Read nya huba Tlər kə'i Changhabal 16 Bible Online

Tlər kə'i Changhabal 16 - nya huba bible

Tlər kə'i Changhabal 16

¹Ka Bulus tə shili ku mələm Dyarba ahir nga nda təra yo mələm Listra, a hinda vanya ndər nəu da tləm nyi Timtawus. Ama nyi ndər nəuwa ya kwa Yahuda, kəl ja, ada nyi ndər Heleni.

²Njir nəu inda vu Listra ana Ikoniya kwa fal nyi.

³Bulus tə gwa'a cha hətə nyi ka cha ləbiya nyi, ngə cha tlanda nyi bədzang aka ga njir Yahuda inda na ngya tangnda la'a nda dləukər na Timtawus, aka zəndətə nda ənda Adanya Timtawus ndər Heleni cha.

⁴Nda nda kwa zhuli ka mələm ka mələm, nda kwa dəkə nə njir nəuwa, sənda kə'i changhabal ana wawa'ar njir nəu tə ɓatliya vu Urshalima, ka nda nəubiya.

⁵Kəl ngə njir nəu tə tsakətə ɗa na dunama ku jirikur, kəl tsakə nda kwa tsakə ɗangkur kala pəchi.

⁶Bulus ka bazhi ma'i nyi tə zhulitə ɓələr hə'i Firijiya ana Galati, aka Shanguɗə Karti tə katə nda tsa nda da gwatə hə'i Asiya ka bəzə mafakə Tlakəu.

⁷Manda nda shili tə ɓələr hə'i Misiya, ngə nda mər ka ga nda gwatə hə'i Bitiniya, kəl ja, ngə Shanguɗə Yesu tə katə nda.

⁸Kəl ngə nda təra tahə hə'i Misiya, ga təra səya Toruwas mələm nda nya dəl.

⁹Əvu'i pəshinda, shi'uni pəchi tə ɗa na Bulus, cha la'a ndər Makidoniya ta'iu, kwa gədi nyi cho na, “Səgwa ku Makidoniya ka ga ka vala ea.”

¹⁰Ahir shi'uni puchi nda, təma ea ɓatliya ka ea təra ya tə hə'i Makidoniya, aka zəndətə ea təkəɗə ənda Hyel ngə tə nga ea ka ga ea yi bəzə Mafakə Mənakə nə nda.

¹¹Ngə ea hya'atə ku param vu Toruwas ga təra yi Samotras tahə dəl, vanya zəkəu ea yi Niyapolis.

¹²A tangnda ea hya'atə ga təra yi Filibi, tangərmar mələm dəgal nda tə hə'i Makidoniya, nda tə kiɗa təlkur njir Roma, ngə ea ngya tangnda ga hanyar pəchi.

¹³Atə Pəchir Ngyaməngya ea biya ku mələm ga təra gwa nya dəl, ndə ea nda tsəu ea uya mbwa nda njir Yahuda kwa pətlənya ti. Ngə ea ngya ga ɓwanya nə mahi'i inda kwa tsəmdzə tangnda.

¹⁴Zhang ku pama njir səhimi da ea na cha ngə vanya malakə na tləm nyi Lidiya, ndər dzədza pa'ua nda nja pugu cha nda njo ɗəl na kwaba 'ualəu, hya'atə vu Tiyatira, ndər həsəli nə Hyel cha. Ngə Tlakə tə mbəɗiya ɗufwa cha ka ga cha səndzə himi mənakə da sənda Bulus kwa dəka ga nənyi jiri.

¹⁵Ahir nja mərtə nyi baɓtisma ka njir ki nyi, ngə cha nga ea, “Anda ma hya shili ngwaɓə ku ki ɗa, ma cha dləukərtə hi ənda naya ndər nəu Tlakə na jiri ya.” Ana ənga cha pətətə ea ngə ea təra.

¹⁶Vanya pəchi nda eo ma'i ya tə vir pətlənya nda, ngə ea ɓə na vanya kwatəra na vanya shanguɗə ku kəra cha nda kwa gwa'atə cho nau dəkə sə'inda kwa ɗa biyama. Kə'i tlakə nyi kwa uya kwaba 'ualəu təwa hakəzə nyi.

¹⁷Ngə cho maka nəu ea naea kə'i Bulus daɓə cho pə kurakəu cho na, “Nji'ina, mavi'i Hyel ndə nda tə Ndiya na Səli ina! Nda kwa bəzə nə hi ənda hya kwa ɗana mbəɗa!”

¹⁸Əngə tanyi cho na ənya əzəkəu. Kəl ngə huɗa Bulus tə tla, ngə cha sha ga nar nyi nə kwadzaɓi nda, “Aku tləmər Yesu Kəristi yo nar nghə ka biya ku cha!” Təma kwadzaɓi nda təkə nacha.

¹⁹Manda hyanjinyi tə la'a ənda lakur uya kwaba tsə'u da wa, ngə nda səya ka Bulus na Sila ga mbəlatə nda ya tə suku ya mar njir nəuma.

²⁰Nda nda shili mar njir nəuma, nda na, “Nji'ina, njir Yahuda ina, ya janə nda kwa gwazhiya mən mələm kəmən.

²¹Nda kwa dlədləɓə chul ngya inda gadlagadla kəmən tə katə namən njir Roma tsa dləukəri, ndara məna məra.”

²²Təma ngə dlama nji'inda dəhə tə ghəya daɓəsar təkəra nda, ngə njir nəuma inda tə tanda ləkutə dzər ka Bulus na Sila ga na, nja dəgə nda na zəwa.

²³Ahir nda pətlənda nda parahu, ngə nja vakəu nda gu jarum, ga tsau nyi bar nə ndə nda təkəra jarum nda, ənda cha ɓəla nda mənakəu.

²⁴Manda cha uya ngəna tsaubar, ngə cha təra na nda da'u da gwa, ga tsau nda ku gang.

²⁵Adala vu'i ka Bulus na Sila kwa pətlənya nda kwa na miya fal Hyel, alenya nji'inda tə mba ku jarum nda tsəu kwa səhimi da nda.

²⁶A tləkər da wa kəl hə'i tə dzədzi ga ngəngəɗətə hyavi jarum nda. Ɗəɗəu tanyi dəhə nyavi jarum nda tə mbəɗa, ngə dzəra lyang nda nja mbiya dəhə nji nə ku jarum nda tə tlətla.

²⁷Ndə nda təkəra jarum nda tə hya'ati, manda cha la'a nyavi jarum inda banghəu, ma cha fiya dəhə nji'inda ku jarum nda hwibiya ti, kəl ngə cha təsəbiya katsakər nyi cho gwa'a cha tsəya kərnyi.[6]

²⁸Kəl ja, Bulus tə har kurakə ga nar nyi, “Ngwa ka da takasiya kərnghə wa! Janə ea kəchipəu ku na!”

²⁹Ngə ndə nda təkəra jarum nda tə na nja shili na təkəsəu, ngə cha gwa na hwi ga bəzənda kərnyi mar ka Bulus na Sila daɓə dza cha kwa tsamətlaɗəu aka ləvəra.

³⁰Ngə cha təra na nda biya ga na, “Kə'i aləvara, mi sənda ya kwa mər ka ga ya uya mbəɗa?”

³¹Ngə nda wum ga na, “Nənyi jiri nə Tlakə Yesu, ko uya mbəɗə dəhə hi ka njir ki ngha.”

³²Ngə nda dəkətə nyi mafakə təkəra Tlakəu, ana nə dəhə nji'inda ku ki nyi.

³³Ku bəji nda tanyi əvu'i nda ndə nda təkəra jarum nda tə təra na nda ga chinda nda kəti dəgə inda. Ɗəɗəu tanyi nja mərtə nyi baɓtisma dəhə nda kə'i njir ki nyi.

³⁴Ngə cha təra na ka Bulus na Sila yo ki nyi ga yi nə nda sərsuma. Na cha ka njir ki nyi dəhə nda kwa mər hirgyaɗi gagaɗa aka nda nənyi jiri nə Hyel.

³⁵Manda vi tə wura ngə njir nəuma inda tə sə ləvaləva kənda yi nə dəgalər njir ɓəla jarum nda bəra, “Wunda ma nji nga nda təra.”

³⁶Kəl ngə ndə nda təkəra jarum nda tə nar nyi nə Bulus, “Njir nəuma tə na ənda nja wunda hi naka ana Sila, sakana hyo nau təra. Ma'i ma ku piyarɗufəu.”

³⁷Kəl ngə Bulus tə nar nyi nə ləvaləva inda, “A mar nji a tə babal nda dəgə ea, ga vakəu ea ku jarum, ya a da nja tlanda ea nəuma wa, madangə njir Roma ea wa. Nacha nə nda kwa gwa'a ka nja wuniya ea tə ɗəuwa? Abada! Nda shili na kərnənda, nda shili ləbiya ea biya.”

³⁸Ləvaləva inda tə ɓəl ga yi dəkar nyi ɓwanya nda nə njir nəuma inda. Manda nda ngatə ənda ka Bulus na Sila njir Roma inda, ngə ləvəra səya nda.

³⁹Kəl nda yi ga yi gədi farbikə tsa nda, ga ləbiya nda biya ku jarum nda, ga gədi nda, nda ngyar mələm nda.

⁴⁰Ka Bulus na Sila tə ngyar jarum nda, ga təra yo ki Lidiya. A hinda nda ɓə ka njir nəu inda, ga tsətə nda ɗufəu. Kəl ngə nda ngyar mələm nda.