Read nya huba Tlər kə'i Changhabal 5 Bible Online

Tlər kə'i Changhabal 5 - nya huba bible

Tlər kə'i Changhabal 5

¹Vanya ndə da, tləm nyi Hananiya ana mala nyi Safəratu, nda ɗəlnda vanya zər sənda tsa nda.

²Ngə nda mbatə nya na mala nyi, ga tanda kwaba nda ga ɗəwanda, ga shili nənyi həyadzənyi nə Changhabal inda.

³Ngə Bitrus tə nar nyi, “Hananiya, mya gwa'atə ka ngyar Shantan tə gəla ɗufwa ka? Ka tliyanyi gəzhi nə Shanguɗə Karti, ga tanda kwaba sənda ka ɗəlnda ga ɗəwanda?

⁴Təvi ka ɗəlnda səu nda ya, a nənghə nda ma? Ahir ka ɗəlnda ya, a kwaba nghə nda ma? Mya gwa'atə ja ka mər chul ngəna sa? A da a nə nji nə tliya kə gəzhi wa, a nə Hyel ngani.”

⁵Nda Hananiya tə ngatə ənga, ngə cha dla ga tah; nda dəhə nji tə ngati, ngə ləvər tə səya nda.

⁶Kəl nguli tlakala tə gwa baɗəu nyi ku sər haɗa, ga ki haɗiya nyi.

⁷Ahir wi saka makərəu kəl janə mala nyi tə shili gwa, a cha zəndə sənda tə ɗa wa.

⁸Ngə Bitrus tə jau nyi, “Par ɗa, dəhə sənda hya dləutsə ku fa kəhi na sal nghə nə ya?” Ngə ndə cha, “Ah wuɗəkənyi nga.”

⁹Ngə Bitrus tə nar nyi, “Anyar mi hya ɓatliya na sal nghə ka hya dzə Shanguɗə Tlaka? Jan tlakala inda ki haɗə sal nghə inda ta'i ku nyavi, ya nda kwa shili təra nakə tsə'u.”

¹⁰Tangnda tanyi cha dla ma nyi ga tah. Ngə nguli tlakala tə gwa ga la'a a wurtə cha tah, ngə nda həbiya nyi biya ga haɗiya nyi dzər sal nyi.

¹¹Ngə ləvər tə səya dəhə njir nəuwa ana dəhə alenya nji'inda tə ngatə səngə gagaɗa.

¹²Ɗang tanyi səshinshin ana sər məngəl inda Changhabal Yesu inda tə məra ku huɗa nji. Dəhə njir nəu tsəu kwa nyida tsəmtədzə da kiɗa mənga Saloman.

¹³Aku huɗa nji'inda pa'a da ku pama njir nəu inda, a ndə da tə nau mbiyahuɗə ga gwa ku pama nda wa, madangə dəhə nji kwa la'a səli kənda.

¹⁴Kəl ja, ba njir nəu kəl tsakə nda kwa tsaka, dlama mahi'i ana shili kwa nənyi jiri nə Tlakəu.

¹⁵Aka sənda Changhabal inda kwa məra, njo biya pinda njir shiləkə anya laku a tə kəlabu ka sərpiya kənda ga shanguɗa Bitrus təra təkəra nda ma cho ma'i.

¹⁶Dlama nji tə shili aku mələm inda tə ɓandə Urshalima, nda shili na njir shiləka, njir məlləm; ngə nda uya mbə dəhə nda.

¹⁷Kəl ngə gau fərist ka njir Saduki, kwa ndahuɗə Changhabal Yesu inda 'ual'ualəu, ngə nda ɓatliya sənda nda kwa mərtə nda.

¹⁸Ngə nda hya'atə ga səya Changhabal Yesu inda ga pəu nda ku jarum.

¹⁹Kəl ja, aku vu'i nda ngə Chama Tlakə tə səya mbəɗiya nyavi jarum inda, ga fa'abiya Changhabal inda, ngə cha nar nda,

²⁰“Təra ma hya ki ta'i ku Mbwa'alə Hyel, hya dəkar nyi nə nji dəhə sənda təkəra pi nda ba'anawa.”

²¹Ngə Changhabal inda tə dləukəri, tsəɗakə mbudla nda ki gwa ku Mbwa'ala Hyel ga ghəya dlədləɓa. Ngə gau fərist ka njir mər tlər nyi, ana dəhə wawa'ar njir Isra'ila tə tsəmtədza, ga sə alenya nji ku pama nda ka nda ki shili na changhabal inda ku jarum nda a huɗən nda.

²²Kəl ja, sakanda njir ɓəla Mbwa'ala Hyel nda tə yi ku jarum nda, a da nda həya nda wa, ngə nda ɓəl shili da daɓədzə nda ga dəkar nda.

²³“Nda ea yi ku jarum nda, ea həya tə haɗa ya dəhə njir tsakəra jarum nda a nyavi i kwa ɓəla. Kəl ja, nda ea mbəɗiya nyavi, a ndə nda ku nda wa.”

²⁴Nda dəgalər njir tsakəra mbwa'ala Hyel ka wawa'ar fərist tə ngatə ngəna səu, nda wi nda kwa ɗəngha təkəra ndara mi tə ɗana changhabal inda.

²⁵Kəl ngə vanya ndə tə shili gwa, ga nar nda, “Səya ma himi! Wula nji'inda hya pəu ku jarum inda hyo mbwa'ala Hyel kwa dlədləɓə nə nji!”

²⁶Kəl ngə dəgalər njir tsakəra mbwa'ala Hyel nda ka njir mər tlər nyi tə təra ga ki shili na changhabal Yesu inda. A da na tuku wa, aka nda kwa ləvər nja da vəvakənda nda na hangu.

²⁷Nda shili na changhabal inda, ga ta'ində nda mar njirawawa'a inda tə tsəmtədzə nda, kəl ngə gau fərist nda nar nda,

²⁸“Ea tsau hi bar ənda ngwa tsəu hya dlədləɓə ku tləmər ndə nə wa, kəl ja, la'atə hi sənda mərtə hi! Janə hya wurabiya tə Urshalima dəhə na dlədləɓə kəhi, ana ma'a hya kwa char ənda bikə kəea ngə tə nyi!”

²⁹Bitrus ka alenya changhabal inda tə wum ga na, “Tuku eo ngatə nya Hyel, a da nə nji wa.

³⁰Hyel nə jival kəmən tə hya'andə Yesu ku hu na pi, ahir hya kukwanda nyi ga tsəya nyi kyatə taməngəla.

³¹Hyel tə hya'andə nyi ga fiya nyi tə mbwar səli tə chisəma cha, cha ɗa Dəgal ana Ndər Dləuya, ga njir Isra'ila tubi nja farbikər səpəla'a kənda.

³²Na ea ngə matauli nə səna, ba'a Shanguɗə Karti, nda Hyel tə nənyi nə nji'inda kwa ngatə nya cha.”

³³Nda njirawawa'a inda ku tsəmdzə nda tə ngatə ənga, ngə huɗa nda tla gagaɗa, təma nda gwa'a nja kuɗənda changhabal inda.

³⁴Kəl ja, zhang ku pama nda, ndər Farisi tləm nyi Gamaliyel, maləm gadlagadla Musa, dəhə nji tsə'u kwa la'a səli nyi. Cha hya'atə ga na ənda ja təra na changhabal Yesu inda biya gwadagəu.

³⁵Ngə cha nar nyi nə tsəmdzə nda, “Njir Isra'ila, hya ɗa na sənam təkəra sənda hyo gwa'a mər nə nji na.

³⁶Hya ɗənghatə ənda Tudas tə shili aku bəji nga təra yahi nga, cha char ənda na cha ndə dəgal cha, nji kwa ɗa gharəu fwaɗəu tə nəu nyi. Kəl ja, nja tsəya nyi, dəhə njir nəu nyi inda tə wiɗa, dəhə sə'inda cha mər tə ɗa ka sə ɓwa'atanyi.

³⁷Ahir nga, Yahuda ndər Galili tə shili aku bəjir jiga nji; cha təɗə dlama nji ya dzə nyi, na cha ma'a nja tsəya nyi, ngə njir nəu nyi inda wiɗa.

³⁸“Ngwa ya təɗar hima hi, ngwa hya da mər madami nə nji'inə wa. Ngya nda ma tsəka'a! Ma cha sə'ingə nda ɓatliya ana sə'ingə nda kwa mər nga tlər ndə nga, a da kwa ta'i wa.

³⁹Kəl ja, macha tsa Hyel ngə hya'atə cha, a da hyo nau kura nda wa. Hya da nda ghahə na kərnəhi hya kwa pa na Hyel!”

⁴⁰Ngə nji'inda dləukər ɓwanya Gamaliyel nda. Kəl ngə nda nga changhabal Yesu inda gwa, ga tlatə nda na wuɗa ga tsau nda bar ənda ngwa tsəu nda tsakətə ɓwanya ku tləmər Yesu wa; ga wuniya nda.

⁴¹Changhabal inda tə hya'atə mar tsəmdzə nda na hirgyaɗi, ənda Hyel tə fiya nda ka nji nda tə nji ka nda sa kuzhi ana ɓwaɓwatə tə nyar Yesu.

⁴²Mada sakamani, ku mbwa'ala Hyel ana ka ki ka ki a da nda ta'ində dlədləɓə sə nə nji ana bəzə Mafakə Mənakə a təkəra Yesu Kəristi wa.