təkəra Təlkur Hyel.

⁴Sakanda nda kwa səm sərsum kə'i cha, kəl ngə cha tsau nda bar, “Ngwa hya da ngyar Urshalima wa, kəl ja, hya səkə sənda Hyel Ada tə mərtə hi alkawal ənda cha kwa nə hi tang wi nda ya nar hi.

⁵Yohana tə mər baɓtisma ana ɓiti, kəl ja, ku hanyi kushə biyama, njo mərtə hi baɓtisma ana Shanguɗə Karti.”

⁶Nda Njir bəzə mafakə inda tsəmtədza, nda jau Yesu, “Tlaka, aku bəji nə ngə ka kwa ɓəlandə təlkur nə Isra'ila zəm ya?”

⁷Ngə Yesu tə nar nda, “Kəl Ada ngə na gyalkur fə bəji ana sakanda sə kwa ɗa ti, a da ta'ir hya kwa zəndə wa.

⁸Kəl ja, hyo uya gyalkur sakanda Shanguɗə Karti tə səya təkəra hi, hya kwa ɗa ka matauli ɗa, ghəya vu Urshalima ana dəhə hə'i Yahudiya, ana ya tə hə'i Samariya ba'a dəhə dunəya.”

⁹Ahir nda cha wurandə ɓwanya nga, ngə nja hətə nyi shi huɗamələm, sakanda nda kwa ndzəm nyi ti, ngə ləmbəkə tə sanda nyi tsa nda.

¹⁰Sakanda nda kwa ling cho təra shi ti, kəl jan nji mətlə ana ləkutə pərtə ta'i dzən nda.

¹¹Nda na, “Njir Galili, mya gwa'atə hya ta'i tangna hya kwa ling shi huɗamələm ma? Yesu ngə nja hənda shi huɗamələm nga, kwa ɓəl shili səkəu tang wi nə hya la'a cha təra.”

¹²Kəl ngə Changhabal Yesu inda tə səya kyo Mə Zaitun ga ɓəl ta nda gu Urshalima, pama nda ana mələm kwa ɗa myal zhang.

¹³Nda nda shili ku mələm, ngə nda təra gyo vi nda nja hərtə təkəra vanyi, mbwa nda nda kwa ngya ti. Janə nji'inda tangnda, Bitrus, Yohana, Yakubu, Andrawus, Filibus, Toma, Batalamaus, Matta, Yakubu zər Halfa, Shiman ndə nda kwa nyida hə'i nyi, ana Yahuda Zər Yakubu.

¹⁴Dəhə nji ingə kwa daɓədzə wa'atanyi aka pətlənya, tsa'a ka alenya mahi'i ana Maryamu amanya Yesu ka zamənya Yesu.

¹⁵Vanya pəchi, njir nəu tə tsəmtədza, kwa ɗa gharəu na mətləkumənyi, ngə Bitrus tə hya'ati ga ɓwanya.

¹⁶“Zamə ɗa i, tuku nga likatəkatə nyabiyadza wi sənda Shanguɗə Karti tə na parang təwa nya Təl Dauda a təkəra Yahuda, ndər cha laku nə nji'inda səya Yesu.

¹⁷Zhang cha ku pama mən, ya a nənyi tə nji nənyi na mbaɗə nə tlər na.”

¹⁸(Ana kwaba nda Yahuda tə uya təwa tlər ɗimi cha ɗəlbiya babal ni, tangnda ngə cha dla ga tah; ta cha pətla ngə halya cha pəa.

¹⁹Dəhə njir Urshalima zəndəbiyatə sənga, aka əngə nda nga babal nda ku nya kənda, “Akaldama,” na cha ngə babal mashi.)

²⁰Bitrus tə tsakətə na, “Aka sənda tsəfətsəfə nyi ku Likatəkatə Dəla nda Karti nga, ‘Ki nyi kwa ngya jwajwa'a, ngwa ndə da ngya kwa wa.’ “Ətsəu nja na, ‘Vanya ndə hətə məngya nyi.’

²¹“Aka əngə ja a mən tabiya vanya ndə aku pama nji'inda kə'i mən aku dəhə bəji nda Tlakən mən Yesu kwa zhuli kə'i mən nda.

²²Ghəya tə bəji nda Yohana kwa mər baɓtisma, tsa'a tə pəchi nda nja hənda Yesu tsa mən shi huɗamələm. Madawa nja tabiya, kwa ɗa ka matauli təkəra hya'atər Yesu ku hu kə'i mən.”

²³Kəl ngə nda char nji mətləu, Yusufu nda tləm nyi Barsabas, ətsəu kwa nga nyi nji Yustus, ana vanya ndə tləm nyi Matiyas.

²⁴Ngə nda pətlənya, “Tlakəu, kwa zəndə kə ɗufwa madawa, aka ənga char ea ndə nda ka tabiya ku pama nji mətlə ina

²⁵ka cha hətə tlər changhabal nda Yahuda tə ngyari ga təra ya tə mbwa nda tə ɗa ka nənyi.”

²⁶Kəl ngə nda ɓəlshiu ga tabiya Matiyas ka cha ɗa zhang ku pama Changhabal kwabəzhang inda.