Read nya huba Tlər kə'i Changhabal 3 Bible Online

Tlər kə'i Changhabal 3 - nya huba bible

Tlər kə'i Changhabal 3

¹Vanya pəchi Bitrus ana Yohana kwa ma'i gyo Mbwa'alə Hyel tə bəjir pətlənya, a tə pəchir akəu ku bəji saka makərəu.

²Vanya ndə da nda nja yah gadal anya vanya nyavi nda njo nga nyavi Gumaguma, kala pəchi njo fiya nyi a nyavi nda ka ga cha gədi tsa nji'inda kwa shili gwa ku Mbwa'alə Hyel nda.

³Manda cha la'a ka Bitrus ana Yohana kwa gwa ku mbwa'ala, ngə cha gədi kwaba tsa nda.

⁴Ngə nda pəkə nyi li, ngə Bitrus tə nar nyi “Ndzam ea!”

⁵Ngə cha ndzamar nda, cho har ənda cho uya vanya sə tsa nda.

⁶Kəl Bitrus tə nar nyi, “A bəjingha ndara azurfa da tsa ya pa'a wa, kəl ja, yo nə ngha sənda tsa ya. Aku tləmər Yesu Kəristi ndər Nazarat yo nar ngha, hya'ati ka ma'i!”

⁷Ngə cha gəzəya chisəma cha ga hya'andə nyi. Təma hya ndə nda ka hwahwangha cha tə ɗa na dunama;

⁸ngə cha fəla, ga ta'i tə hya cha ga ghəya ma'i. Kəl ngə cha gwa ku Mbwa'ala Hyel nda kə'i nda, cho ma'i cho fəla cho fal Hyel.

⁹Nji nda tangnda tə la'a ənda cho ma'i cho fal Hyel.

¹⁰Nda nda ngabiya ənda ndər gədi nda kwa ngya anya nyavi mbwa'alə nda njo nga gumaguma nda nga, kəl nda mər məngəl gagaɗa ana sənda tə ɗa na cha.

¹¹Tsə'u tanyi ndə nja mbandə nda kwa gəzə ka Bitrus ana Yohana, dəhə nji'inda kwa mər məngəl, nda mə na hwi yada nda, ya tə kiɗa madləɓa nda njo nga “Madləɓa Saloman.”

¹²Nda Bitrus tə la'a nji'inda, ngə cha nar nda, “Kuvaɗa njir Isra'ila, anyar mi hyo mər məngəl təkəra chul nawa sa, ya anyar mi hyo ndzam ea? Hyo jigadəma ndara gyalkur kərnəea ana durdurkur kərnəea ngə tə gwa'atə ndə na ma'i ya?

¹³Hyel nə Ibrahim, Ishaku, ana Jakop, Hyel nə jival kəmən, tə nənyi səli nə mava nyi Yesu. Kəl ja, hya səya nyi ga nənyi nə njir təlkur ka nja tsəya nyi, hya ngya nyi mar Bilatus, madangə Bilatus ɓatliya tə ka cho wuniya nyi.

¹⁴Na cha ndə kəla bikə ndə tsa'atsa'a, kəl ja, hya ngya nyi ga gədi Bilatus cha dəliya hi ndər tsa ndəu.

¹⁵Hya tsəya ndə nda tlakər pi, ya ngə Hyel tə hya'andə nyi ku hwa, naea a la'atə sə'inga.

¹⁶Gyalkur nda ku tləmər Yesu ngə tə nənyi dunama nə ndər gadal na, kwa zəndə nyi hi. Təwa jirikur ku tləmər Yesu ngə ndə na uya mbəa, wi nə hyo la'a na.

¹⁷“Nəchanə ja ka zamə ɗa, a zəndətə ya səngə hya mərtə nyi nə Yesu nahi ka wawa'a kəhi nga, hya mər nyi ku tar zəndəkur kəhi nga.

¹⁸Hyel natə parang a təwa dəhə njir mətakər ənda Kəristi kwa sa ɓwaɓwatəu, təwa əngə ngə Hyel tə nyabiya sənda cha na.

¹⁹Tubi ma ja, hya shili da Hyel, ga cha farbikər səpəla'a kəhi,

²⁰aka bəjir uya dunamar Shanguɗə kwa shili tsa Tlakəu, ya cho sətə Yesu, nda na cha ngə Kəristi nda cha tabiya hi.

²¹Tuku cho ngya kya huɗamələm kəl bəji tə ɗa nda dəhə sə kwa ɗa bul, wi nda Hyel tə na a təwa njir mətakər karti nyi inda haaɗa.

²²Aka Musa tə na, ‘Hyel Tlakən hi kwa sətə hi ndər mətakər wi naya, ya cho ɗa zhang ku huɗa njikə hi. Tuku ngə ja, hya səhimi da sənda cho dəkar hi.

²³Kala ndə nda pa'a kwa səhimi da ɓwanya ndər mətakər ngə wa, njo həbiya nyi ku huɗa nji'inda nə Hyel ba'a tsəya nyi.’

²⁴“Ya dəhə njir mətakər ghəya tə Sama'ila, ana nji'inda tə shili a hi nyi tsə'u a ɓwanya tə təkəra hanyi ina.

²⁵Nahi ingə tə fa'aki alkawal nda Hyel tə mərtə nyi nə jival kəhi təwa njir mətakər nyi. Wi nda cha nar nyi nə Ibrahim, ‘A təwa nyandəla ka yo fəkənyi papa'akur nə dəhə njir dunəya.’

²⁶Aka əngə ngə Hyel tə tabiya ga sə tə hi mava nyi tangərma, ka cha nə hi papa'akur təwa shandə madawa ku pama hi tsa mər zazaɓəkur.”