Read nya huba Tlər kə'i Changhabal 12 Bible Online

Tlər kə'i Changhabal 12 - nya huba bible

Tlər kə'i Changhabal 12

¹Aku nda na bəji, Təl Hiridus tə səya alenya njir nəu inda vu Urshalima, ka cha ɗa məndza'u na nda.

²Cha tsəya Yakubu zamənya Yohana na Katsakər.

³Manda cha la'a sənda cha mər nda ɗa tə mənakə nə njir Yahuda, kəl ngə cha səya Bitrus tsəu. Sənə tə ɗa ku bəjir Ladər Gwazhilakə kəla tləlam.

⁴Ahir nda cha səya Bitrus, ngə cha fəu nyi ku jarum, dzuku ləvaləva pampam fwaɗə kwa ɓəla nyi, kala dzuku na ləvaləva fwaɗə kwa. Sənda ku jigadəmanyi nacha ngə, ahir Ladər Dləgəlnda, cho yi na Bitrus mar nji ka nja mərtə nyi nəuma.

⁵Sakanda Bitrus ku jarum, njir nəu kwa pətlənya nə Hyel tsa'anyata ka cha.

⁶Zəbiya mbudla njo mərtə nyi nəuma nə Bitrus. Bitrus kwa njihanyi ku pama ləvaləva mətləu, nja mbiya nyi dza ləvaləva inda ana dzəra lyang mətləu, daɓə njir tsakəra jarum biya nyavi kwa ɓəla nyaki.

⁷Gəɗə tanyi, kəl jan Chama Tlakə tə chabiyadza, ngə vimbəlmbəl tə mbəl ku vi nda. Ngə Chama nda tə dəgaya Bitrus tə shaha cha ga hya'andə nyi, ga na, “Kusa hya'ati.” Təma dzəra lyang inda tə pəpə tə cha Bitrus.

⁸Kəl Chama Tlakə tə na, “Pəndzə dzaki ngha, ka hau ɓiɓi ngha.” Ngə Bitrus tə mərtə tang wi nda, ngə Chama nda tə na, “Tulndzə sər tul ngha ka nəu ɗa.”

⁹Ngə Bitrus tə nəu nyi biya ku jarum nda, kəl ja, a da cha na zəndə ənda sənda Chama Hyel kwa mər nda ngə təkəɗər sənda kwa ɗa wa, cha hari ənda ku shi'uni puchi nda cha.

¹⁰Nda ndəɗiya mbwar ɓəla tangərma ana mətləkunyi, ngə nda shili ku lakur gwa ku ta mələm, nda nja haɗiya na nyavi lyang. Ngə tə mbəɗə na kərnyi ngə nda biya. Manda nda nəubiya lakur yauraki zhang, gəɗə tanyi ngə Chama Hyel nda tə ngya nyi.

¹¹Nda Bitrus tə ngabiya sənda tə ɗa na cha, ngə cha na, “Nəchana a zəndətə ya kəpal da wa Tlakəu nə tə sə Chama nyi ga cha dləuya ɗa ku cha Hiridus, ana tsa dəhə sə'inda njir Yahuda kwa hari.”

¹²Nda cha ngabiya ənga, ngə cha təra yo ki Maryamu amanya Yohana nda njo nga Markus, hinda nja tsəmtədzə ɗang njo pətlənya.

¹³Ngə Bitrus tə tsar nyaki biya, kəl ngə vanya kwatəra na tləm nyi Roda tə shili ka ga cha wuniya nyaki nda.

¹⁴Nda cha ngabiya kuraka Bitrus, ngə cha ɓəl ɓawu na hirgyaɗi, na cha kari mbəɗə mada nyaki nda wa, ga gwa bəzəya ənda Bitrus nda biya nyaki!

¹⁵Ngə nda nar nyi, “Kərakə gwaɗəti!” Kəl cha chinda dzə ənda vəlvələu. Kəl ngə nda na, “Mambəl[2] nyi nga.”

¹⁶Bitrus nənyi kəl tsa tanyi cho tsa nyaki. Manda nda yi wuniya nyaki ga la'a nyi, ngə nda mər məngəl.

¹⁷Ngə cha har nda chi, ənda nda bəgə ɗiyu, ngə cha dəkar nda təkəɗəu ənda Tlakə tə həbiya nyi ku jarum. Ngə cha na, “Dəkar nyi ma sə'ina nə Yakubu gau njir nəu ana alenya njir nəuwa,” Ngə cha hya'atə ga təra kyatə vanya mbwa.

¹⁸Nda vi tə wura ləvaləva inda tə wi ku pama kərnənda kəɓanghəu, ndara mya ɗa na Bitrus.

¹⁹Ahir nda Hiridus tə na nja gwa'a nyi tsa'anyata, ngə a da nja uya nyi wa. Kəl ngə cha tsəmtə ləvaləva inda ga jau nya nda, ngə cha na nja kuɗənda nda. Ahir nga, Hiridus tə ngyar hə'i Yahudiya ga təra yi Kaisariya ga yi hanyar pəchi kushi hinda.

²⁰Huɗa Hiridus tə tla gagaɗa tsa njir Taya ana njir Sidon, kəl ngə nda daɓətəkər ga shili da cha ka nda gwa'a ngya mənakəu, aka hə'i təl nda ngə kwa kəta nda na sərsuma. Ngə nda gədi Bilastus gau patla təl cha ta'i tə ya nda.

²¹Atə pəchi nda nja fiya nda, Hiridus tə handzə ləkutə təlkur, ga ngyata nyi tə dzəga təlkur nyi, ga ɓwanya nə nji.

²²Nda pə kurakə nda kwa na, “A da ndə nə kwa ɓwanya nə mən wa, vanya hyel na!”

²³Tangnda tanyi, ngə Chama Tlakə tə dəgə nyi, aka cha dləukər na səli nda nə Hyel. Kəl ngə hwa'ami tə ghəya ɗənyi ngə cha tah.

²⁴Kəl ja, ɓwanya Hyel kwa wiɗa, njir nəu tsəu kwa tsaka.

²⁵Manda ka Barnabas na Shawulu tə wuranda tlər nda yi na nda yi Urshalima, ngə nda ɓəl ta nda yi Antakiya ga mar Yohana nda njo nga Markus.