Read nya huba Tlər kə'i Changhabal 22 Bible Online

Tlər kə'i Changhabal 22 - nya huba bible

Tlər kə'i Changhabal 22

¹“Ka zamə ɗa ka Ada ɗa i, səya ma himi daya, yo dəkəbiya hi sənda tə ɗa.”

²Nda nda ngatə ənda cho ɓwanya nə nda ku nya kənda, nya njir Aramaya, ngə nda udə bəgə ɗiyu. Ngə Bulus tə na:

³“Naya ndər Yahuda ya, nja ya ɗa vu Tarsus a tə hə'i Kilikiya, kəl ja, tangnə ya həa, ga dlədləɓətə kiɗa maləm Gamaliyel. A tə kiɗa cha ya dlədləɓətə nəubiya gadlagadla jival kəmən mənakəu. Ngə ya ngya ka ndə nda kwa i mər tlər Hyel tang wi nə tə dəhə hi kwa ənya na.

⁴A ɗa tə ya məndza'u na njir nəu nəna laku, ga dlətsə nda, səya təya shili ka mahi'i dəhə yo fə nda ku jarum,

⁵gau fərist, ka dəhə njirawawa'a patla kwa nau dəkar hi ənda jiri ya. Atsa nda ya dləutsə tsəfətsəfər kainau i'i a yi nə kə'i zamən mən njir Yahuda inda vu Dimaska, aka ga ya yi fa'atə njir nəu nda hinda tə sə'i, ya ɓəl na nda dzəva Urshalima ga nja shili nənda ɓwaɓwatəu, ngə ya təra yi Dimaska.

⁶“Pəchi kaɗə ɗa tangkər ya ɗatə ea ləhə dza Dimaska, təma kəl wurək ya la'a vimbəlmbəl tə səya ki huɗamələm ga həu ɗa təhakəu.

⁷Ngə ya dla səya hu'i ya ngatə kurakə kwa na, ‘Shawulu, Shawulu! Mya gwa'atə ko ɗa məndza'u na ya əna?’

⁸Ngə ya jawa, ‘Nakə wa kə Tlakəu?’ Ngə cha na, ‘Naya Yesu nga ndər Nazarat, ndə nə ko ɗa məndza'u nə na.’

⁹Nji nda ea kə'iri inda la'atə vimbəlmbəl nda, kəl ja, a da nda ngatə kuraka ndə nda kwa ɓwanya na'a nda wa.

¹⁰Ngə ya jawa, ‘Mi sənda yo mər ja Tlakəu?’ Ngə Tlakə tə na, ‘Hya'atə ka təra gwa Dimaska, aku nda njo gwa dəkar nghə dəhə sənda nja ɓatliya ka ko məra.’

¹¹Nji nda ea kə'iri nda tə gəzəya cha ya ga təɗətə ɗa gwa Dimaska, aka vimbəlmbəl nda wuləfə nda tə lya ya.

¹²“Vanya ndə da tləm nyi Hananiya tə shili da ya. Na cha ndər nəu Hyel cha ndər ɓəlatə gadlagadla, ya dəhə njir Yahuda nda na gya ku mələm nda kwa la'a səli nyi gagaɗa.

¹³Ngə cha shili ta'i dzə ɗa ga na, ‘Zamə ɗa Shawulu, tə lya ka la'a sə səkəu!’ Aku ndana bəji tanyi kəl tə ɗa kwa la'a ya səu, ngə ya la'a nyi tsəu.

¹⁴“Ngə cha na, ‘Hyel nə ka jival kəmən tə tabiya nghə ka ga ka zəndə sənda cho i ana ka la'a Ndə Nda Tsa'atsa'a, ana ka ga ka ngatə ɓwanya ku nya cha.

¹⁵Tuku ko ɗa ka matauli nyi nə dəhə nji təkəra sənda ka la'a, ana sənda ka ngati.

¹⁶Nəchanə ya, mi nə ko səka? Hya'atə nja mərtə nghə baɓtisma, ga nja chinda səpəla'a ngha, təwa nga tləmər Tlakəu.’

¹⁷“Ngə ya ɓəl gwa Urshalima, sakanda ya kwa pətlənya ku Mbwa'alə Hyel, kəl ngə shi'uni pəchi tə ɗa naya.

¹⁸Ku shi'uni pəchi nda ya la'a Tlakə kwa ndəra. Cha nar ɗa. ‘Kusa ka ngyar Urshalima, aka nji nə da kwa dləukər ɓwanya nda ko pə təkəra ya wa.’

¹⁹Kəl ja, ya wum ga na, ‘Tlakəu nji nə zəndətə ənda ya kwa ɗaka gwa ku vi pətlənya pampaməu, yo sə njir nənghə jiri yo mbiya nda, yo dəgə nda.

²⁰Ku bəji nda nja tsəya Istifanus ndər pə ɓwanya təkəra ka, naya təkərɗa tangnda ya, ya dləukərtə ya ənda nja tsəya nyi, na ya tə ɗa ka ndər ɓəla daura nji'inda tə tsəya nyi.’

²¹Ngə Tlakə tə nar ɗa, ‘Ma'i, ya kwa sə nghə naɗəu kyada nji'inda pa'a njir Yahuda.’ ”

²²Dlama nji'inda tə səhimi da Bulus ba'a tə bəji nda cha ɓwanya təkəra ma'i kyada nji'inda pa'a njir Yahuda. Kəl ngə nda har kuraka nda 'ual'ual nda kwa na, “Tsəya nyi nji, təkəbiya nyi nji na dunəya!”

²³Nda nda kwa pə kurakə nda, nda kwa səɗə daura kənda nda kwa vakənda, nda kwa uchə bərbər.

²⁴Ngə dəgal ləvaləva tə na nja təra na Bulus gu ngakə ləvaləva inda. Cha nar nda nja dəgə nyi na wuɗa nja jaubiya nda mya gwa'atə nji kwa pə kurakəu təkəra cha.

²⁵Nda nda mbiya nyi na dzəra, ka nda dəgə nyi, ngə Bulus tə nar nyi nə vanyi dəgalər ləvaləva nda tə ta'i tangnda, “Tsa'atsa'a tanyi ja ku gadlagadla hya dəgə ndər Roma, ya a da nja mərtə nyi nəuma wa?[10]”

²⁶Nda dəgal ləvaləva nda ngatə ənga, ngə cha yi nar nyi nə gau kənda. “Mi sənda ko mər ja? Ndə na ndər Roma na.”

²⁷Ngə gau ləvaləva nda yada Bulus ga jau nyi, “Dəkar ɗa jiri, nakə ya ndər Roma kə ya?” Ngə Bulus tə na, “Ah, ndər Roma ya.”

²⁸Ngə gau ləvaləva nda tə na, “Kwaba 'ualəu ya kinda təvi ya ɗa ka ndər Roma.” Ndə Bulus, “Naya na'a ja, ndər Roma ya tsikəm.”

²⁹Nda ləvaləva inda kwa gwa'a jau nya Bulus tə ngatə ənga, ngə nda tsaɗəndadza ga bəgə ta nda. Dəgalər ləvaləva nda təkərnyi ma'a ləvər tə səya nyi nda cha ngabiya ənda Bulus ndər Roma cha, ya janə cha mbiya nyi ti.

³⁰Vanya zəkəu, nda gau ləvaləva nda tə gwa'a cha zəndəbiya təkəɗər sənda njir Yahuda kwa wula Bulus təkəri, ngə cha na nja wuniya nyi ga na nja nar nyi nə wawa'ar fərist ana dəhə njirawawa'a patla nda tsəmtədza. Kəl ngə cha shili na Bulus ga ta'ində nyi a manə nda.