Read nya huba Tlər kə'i Changhabal 19 Bible Online

Tlər kə'i Changhabal 19 - nya huba bible

Tlər kə'i Changhabal 19

¹Sakanda Apolos vu Korinti, Bulus tə zhulitə ɓələr hə'i nda, tsa'a vu Afisa. A hinda ngə cha həya alenya njir nəuwa

²ngə cha jau nda, “A dləutsətə hi Shanguɗə Karti ku bəji nda hya nənyi jiri nə Yesu nda ya?” Ngə nda wum ga na, “A'a, na ea ta ngatə ənda Shanguɗə Karti da ma'a wa.”

³Ngə Bulus tə jau nda, “Chul Baɓtisma manə ngə hya dləutsa?” Ngə nda na, “Chul Baɓtisma Yohana.”

⁴Ndə Bulus, “Baɓtisma nə Yohana ya, baɓtisma nə tubi nda. Cha nar nyi nə nji, nda nənyi jiri nə ndə nda kwa shili hi nyi, na cha ngə Yesu.”

⁵Manda nda ngatə ənga, ngə nja mərtə nda baɓtisma ku tləmər Tlakə Yesu.

⁶Ngə Bulus tə fəkə nda cha cha, ngə Shanguɗə Karti tə səya təkəra nda, ngə nda ghəya ɓwanya na alenya nya inda pa'a njo ngabiya, ana nda pə ɓwanya takər.

⁷Dəhə nda kwa ɗa nji kwabəmətləu.

⁸Ngə Bulus tə gu vi pətlənya cho bəzə mafakə gangkərtiyi, cha mər hya makər kala suku cho kəpal kə'i nda, cho təɗə jigadəma kənda, təkəra təlkur Hyel.

⁹Kəl ja, alenya nji tə ɗa ta nda kangaləu, nda ngyar nənyi jiri, nda pə ɓwanya ɗimi təkəra lakur Tlakəu. Kəl ngə Bulus tə ngya nda, ga hətə njir nəu kə'i cha, kala pəchi cha kwa dlədləɓə nə nda ku vi dlədləɓə vanya ndə na tləm nyi Tiranus.

¹⁰Fa mətləu nda mər tə mbwar mər ənga, ngə a ɗa dəhə ba nji'inda na ngya tə hə'i Asiya tə ngatə ɓwanya Tlakəu, njir Yahuda ana nji'inda pa'a njir Yahuda dəhəu.

¹¹Hyel tə mər səshinshin nda pa'a nji ta la'a təwa Bulus,

¹²tə ɗa ma'a pa'ua nda tsəkar dza cha, nja hətə ga ki tsəkar njir shiləkə ni, ya nda mbə na shiləkə kənda, məlləm tsəu tə biya ga ngya nda.

¹³Alenya njir Yahuda da, kwa ma'i ka mələm ka mələm nda kwa gədlə məlləm ku kəra nji, nda gwa'a nda mər tlər na tləmər Tlakə Yesu təkəra nji'inda na məlləm ku kəra nda. Nda kwa na nə məlləm, “Aku tləmər Yesu, nə Bulus kwa bəzə na, biyama!”

¹⁴(Alenya nji da məɗəfə nda nguli shili tə adan nda, nguli gau fərist nə njir Yahuda na tləm nyi Siba, dəhə nda kwa mər ngawa səu.)

¹⁵Kəl ja, məlləm nda tə wum ga nar nda, “Kwa zəndə ya Yesu, ya kwa zəndə ya Bulus, kəl ja ya, na hi wa hya?”

¹⁶Kəl ngə ndər məlləm nda tə fəl ngya da wulya nda, ga ndəɗə dunama kənda, ga zhində nda na dəga, ngə nda biya wiɗə ku ki nda na hwi dura'a ana takasa.

¹⁷Dəhə njir Yahuda ana nji'inda pa'a njir Yahuda inda na ngya vu Afisa tə ngatə nda na səu, ngə ləvər tə səya nda. Ngə nda hətə nyi səli nə tləmər Tlakə Yesu gagaɗa.

¹⁸Dang tanyi ku huɗa nji'inda tə nənyi jiri tə shili ga dəkəbiya sənda məra nda təwa hakəza tə babaləu.

¹⁹Ɗang ku huɗa nji'inda kwa hakəzə haaɗa, tə shili na likatəkatə hakəzə kənda dəhəu, ga nginda mar nji. Likatəkatə inda kwa ɗa kwaba zənariya dəbu tufkumnyi.

²⁰Nda na səu tə gwa'atə ɓwanya Tlakə tə wiɗa, ga tsakə dunama.

²¹Ahir nda dəhə sə inə tə ɗa, ngə Bulus tə ɓatliya ku ɗufwa cha ka cha yi Urshalima, cho ma'i tahə Makidoniya ana Akaya. Ngə cha na tsəu, “Ahir ya yi nda, tuku kəl ya yi Roma.”

²²Cha sə nji mətlə ku huɗa njir vala nyi yi Makidoniya, ka Timtawus na Arastus, nacha tsəu cha səkardzə tə hə'i Asiya.

²³Aku nda na bəji mwali tə hya'atə vu Afisa gagaɗa a təkəra lakur Tlakəu.

²⁴Vanya yakə dlə da na tləm nyi Dimitiriyus, ana azurfa cha kwa ɓatlə vi Artimis[7] malamalar katəu, na nda ka alenya njir ɓatlə sə ɓatləɓatlə kwa uya kwaba 'ual'ual gagaɗa ku ngə na tləra.

²⁵Kəl ngə cha tsəmtə nda, dəhə nda ka alenya nji'inda kwa mər ngawa tləra ga nar nda, “Nji, a zəndətə hi ənda lakur uya gəna kəmən nə tlər na.

²⁶Ya la'atə hi ga ngatə ənda Bulus na, a gwazhiya təkəra nji ɗang ga gadlətə nda. Cho na ənda hyel inda nja ɓatlə na chi, a da nda hyel dur wa. Ya sə nə cha mər na a da vu Afisa tanyi wa, kəl ja, ma'a dəhə hə'i Asiya.

²⁷A da kəl ka tlər kəmən kwa tar səli tanyi nə yo ɓwanya wa, kəl ja, mbwa'alə malamalar hyel Artimis kwa ɗa ka sə ɓwa'atanyi, ya cho tar səli nyi, madangə dəhə hə'i Asiya ana dunəya kwa həsəli nənyi.”

²⁸Manda dlama nji tə ngatə ngə na ɓwanya, kəl ngə huɗa nda tla, ngə nda ghəya pə kurakəu ndo na, “Dəgalkur ngya tə nə Artimis nə njir Afisa.”

²⁹Ngə njir mələm nda dəhə tə ghəya pə kurakəu. Ngə nji'inda səya Gayus ana Aristakus, njir Makidoniya mətlə inda tə ma'i ka Bulus nda, ga tsakərtə nda ya tə patla.

³⁰Bulus i tə cha go huɗa dlama nji'inda, kəl ja, njir nəu tə katə nyi.

³¹Alenya njirawawa'a hə'i nda, inda bazhinya Bulus tə sətə nyi mafakəu, nda kwa gədi nyi ngwa cha da ya tə patla nda wa.

³²Tsəmdzə nda tə wi nda kwa pə kurakəu, ngo pə nənyi ngo pə nənyi. Badəgal nji'inda tangnda da zəndə ndara mya gwa'atə nda tsəmtədzə tangnda ma'a wa.

³³Njir Yahuda tə mbəlatə Alekzanda biyama, ngə alenya nji tə har ənda nacha ngə tə gwa'atə nda na səu, kəl ngə Alekzanda tə har cha cha nja bəgəu, ka ga cha dəkar sənda ɗa.

³⁴Kəl ja, manda zəndətə nda ənda na cha ma'a ndər Yahuda cha, kəl ngə nda ghəya pə kurakə laku zhang dəhə nda, tə hətə kwa ɗa saka mətləu, nda kwa na, “Dəgalkur ngya tə nə Artimis nə njir Afisa.”

³⁵Kəl ngə ndər tsəfa, nə mələm Afisa tə bəgəya dlama nji. Ndə cha, “Nahi njir Afisa! Madawa zəndətə ənda mələm Afisa ngə kwa ɓəla mbwa'alə dəgal nə Artimis, hangu nda təɗə səya kya huɗamələm njo həsəli nənyi.

³⁶Aka ənga, manda a da cha sər kəpal wa, təki hya bəgə ngwa hya da mər sə na kusa wa.

³⁷Hya shili na nji'inə tangna, madangə a da nda pə ɓwanya ɗimi təkəra malamalar hyel kəmən wa, ya a da nda həltə madami ku mbwa'alə nyi wa.

³⁸Ma cha Dimitiriyus ka njir mər tlər nyi da na ɓwanya təkəra nda, vi nəuma da tangna, ya njir nəuma da tsəu, kwa nau nda wula.

³⁹Macha vanya sə da matsa ngə tsəu, hya yi nə ku daɓədzər njirawawa'a mələm nja yi ɓatla.

⁴⁰Aka ɓwaɓwatə da ma nja uya mən na bikə nə tlə mwali ku səna ɗa ənya na. Manda a da məno nau dəkar sənda gwa'atə nja tsəmtədzə njo pə kurakə wa.”

⁴¹Ahir nda cha pənda ənga, ngə cha wiɗənda tsəmdzə nda.