Read nya huba Tlər kə'i Changhabal 13 Bible Online

Tlər kə'i Changhabal 13 - nya huba bible

Tlər kə'i Changhabal 13

¹Aku huɗa njir nəu nda vu Antakiya, njir mətakər nə Hyel da kwa kə'i maləm. Ka Barnabas ana Simion nda njo nga ndə Kyakyar, ana Likiyus ndər Sayirin, ana Manayen (ndə nda tə həa laku zhang na təl Hiridus) daɓə Shawulu.

²Sakanda tə nda kwa həsəli nə Tlakəu tsa'a na səmdzən, ngə Shanguɗə Karti tə na, “Dzəvəya ɗa ma ka Barnabas na Shawulu ka tlər nda ya nga nda kari.”

³Ahir nda nda səmdzən ga pətlənya, ngə nda fəkə nda chi, ga səu nda ku laku.

⁴Ka Barnabas na Shawulu nda Shanguɗə Karti tə sə tsəu, nda təra yi Salukiya, hinda ngə nda gwa ku param ga təra yi Kubrus hə'i nda dəl dəgal tə ɓandi.

⁵Sakanda nda həya mələm Salamis ti, nda gwa dəkə ɓwanya Hyel ku vi pətlənya nə njir Yahuda. Ana Yohana nda njo nga Markus kwa vala nda.

⁶Nda tahəya hə'i nda dəl dəgal tə ɓandə tsa'a vu Pafos, ngə nda ɓə na vanya ndər Yahuda hi nda, ndər mətakər gəzhi, tləm nyi Bar-Yeshuwa ndər hakəza.

⁷Bazhinya ngwamna nə hə'i Kubrus cha, tləm nyi Sarjiyus Bulus, ndər dəma cha gagaɗa. Ngə cha nga ka Barnabas ana Shawulu yo ki nyi, aka cho i ka cha ngatə ɓwanya Hyel.

⁸Kəl Alimas ndər hakəza (əngə tləm nyi na nya njir Heleni) nda tə kəpalnda ɓwanya kənda, cho gwa'a shandənyi kər nə ngwamna nda tsa cha da ɗana jirikur ku Yesu.

⁹Kəl ngə Shawulu nda njo nga Bulus tsəu, nda nyinyinyi na Shanguɗə Karti, cha ndzam Alimas hinghəu.

¹⁰Ga na, “Nakə zər sərtakə ɗimi! Nakə ndər dawa dəhə sənda tsa'atsa'a. Shakər ɗimi ana kwakunakur tanyi ngə nya taka, a da ko ta'ində gwa'a səuwa laku jiri nə Tlakə ma?

¹¹Nəchana Tlakə kwa cha nghə na chi, ko wuləfə a tsə'u ko la'a pəchi wa, kəl vanya bəji.” Təma tanyi mazhikəndəli ana kutlə tə haɗiya lya cha, kəl ngə cho ma'i pəpəmpəpəm cho gwa'a ndə ka nja təɗətə nyi cha cha.

¹²Manda ngwamna nda tə la'a sənda ɗa na ndə nda, cha mər məngəl na dlədləɓə təkəra Tlakəu ga nənyi jiri nə Yesu.

¹³Bulus ka bazhi ma'i nyi tə gwa ku param vu Pafos, ga shili vu Parga tə hə'i Pamfiliya, tangnda ngə Yohana nda njo nga Markus tə ngya nda ga ɓəl yi Urshalima.

¹⁴Ngə nda ngyar Parga ga shili vu Antakiya a tə hə'i Bisidiya. A tə Pəchir Ngyaməngya ngə nda təra yo vi pətlənya njir Yahuda ga yi ngya.

¹⁵Ahir nja kəratsən ku gadlagadla Musa ana sənda njir mətakər nə Hyel tə tsəfəti, ngə njirawawa'a inda təkəra vi pətlənya tə sətə nda mafakəu, bəra “Kə'i zama, ma cha ɓwanya fətənyi ɗufəu nə nji da tsa hi dəkar nda ma.”

¹⁶Ngə Bulus tə hya'atə fwatə ga har cha cha ka nji bəgəu, ngə cha na. “Njir Isra'ila ana nahi nji'inda pa'a njir Yahuda nda tangnə kwa həsəli nə Hyel, səya ma himi da ya!

¹⁷Hyel nə njir Isra'ila ngə tə tabiya ka jival kəmən ɗəɗəməu, cha gwa'atə nda yatəkər bəji nda nda vu Masar. Ana gyalkur gagaɗa cha həbiya nda ku hə'i nda.

¹⁸Fa fwaɗəkumənyi cha səsə'u nda kwatə dadil takəu.

¹⁹Cha kura jul nji məɗəfə tə hə'i Kan'ana ga nənyi hə'i kənda nə nənyi na nji ka sər fa'aki kənda.

²⁰Dəhə sə'ingə tə ɗa ku fa gharəu fwaɗə na tufkumnyi. “Ahir nga Hyel tə nənda njir nəuma, tsa'a yatə bəjir Sama'ila ndər mətakər.

²¹Manda nda gwa'a nja fiya nda təl, ngə Hyel tə tabiya nda Saul zər Kish ku nyandəla Banyami, cha ɗaka təl kənda fa fwaɗəkumənyi.

²²Ahir Hyel tə həbiya Saul ku təlkur, ngə cha fiya Dauda ka təl kənda. Janə sənda Hyel tə na təkəra cha, ‘Dauda zər Jesi ngə ndə nda səya tə ɗufwa ya, cha kwa mər dəhə sənda yo i cha məra.’

²³“Ku nyandəla ndə na, Hyel tə shili na Ndər Dləuya nə njir Isra'ila nacha ngə Yesu wi nda cha mər alkawal.

²⁴Təvi Yesu ghəya tlər nyi, Yohana bəzə tə ɓwanya Hyel nə dəhə njir Isra'ila ənda nda tubi nja mərtə nda baɓtisma.

²⁵Manda Yohana kaɗə wurandə tlər nyi, ngə cha na, ‘Wa hyo na naya? A da naya ngə ndə nə hyo səkə nə wa. Kəl ja, cho shili hiɗa, a da ya nji ka ya pəliya mada sər mba ɓiɓi nyi wa.’

²⁶“Kə'i zamə ɗa, nguli Ibrahim ana nahi nji'inda pa'a njir Yahuda nda kwa ləvər Hyel, a nə mən ngə nja sətə ɓwanya Dləuya na.

²⁷Njir Urshalima ana njirawawa'a kənda da zəndəbiya ndara wa ngə Yesu wa, ya a da nda ngabiya ɓwanya njir mətakər nda njo kəratsən nə nda kala Pəchir Ngyaməngya wa, dəhəka ənga nda tsəya nyi ga nyabiya sənda njir mətakər tə na.

²⁸Madangə a da nda uya sənda pəlakər nda kwa tsəya nyi təkər wa, nda gədi Bilatus cha tsəya nyi.

²⁹Ahir nda mərtə nyi dəhə sənda tsəfətsəfə nyi təkəra cha, ngə alenya nja həya nyi səya kyatə taməngəla, ga haɗiya nyi ku hwa.

³⁰“Kəl ja, Hyel tə hya'andənyi ku hwa.

³¹Nji nda ɗaka ma'i kə'i cha hya'atə vu Galili gwa Urshalima la'a nyi ti nə hanyi ɗanghəu. Nanda ingə nji'inda kwa ɓwanya təkəra cha nə nji kəmən.

³²Hyel tə mər alkawal nə ka ajin mən, nacha nə sənda shili naea tangna, ka ea shili nahi Mafakə Mənakəu ənda

³³Hyel nyabiya tə alkawal ngə ka mən namən nda nguli kənda, təwa hya'andə Yesu ku hwa. Wi nda cha tsəfətsəfə nyi ku mətləkunya Dəla nda Karti, bəra, ‘Nakə ngə zər ɗa ənya chabiya nyi təya nə nji ənda naya ngə Ada ngha.’

³⁴Janə sənda Hyel tə na təkəra hya'andə nyi ku hwa, a da ko yiɗa pa'a wa, wi nda cha ku ɓwanya na, ‘Yo nə hi təkəɗər papa'akur nda karti, nda nja mərtə nyi alkawal nə Dauda.’

³⁵Wi nda vanya tsəfətsəfər Dəla Nda Karti tə na, ‘A da ko ngyar ndə Karti nghə yiɗa wa.’

³⁶“Aka nda Dauda tə mər tlər nə Hyel ku bəji nyi, cha tah, ngə nja haɗiya nyi dzər ka jival nyi, ya dza cha yiɗa ti.

³⁷Kəl ja, ndə nda Hyel tə hya'andə ku hu da ɓə na yiɗa wa.

³⁸Aka əngə ja ka zamə ɗa, cha ɗa na zəndəkur kəhi ənda təwa Yesu ngə nja uya farbikər səpəla'a ngə nja bəzə nə hi nga, a da təwa gadlagadla Musa wa.

³⁹A təwa nyi ngə kala ndə nda tə nənyi jiri, kwa ɗa tsa'atsa'a mar Hyel nacha nə sənda nəubiya gadlagadla Musa da kwa nau mərtə wa.

⁴⁰Hya gəla tsa sənda njir mətakər tə dəkə da ɗa na hi, abəra,

⁴¹‘Ndzam ma, nahi njir pə ɓwanya həyatəvi, mər ma məngəl hya kuɗa! Aka yo mər vanya sə ku bəji kəhi, nda a da hyo nənyi jiri mada vanya ndə tə dəkar hi wa.’ ”

⁴²Nda ka Bulus na Barnabas kwa ngyar vi pətlənya nda, ngə nji tə gədi nda tsa'anyata ka nda ɓəla shili ɓwanya təkəra sə'ingə tə Pəchir Ngyaməngya ngo shili nga.

⁴³Ahir nda nja wiɗənda nji, kəl ɗang ku huɗa njir Yahuda ka nji'inda tə gwa ku lakur nəu Hyel nə njir Yahuda tə nəu ka Bulus na Barnabas, ngə ka Bulus tə ɓwanya nə nda ga gədi nda nda biyama ku ɗanghali Hyel.

⁴⁴Nda vanya Pəchir Ngyaməngya tə shili, gəɗaka dəhə njir mələm nda tə tsəmtədzə ku vi pətlənya ka nda ngatə ɓwanya Tlakəu.

⁴⁵Nda njir Yahuda tə la'a dlama nji'inda, ngə sələkəkur tə nyandə ɗufwa nda, nda kəpaliya sənda Bulus kwa na ana ɓwanya ɗimi.

⁴⁶Kəl ka Bulus na Barnabas tə wum nənda a da na ləvər wa, “Tuku ngə ea dəkə ɓwanya Hyel nə hi tangərma. Kəl ja, manda ngyar təhi, a dlanda təhi kərnəhi tsa pi nda ba'anawa, nəchana eo sha ya kəra nji'inda pa'a njir Yahuda.

⁴⁷Aka nacha nə tsaubar nda Tlakə tə tsau ea, bəra, ‘A fiya nghə təya ka vimbəlmbəl nə nji'inda pa'a njir Yahuda, ka ga ka shili na Dləuya nə dəhə njir dunəya.’ ”

⁴⁸Nda nji'inda pa'a njir Yahuda tə ngatə ənga, nda mər hirgyaɗi, ga hətə nyi səli nə ɓwanya Tlakəu, ya dəhə ba nji'inda nja ɗəmtsə ka pi nda ba'anawa tə nənyi jiri.

⁴⁹Ngə ɓwanya Tlakə tə wiɗətədzə tə ɓələr hə'i nda dəhəu.

⁵⁰Kəl ja, wawa'ar njir Yahuda tə tsəkutə mahi'i inda na ləvər Hyel, nda njo la'a na səli, ana shili nda tə ɗaka wawa'ar mələm. Ngə nda gwa'atə nja ɗa məndza'u na ka Bulus na Barnabas ga gədləbiya nda ku ba hə'i kənda.

⁵¹Ngə ka Bulus tə dəgənda bərbər nda tə hya nda ga cha ɗa ka sər ɓwanya təkəra mələm nda, ga təra yi Ikoniya.

⁵²Ətsəu njir nəu inda vu Antakiya tə nyi na hirgyaɗi ana Shanguɗə Karti.