Read nya huba Tlər kə'i Changhabal 14 Bible Online

Tlər kə'i Changhabal 14 - nya huba bible

Tlər kə'i Changhabal 14

¹Avu Ikoniya tsəu, ka Bulus na Barnabas tə təra yo vi pətlənya njir Yahuda wi nda nda tsəl ni. Hinda nda ɓwanya ku gyalkur nda tə gwa'atə njir Yahuda ka nji'inda pa'a njir Yahuda ɗang tə ɗaka njir nəuwa.

²Kəl ja, njir Yahuda inda tə ngyar nənyi jiri, tə tsəkutə nji'inda pa'a njir Yahuda ga gwa'atə huɗa nda tla tsa njir nəuwa.

³Ka Bulus na Barnabas səkar tə dzə 'ual hinda, nda kwa ɓwanya təkəra Tlakə a ləvər da wa. Ngə Tlakə tə chabiya jirikura mafakə kənda təkəra ɗanghali nyi, təwa nənda gyalkur mər səshinshin ana sər məngəl.

⁴Ngə njir mələm tə təkəbiyadza, alenya nji tə ɗa təwa njir Yahuda, alenya nji təwa changhabal inda.

⁵Kəl ngə alenya nji'inda pa'a njir Yahuda ka njir Yahuda, daɓə njirawawa'a kənda, tə ɓatliya ənda nda mərtə nda sər kuzhi ba'a vakənda nda na hangu.

⁶Kəl ja, nda ngabiya ga hwi yo mələm Listra ana Dyarba tə hə'i Likoniya ba'a hə'i nda tə ɓandə nda.

⁷A hinda nda biyama na bəzə Mafakə Mənakəu.

⁸Avu Listra vanya ndə təsəkən da tə ngya, nda nja ya nyi na hya cha kuɗəkuɗənyi, ya nacha ta ma'i pa'a wa.

⁹Nda Bulus kwa ɓwanya cho səhimi da cha. Ngə Bulus tə ndzam nyi ga la'a ənda jirikur nyi da, nda nja kwa nau mbandə nyi.

¹⁰Ngə Bulus tə har kurakə ga na, “Hya'atə ta'i tə hya ka!” Aku bəji nda ngə ndə nda hya'atə na fəla ga ghəya ma'i.

¹¹Nda dlama nji tə la'a sənda Bulus tə məra, ngə nda ghəya pə kurakə nda kwa na ana nya njir Likoniya, “Jan hyel i tə sə yada mən wi ndəu!”

¹²Ngə nda na Barnabas ngə Zeyus, Bulus tsəu Harmis, aka na cha ngə gau ɓwanya.[3]

¹³Ngə fərist katə Zeyus, nda na vi katə nyi biya tə ya mələm, tə shili na hahaldi i ana kata mambəl wu tə wulya nda ku lakur gu ta mələm, aka nacha ana dlama nji'inda kwa gwa'a nda hatəmachi nə ka Bulus.

¹⁴Sakanda kə'i Barnabas ana Bulus changhabal tə ngatə sənda nda kwa gwa'a məra, nda tanda ləkutə dzən nda ka nda char huɗətla ga məna hwi gwatə ghadar dlama nji'inda, nda har kurakə nda kwa na,

¹⁵“Ka bazhi, mya gwa'atə hyo mər nawa sa? Naea nji ea wi nahi. Mafakə Mənakə nə ea shili nə nəhi, eo dəkə hya sha yada Hyel nda na pi, nda ɓatlə huɗamələm ana hə'i, fa'a ana dəhə sə'inda kwa, hya ngyar nəu katəu aka a sakəda kənda da wa.

¹⁶Aku bəji nga tərabiya nga, Hyel tə ngyar dəhə nji'inda pa'a njir Yahuda nda mər sənda nda kwa i.

¹⁷Kəl ja, dəhə ka ənga, a da cha ta ngyar chabiya mən kərnyi təwa sə mənakə inda cha kwa mər wa. Cha kwa nə hi par səya kya huɗamələm, ya sə zwazwa kwa ɗa ku bəji kənda, cho nə hi sərsum nyaɓəu, ya cha kwa nyandə ɗufwa hi na hirgyaɗi.”

¹⁸Dəhə ka chul ngawa ɓwanya, dza'udza'u changhabal inda tə məra ga katə dlama tsa hatəmachi nə nda.

¹⁹Ahir nga, alenya njir Yahuda tə shili hya'atə vu Antakiya ana Ikoniya, nda gadlətə dlama nji'inda. Ngə nda vakənda Bulus na hangu, ga təɗəbiya nyi biya tə ya mələm, nda har ənda tətə cha.

²⁰Kəl ja, nda njir nəu tə tsəmtədzə ga ɓandə nyi, ngə cha hya'atə ga ɓəl gu ta mələm. Vanya zəkə nanda na Barnabas nda hya'atə ga təra yi Dyarba.

²¹Ka Bulus na Barnabas tə bəzə Mafakə Mənakəu vu Dyarba ga uya njir nəu Yesu ɗanghəu. Kəl ngə nda ɓəl yi Listra, Ikoniya ana Antakiya.

²²Nda tsakətə nyi dunama nə njir nəuwa ga tsətə nda ɗufəu, ənda nda gəzəya jirikur kənda tsa'anyata. Nda na, “Tuku məno sa ɓwaɓwatə pampaməu təvi məno gwa ku təlkur Hyel.”

²³Bulus na Barnabas tə ɗəmtsə njirawawa'a ku kala daɓədzər njir nəuwa, ana pətlənya ana səmdzən, nda tsau nda ku cha Tlakəu, ndə nda nda nənyi jiri.

²⁴Ahir nda tərabiya tahə hə'i Bisidiya, ngə nda shili tə hə'i Pamfiliya,

²⁵nda nda bəzə mafakə ku mələm Parga, ngə nda təra yo mələm Ataliya.

²⁶Hya'atə vu Ataliya nda ɓəl səkə yi Antakiya, a tangnda nja ɗaka tsau nda ku cha Hyel ka tlər nə nda wurandə sakanə na.

²⁷Ahir nda shili vu Antakiya, nda tsəmtə dəhə njir nəu ga dəkar nda dəhə sənda Hyel tə mər təwanə nda, ana ənda cha mbəɗiya nyi lakur jirikur nə nji'inda pa'a njir Yahuda.

²⁸Ngə nda hanyar pəchi hinda ka njir nəuwa.