Read nya huba Tlər kə'i Changhabal 28 Bible Online

Tlər kə'i Changhabal 28 - nya huba bible

Tlər kə'i Changhabal 28

¹Manda ea mbəɗə biya nya bam, ea ngabiya ənda atə hə'i nda dəl dəgal tə ɓandə njo nga Malta nda ea.

²Nji'inda na ngya tangnda, tə char ea mənakəkur gagaɗa. Nda gəɗiya ea hu'u ga lali ea aka par kwa təɗa ya gyang shishi'u.

³Bulus tə tsəmtə shishiɗi shilə'u, nda cho pə gu hu'u, kəl janə tsapəu nda kwakwaɗəkura hu'u tə məbiya tə ngaliya nyi ndaɓalɓal tə cha cha.

⁴Nda nji'inda na ngya tangnda tə la'a pwabu nda kwa sə shashalizha tə cha cha, ngə nda na nə kərnənda, “Ndə na tuku ndər tsa ndə na, madangə cha mbəɗə ku fa'a, janə shafa səya nyi ti kəl cha tah.”

⁵Kəl ja, Bulus tə kwa'atla'anda pwabu nda gu hu'u ya sə da uya nyi wa.

⁶Nji kwa hari ənda dza cho mba ndara cho dla ba'a tah, kəl ja, ahir nda səkə nə bəji 'ualəu ya a vanya sə da uya nyi wa, ngə nda shar jigadəma kənda ga na, vanya hyel cha.

⁷Ləhə tangnda vanya babal da nə Shal mbwa nda ana tləm nyi Pabiliyus. Cha dləutsə ea gu ki nyi ga nə ea mbwar hanyi nə hanyi makərəu.

⁸Adanya Pabiliyus tə piya na shiləka, gyang ana təa kwa tənyi. Ngə Bulus tə gwa da cha, ahir cha pətlənya, cha fəkə nyi chi ga mbandə nyi.

⁹Manda səngə tə ɗa, həyadzər njir shiləkə inda tangnda tə shili ya nja mbandə nda.

¹⁰Nda la'a səli kəea ku laku ɗanghəu, ya nda ea biya ka eo təra, nda nə ea kala sə'inda eo gwa'a.

¹¹Ahir hya makərəu, ea ghəya ma'i ku param njir Alekzandariya nda həbiya fwakə tə hə'i nda dəl dəgal tə ɓandi, nja mərtə vanya sə biyo nyama cha wi ɓəli hyel.

¹²Nda ea shili Sirakus ea ngya tangnda hanyi makərəu.

¹³Hya'atə tangnda tsəu ku param ga shili Rigiyum. Vanya zəkə gyang tə hya'atə təwa holma ga shili, ahir hanyi nda kwa nəu nacha nda, ea shili Putiyoli.

¹⁴A tangnda ea həya alenya njir nəuwa, ngə ea hanyi məɗəfə kə'i nda. Əngə ea shili Roma.

¹⁵Nda njir nəu inda vu Roma tə ngatə bəra eo yi, alenyi nji tə shili dləu ea tə Suku Apiyus, ana alenya nji tsəu tə dləu ea tə mbwa nda njo nga Vi Dləu Mihiɓi Makərəu. Nda Bulus tə la'a ənda, cha usaku Hyel, ətsəu cha uya tsəɗufəu.

¹⁶Nda ea shili Roma, nja ngyar Bulus cha ki ngya ku ki nda cho i, madangə ləvaləva da kwa ɓəla nyi.

¹⁷Ahir hanyi makərəu, Bulus tə ngatə njirawawa'a Yahuda nda vu Roma tə mbwar zhang. Nda nda tsəmtədza, ngə cha nar nda: “Ka zamə ɗa, madangə sə da ya zandə nyi nə nji kəmən, ndara nə sər jival kəmən wa, nja səya ɗa vu Urshalima ga lətə ɗa nə njir Roma.

¹⁸Manda nda jaubiya nya ya ngə nda kwa i nda wuniya ɗa, aka a da nda səya ɗa na bikə nda njo kina tsəya ɗa wa.

¹⁹Kəl ja, nda njir Yahuda tə ngyar dləukəri, nga ɗa tuku na'a ya shili na wula ɗa mar Kaisar, madangə a da ka ya wula na'ana nji wa.

²⁰Nacha nə sənda gwa'atə ya tsəm hi ga məna ɓwanya təkəri. Nja mbiya ɗa na dzəra lyang na, a təkəra fəkər njir Isra'ila.”

²¹Nda wum ga na, “A da ea uya kainau təkəra kə hya'atə vu Yahudiya wa, ya vanya ndə da ku huɗa zamən mən nda tə shili na kurakə ndara tə par ea səɗimi təkəra kə wa.

²²Kəl ja, eo i ea ngatə sənda ku jigadəma ngha, aka kwa zəndə ea ənda mada a mani, nji ɗang kwa ɗa tsa chul ngəna nəuwa.”

²³Ngə nda fiya bəjir ɓə kənda ka Bulus, nda shili nanda ɗang nda gagaɗa ga həya nyi ku ki nda cha kwa nda. Bulus tə ghəya ɓwanya mbudla ba'a akəu, cha kwa dəka ana bəzə nənda təkəra təlkur Hyel cho gwa'a cha chabiya nda sə təkəra Yesu ku gadlagadla Musa ana ku ɓwanya njir mətakər Hyel.

²⁴Alenya nji tə dləukər na sənda cha nar nda, kəl ja, alenyi nji da nənyi jiri wa.

²⁵Nda a da nda dləukər na kərnənda wa, ngə nda ghəya wiɗa ahir nda Bulus tə nar nda ɓwanya batəbatə nənna: “Jiri nda ɓwanya Shanguɗə Karti tə na nə jival kəhi təwa Ishaya ndər mətakər nda:

²⁶Ma'i yada nji'ina ka yi nar nda, hyo ngatə kəl ja, a da hyo ngabiya wa, hyo ndzama ya a da hyo la'a pa'a wa.

²⁷Aka ɗufwa nji'inə ɗatə ɓaɓaləu, hima nda do ngatə sə wa, ya məkənda tə nda lya nda, tsa nda da la'a. Tsa nda da ngatə na hima nda, tsa nda da ngabiya na ɗufwa nda aka ənga a da nda kwa sha, ga ya mbandə nda wa.

²⁸“Aka ənga yo i hya zəndə ənda Hyel tə sətə dləuya nyi nə nji'inda pa'a njir Yahuda, ya nda kwa səndzə himi.”[15]

³⁰Bulus tə ngya fa mətləu, cho ki kwaba təkəra ki nda cho ngya kwa, ya cho lali dəhə ndə nda tə shili da cha.

³¹A tə babal cha bəzə mafakə təlkur Hyel, ana cho dlədləɓə təkəra Yesu Kəristi a ndər katə nyi da wa.