Read nya huba Tlər kə'i Changhabal 8 Bible Online

Tlər kə'i Changhabal 8 - nya huba bible

Tlər kə'i Changhabal 8

¹Shawulu zhang cha ku nji'inda dləukəri nja tsəya Istifanus. Pəshinda tanyi njir nəu inda vu Urshalima tə ghəya sa ɓwaɓwatə aka chul məndza'u nda nda gwa kwa. Dəhə njir nəu tə wiɗə kyatə hə'i njir Yahudiya ana Samariya, kəl nda changhabal Yesu inda ngə pa'a da tə hwi.

²Alenya njir ləvər Hyel tə shili hətə Istifanus ga ki haɗiya nyi, nda tiwi dəgaldəgal təkəra cha ana sə'ingu.

³Kəl ja, Shawulu kwa ɗa məndza'u na njir nəuwa, ka ki ka ki cho ma'i, cho sə njir nəuwa, mahi'i ka shili, cho pəu nda ku jarum.

⁴Njir nəu inda tə wiɗə inda, kwa bəzə Mafakə Mənakə mada a bar nda ma'i.

⁵Filibus tə təra yo mələm dəgal nə Samariya, cha kwa bəzə Mafakə Mənakə təkəra Kəristi.

⁶Nda dlama nji tə ngatə sənda Filibus kwa pəa, ga la'a səshinshin inda cha kwa məra, ngə dəhə nda tə səya himi da sənda cho na.

⁷Məlləm tsəu tə biya ku kəra nji ɗanghəu ana ləlla, nji nda dza nda tə kuɗiyadza ana njir gadal tə uya mbəa.

⁸Aka ənga hirgyaɗi tə ɗa gagaɗa aku mələm nda.

⁹Vanya ndə da ku mələm nda ana tləm nyi Shiman, ndər hakəzə cha, cha kwa shakər nə njir Samariya ana bushin nyi. Cho bukər nyi ənda ndə dəgal cha.

¹⁰Kala ndə nda vu Samariya, nji'inda na dəgalkur, ka wanakar nji kwa səhimi da sənda cho dəka. Nda kwa na “Ndə na gyalkur Hyel cha nda njo nga Dəgaləu.”

¹¹Nda kwa səhimi da cha aka kwa nənda məngəl ana bushin nyi nə bəji 'ualəu.

¹²Kəl ja, manda nda nənyi jiri nə Mafakə Mənakə nda Filibus kwa bəzə təkəra təlkur Hyel ana tləmər Yesu Kəristi, ngə nja mərtə nda baɓtisma, mahi'i ka shili.

¹³Shiman na kərnyi tsəu tə nənyi jiri; ahir nda nja mərtə nyi baɓtisma, cha ɗa ləhə dzər Filibus, cha mər məngəl manda cha la'a sər muniya ana səshinshin nda Filibus tə məra.

¹⁴Sakanda changhabal Yesu inda vu Urshalima tə ngatə ənda njir Samariya dləutsətə ɓwanya Hyel, ngə nda sətə nda ka Bitrus ana Yohana.

¹⁵Nda nda yi, ngə nda pətlə kənyi nya nə njir nəuwa aka nda dləutsə Shanguɗə Karti.

¹⁶Aka a Shanguɗə Karti da ta səya təkəra mada zhang lya nda wa, aka baɓtisma tanyi ngə nja mərtə nda aku tləmər Tlakə Yesu.

¹⁷Kəl ngə ka Bitrus ana Yohana tə fəkə nda chi, ngə nda dləutsə Shanguɗə Karti.

¹⁸Manda Shiman tə la'a ənda nda uya Shanguɗə Karti, təwa fəkə nda chi nda changhabal Yesu inda tə məra, kəl ngə cha nənyi kwaba nə ka Bitrus ana Yohana,

¹⁹ga na, “Na'a ma nəna gyalkur tsəu, aka madawa ya fəkə nyi chi cho uya Shanguɗə Karti.”

²⁰Kəl ja, Bitrus tə wum ga nar nyi, “Cha ɗa, naka ana kwaba nghə hya sa kəkəɗəu, aka aku jigadəma nghə ko nau ɗəlbiya ga'ar Hyel na kwaba!

²¹A mbaɗə nghə da ku tlər kəea ma da kushə wa, aka a ɗufwa kə da tsa'atsa'a mar Hyel wa.

²²Tubi! Ka ngyar mər tlər ɗimikur ngha, ka gədi Tlakə ka ba'a cha farbikə ngha aka chul nawa jigadəma.

²³Aka a la'a təya nda ɗufwa kə zhaliya tə dzə na ndahuɗəvi ɗimiɗimi, ya a tə mba ka ku mavakur səpəla'a.”

²⁴Ngə Shiman tə nar nda, “Maki, gədi ma Tlakə aka ya, tsa sə'ingə hya na ngə da ɗa na ya mada zhanghəu.”

²⁵Ahir nda wurandə dəkə mafakə Tlakəu, Bitrus ana Yohana tə ɓəl tanda yi Urshalima, aku laku nda kwa bəzə Mafakə Mənakə ku mələm njir Samariya ɗanghəu.

²⁶Ngə Chama Tlakə tə nar nyi nə Filibus, “Ɓatliya kərngha ka təra səya təwa holma ka gəzəya laku ngə tə hya'atə vu Urshalima kwa təra yi Gaza nga.” Laku nə dadil takəu nga.

²⁷Kəl ngə cha hya'atə ga təra, a tə lakur ma'i ngə cha ɓə na ndər Habasha, ndə nda a kiɗa cha da wa. Ndə nga, ana dəgalkur cha 'ualəu, nacha ngə ndər gəzə gəna Kandis, mala təltəl nə Habasha nda ku ndawa bəji. Cha hya'atə ti vir həsəli nə Hyel avu Urshalima.

²⁸Cho ɓəl yo ki tə cha tə ngwaɓə ku charkaina taku, cho kəratsən ku likatəkatə nda Ishaya ndər mətakər nə Hyel tə tsəfa.

²⁹Ngə Shanguɗə tə nar nyi nə Filibus, “Ma'i yi dza charkaina taku nga.”

³⁰Ana hwi Filibus tə yi dzə nyi ga yi ngatə ənda cho kəratsən ku likatəkatə nə Ishaya ndər mətakər nə Hyel. Kəl ngə cha jau nyi, “Kwa ngabiya kə sə ngə ko kəratsən ngə nganə ja?”

³¹Ngə ndə nda tə ɓəlakə nyi ga na, “Aman yo ɗana zəndəbiya? Kəl nja dəkəbiya ɗa.” Ngə cha gədi Filibus ka cha gi ngya dzə nyi ku charkaina nda.

³²Mbwa nda cho kəratsən ku likatəkatə nda tə na, “Tang wi kətəng njo təɗa ya tə mbwar tla wulya, Tang wi zər gam nda ɗiyiɗiyi tanyi, njo tsəɗə shishi dzə nyi, na cha mbəɗiya nya cha wa,

³³Nja həyatə cha ga mərtə nyi nəumar gəzhi. A ndə nda kwa nau dəkar sənda təkəra nyandəla cha wa, aka nja ɓəlnda pya cha tə dunəya.”

³⁴Ngə ndə nda tə gədi Filibus, “Matikuɗi dəkar ɗa, wa ngə ndər mətakər nə Hyel ngə kwa ɓwanya təkəra? Kərnyi zəma aa vanya ndə paməu?”

³⁵Ngə Filibus tə ghəya na mbwa nda ndə nda kwa kəratsən ku likatəkatə nda, ga dəkar nyi Mafakə Mənakə təkəra Yesu.

³⁶Nda nda kwa ma'i ku laku, kəl ngə nda həya vanya mbwa ana ɓiti, ngə ndə nda tə na, “Janə ɓiti! Mi kwa katə tsa nja mərtə ɗa baɓtisma?”

³⁷Ngə Filibus tə nar nyi, “Kwa mərtə nghə nji, ma cha a nənyi təkə jiri na takə zhang.” Ngə ndə nda tə na, “A nənyi tə ya jiri, ənda Yesu Kəristi ngə Zər Hyel.”

³⁸Ngə ndə nda tə ta'ində charkaina taku nda, ngə Filibus ana ndə nda tə səya ga gwa ku ɓiti, ngə Filibus tə mərtə nyi baɓtisma.

³⁹Nda nda zəbiya ku ɓiti nda, ngə Shanguɗə Tlakəu tə hətə Filibus ga təra na cha. A ndə da tsakətə la'a nyi wa, ngə cha gəzəya laku na hirgyaɗi.

⁴⁰Kəl ngə Filibus tə ghahə na kərnyi avu Azotus; ngə cha hya'atə ga zhulitə mələm i dəhə na dəkə Mafakə Mənakə, tsa'a vu Kaisariya.