Read nya huba Tlər kə'i Changhabal 6 Bible Online

Tlər kə'i Changhabal 6 - nya huba bible

Tlər kə'i Changhabal 6

¹Nda ɗangkura njir nəu kwa tsaka ku nda na bəji, ngə huhuni tə hya'ati ku pama nda. Njir Yahuda inda kwa pə nya njir Heleni kwa na ənda, a njir Yahuda inda kwa pə nya aji da kwa ɗənghatə na mahi'ifi kənda ma njo təkə sərsuma wa.

²Kəl ngə changhabal Yesu kwabəmətləu inda tə nga njir nəu dəhəu tə mbwar zhang ga na, “A da ɗa tsa'atsa'a ea ngyar bəzə Mafakə Mənakə nə Hyel aka ga ea təkə sərsum wa.

³Aka əngə ja kə'i zama, ɗəmtsə ma nji məɗəfa ku pama hi, njir səli ana nji'inda nja zəndə na Shanguɗə Karti ana dəma, mən fəkə nda təkəra tlər na.

⁴Na ea nəkəea ja, eo fiya bəji kəea ka pətlənya ana tlər bəzə mafakə nə Hyel.”

⁵Dəhə njir nəuwa tə mər hirgyaɗi na ɓwanya changhabal Yesu inda. Ngə nda tabiya Istifanus, ndə nda na jirikur tə nyandə ɗufwa cha tsa'a na Shanguɗə Karti, ana Filibus, ana Purokoras, ana Nikanar, ana Timon, ana Barminas, ba'a Nikolas ndər Antakiya, (a da cha ndər Yahuda wa kəl nda cha sha yo lakur nəu Hyel nə njir Yahuda).

⁶Ngə njir nəu inda tə shili na nji'inda nda ɗəmtsə inda nə changhabal Yesu, ngə nda pətlə kənda nya ga səkənda papa'akur təwa fəkə nda chi.

⁷Əngə tanyi ɓwanya Hyel tə wiɗətədzə. Ɗangkura njir nəu vu Urshalima kwa tsakə gagaɗa, ana ma'a fərist njir Yahuda ɗang tə dləukəri na lakur jirikur.

⁸Istifanus ndə nda ɗanghali ana gyalkur Hyel tə nyandə nyi, tə mər səshinshin ana sər muniya wawa'a aku huɗa nji.

⁹Kəl ja, alenya nji da ku vi pətlənya nda njo nga Vi Pətlənya nə nji Dimu avu Sayirin ana Alekzandariya ana alenya nji hya'ati tə hə'i Kilikiya ana Asiya tə ghəya kəpal Istifanus.

¹⁰Kəl ja, a da nda nau chiya Istifanus na ndər wa, aka Shanguɗə Hyel tə tsakətə nyi dəma.

¹¹Ngə nda uya alenya nji ga diya nda vangula ngə nda na “A ngatə tə ea ənda cho ngəl Musa ana ma'a Hyel.”

¹²Ana əngə nda hya'andə ɗufwa nji, dəhə ka njirawawa'a inda, kə'i maləm gadlagadla Musa. Ngə nda shili səya Istifanus ga təra na cha yo cham njirawawa'a.

¹³Ngə nda gwa na alenya nji da'u ka ga nda tlandzə nyi gəzhi, nda na “Ndə nənna a bəji nda cha kwa ɓwanya kəla cho ngəl Mbwa'alə Hyel nda karti ana gadlagadla Musa wa.

¹⁴Aka a ngatə nyi tə ea cha kwa na ənda Yesu ndər Nazarat kwa huɓənda Mbwa'alə Hyel na, daɓə cho shandə sər jul kəmən nda Musa tə dləutsə mən.”

¹⁵Dəhə njirawawa'a inda tə tsəmtədzə ku cham nda tə pəkə nyi li nə Istifanus, manda nda kwa ling nyi, kəl ngə nda la'a huɗəma cha tə shabiyadzə wi nə Chama Hyel.