Read nya huba Roma 1 Bible Online

Roma 1 - nya huba bible

Roma 1

¹Hya'atə tsa Bulus changhabal, ana mava Kəristi Yesu nda Hyel tə nga ga tabiya ka ga cha ɗa ka ndər bəzə Mafakə Mənakəu.

²Nacha ngə Mafakə Mənakə nda Hyel tə mər alkawal ɗəɗəm təwa sənda njir mətakər nyi tə na ku likatəkatə karti.

³Mafakə Mənakə na a təkəra Zər nyi Yesu Kəristi, nda aku ndəkur, nja yah nyi ku nyandəla təl Dauda.

⁴Nda hya'atə tsa Hyel cha tsəu, Yesu Kəristi Tlakən mən tə chabiyadzə ka Zər Hyel, təwa gyalkur kartikur nda hya'andə nyi ku hwa.

⁵Təwa Kəristi ana aka tləm nyi, Hyel tə char ɗa ɗanghali ka ya ɗa ka changhabal, ka ga ya nga nji'inda pa'a njir Yahuda nda ɗa na jirikur nda mər sənda Hyel kwa i.

⁶Ma'a nahi aku huɗa nji'inda nja nga hi, aka hya ɗa ka nə Yesu Kəristi.

⁷Papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi ngya tsa'a na hi. Nahi inda Hyel kwa nyida vu Roma, ga nga hi ka hya ɗa ka nənyawa nji.

⁸Yo ghəya ana usaku Hyel ɗa təwa Yesu Kəristi aka hi dəhəu, aka zəndətə nji jirikur kəhi atə dəhə dunəya.

⁹Hyel kwa zəndə cha ənda yo pətlənya ka hi wa'atanyi. Vu'i na pəchi yo pətlənya təkəra hi ana sənda hyo i nə Hyel, ndə nda yo həsəli nənyi təwa bəzə Mafakə Mənakə təkəra Zər nyi.

¹⁰Aku pətlənya ɗa dəhə bəji yo gədi ənda aku ikur Hyel ya uya lakur yada hi.

¹¹Aka yo chim ya la'a hi ya nə hi ga'ar Shanguɗə ka ga hya ɗa na dunama ku Tlakəu.

¹²Aka ma məna ɓiyadza yo tsətə hi ɗufəu, nahi tsəu hyo tsətə ɗa ɗufəu ku jirikur.

¹³Yo i hya zəndə ja ka zamə ɗa ənda a ɓatliya təya zhaka ɗang ka yo yada hi, kəl ja, alenya sə kwa maka katə ɗa tsa yi. A i tiya ya uya alenya njir nəu ku pama hi, wi nda ya uya ku pama alenya nji'inda pa'a njir Yahuda.

¹⁴Aka a ɗati tuku na'a ya bəzə Mafakə Mənakə nə dəhə nji, njir Heleni ana nji shilishili, njir dəma ana nji kəkəng.

¹⁵Na cha gwa'atə yo i gagaɗa ka ya bəzə Mafakə Mənakə nə hi nahi nda vu Roma tsəu.

¹⁶Aka a da ya kwa ngatə kuzhir Mafakə Mənakə nə Kəristi wa aka gyalkur Hyel cha nda kwa mər tlər dləuya dəhə nji'inda tə nənyi jiri, tangərma njir Yahuda ana tsəu nji'inda pa'a njir Yahuda.

¹⁷Aku Mafakə Mənakə ngə Hyel tə dəkar mən ənda cho chabiya mən ngya tsa'atsa'a na cha, nacha ngə nyabiya tə dzə fwatə tə ghəya nyi yatə udiyanyi təwa nənyi jiri. Wi nda Likatəkatə tə na, “Ndə nda tsa'atsa'a na Hyel təwa jirikur cho ɗa na pi.”

¹⁸Kəl ja, Hyel tə chabiya huɗətla nyi kya huɗamələm a təkəra dəhə njir mər səpəla'a ana njir paha nji'inda kwa da jiri na hi təwa pahakur kənda.

¹⁹A zəndəbiya tənda jiri təkəra Hyel aka chabiya nda tənji tə babal.

²⁰Aka fwatə bəji nda nja ɓatlə dunəya ti, Hyel a tə babal cha, gyalkur nyi nda ba'anawa ana Hyelkur nyi nda pa'a nji kwa la'a na li chabiya nyi ti, təwa sənda cha məra, aka madawa da na sər biyatə wa.

²¹Madangə kwa zəndə nda sə təkəra Hyel, a nda kwa həsəli nənyi wi Hyel wa, ya a nda kwa usaku nyi wa, jigadəma kənda ɗatə ka sə ɓwa'atanyi ya ɗufwa nda ɗatə kyakyarəu kwa wendə nda.

²²Madangə nda kwa na ənda njir dəma nda, kəl ja, nji kəkəng nda.

²³Nda bəlatə hətə nyi səli nə Hyel nda pa'a kwa tah ana həsəli nə sə nda nja ɓatliya pabiya ndə nda kwa tah, eakəu ana sərshishi ana sər təɗə na ta.

²⁴Aka ənga Hyel tə ngya nda ka nda mər sə hiɗahiɗa nda ɗufwa nda kwa i, nda mər sər kuzhi na dza nda.

²⁵Nda bəlatə jiri nda təkəra Hyel na gəzhi, nda kwa həsəli ana mər mavakur nə sənda Hyel tə məra a təvəra Hyel təkərnyi nda tə mər sənda, ndə nda njo kina fal ba'anawa. Aɗəmja.

²⁶Nacha gwa'atə Hyel tə ngya nda nə mwaɓər sər kuzhi nda nda kwa məra. Ma'a mahi'i kwa piya na kərnənda a təvəra piya na shili.

²⁷Ana shili tsəu, tə ngyar piya na mahi'i ga gu chim kərnənda. Nda kwa mər sər kuzhi ka kuvanənda shili, aka ənga nda təɗəkənyi ɓwaɓwatə nda nda kwa kini nə kərnənda aka səɗimi nda nda kwa məra.

²⁸Manda nda ngyar zəndə Hyel, cha far na nda nə jigadəma kənda nda kəla sakəda, ga cha ngya nda nda gu mər sənda a njo kina mər pa'a wa.

²⁹Ngya kənda tə ɗa ana dəhə səɗimi, səpəla'a, huɓərsəu, ɗimikur, shishi, tsa ndəu, pah, shakər, ana nya zazaɓəu, ba'a na ndəu.

³⁰Njir pə səɗimi təkəra ndəu, njir mər dawa na Hyel, njir dləutəɗa, njir həkəra kərnənda, njir mba səɗimi, nji kəla mər sənda njir yanda kwa i,

³¹nji kəla jigadəma nda, nji kəla nyabiya mbandəra, nji kəla nyida nji, nji kəla ngatə təhuɗə nji.

³²Madangə kwa zəndə nda sənda gadlagadla Hyel tə na, ənda ndə nda tə mər sə'ingə kwa tah, dəhə ka ənga, a da mər tanyi nda kwa mər wa, kəl ja, nda kwa chihi nə nji'inda kwa məra.