Read nya huba Roma 14 Bible Online

Roma 14 - nya huba bible

Roma 14

¹Dləutsə ma nji'inda jirikur kənda təutətəutənyi, ngwa hya da kəpal kə'i nda təkəra jigadəma kənda wa.

²Alenya nji nənyi, jirikur kənda ngya nda tə nda səm dəhə sənda kəra nda har nda, kəl ja, ndə nda jirikur nyi təutətəutənyi kwa səm kəl səkwar heli,

³ndə nda kwa səm dəhə sənda kəra cha har nyi ngwa cha da həyatə ndə nda pa'a kwa səm kala sə wa. Ya ndə nda pa'a kwa səm kala sə tsəu ngwa cha da tlanda nyi nəuma nə ndə nda kwa səm kala sə wa, aka Hyel dləutsə nyi ti.

⁴Nakə wa kə kwa nau nənyi bikə nə mava vanya nda? Ndara mava nda mərtə tlər mənakə ndara a da cha mər wa, kəl tlakə nyi ngə kwa tlanda nyi nəuma. Ya sənda cho mər mənakəu, aka Tlakə kwa nau gwa'atə cho mər mənakəu.

⁵Vanya ndə kwa hətə səlir vanya pəchi matsa alenya pəchi, vanya ndə tsəu dəhə pəchi sə zhang nənyi. Ngwa kala ndə da ɗa na kərmətlə təkəra sənda ku jigadəmanyi wa.

⁶Ndə nda kwa la'a vanya pəchi na səli, cha kwa məra ka həsəlir Tlakə nga, ya ndə nda kwa səm dəhə sə tsəu, cha kwa məra ka həsəlir Tlakəu nga, aka cha kwa usaku Hyel ka sərsum nda. Dəhə ndə nda pa'a kwa səm kala sərsum ma'a, cha kwa məra ka həsəlir Tlakəu, aka nacha ma'a kwa usaku cha Hyel.

⁷Aka a ndə da ku pama mən nda kwa ngya ka kərnyi tanyi wa, ya a ndə da kwa tə ka kərnyi tanyi wa.

⁸Macha ngya məno ngya, ka Tlakə nda məno ngya, macha tə məno tə tsəu ka Tlakə məno tah, ndara ngya məno ngya, ndara tə məno tah, nə Tlakə mən.

⁹Aka nacha gwa'atə Kəristi tə tah ga hya'ati na pi, ka ga cha ɗa ka Tlakə nə nji'inda na pi ana nji kuɗəkuɗa.

¹⁰Nakə ya, mya gwa'atə ko tla nəuma nə kuvangha? Nakə tsəu kami ko həyatə kuvangha? Dəhə mən məno ta'i mar Hyel nda nacha ngə ndə nda kwa mərtə mən nəuma.

¹¹Aka Likatəkatə tə na, “A səmənda təya fəla na kərɗa ənghwandə Tlakəu, kala undi kwa uzhi huɗə ɗa, madawa tsəu kwa dəkəbiya ənda naya ngə Hyel.”

¹²Kala ndə ku pama mən ja, kwa dəkəbiya sənda cha mər huɗə Hyel.

¹³Aka əngə ja, kəl mən ngyar tla nəuma nə kərnəmən, a təvəra ənga, ngwa madawa ɗa ka sər tləhi nə kuvanyi wa.

¹⁴A zəndətə ya təkəɗəu aka naya nə Tlakə Yesu ya, vanya sərsum da hiɗahiɗa ka pa'akura cha wa, kəl nda ma vanya ndə tə hətə ənda vanya sə da hiɗahiɗa, a nənyi nda sənda hiɗahiɗa.

¹⁵Maka gwa'atə huɗa kuvangha ndə tə tla təkəra sərsum nda ko səma, yau, a da kə na nyida ndanə wa. Ngwa ka i sərsum nda ko səma, cha tsəya jirikur kuvanghə ndə nda Kəristi tə tah kari wa.

¹⁶Aka ənga, ngwa i alenya nji pə ɓwanya ɗimi təkəra sənda ko har mənakə wa.

¹⁷Aka təlkur Hyel da nyar səma ana sa wa, kəl nda nyar ngya tsa'atsa'a ana piyarɗufəu, ana hirgyaɗi nda ku Shanguɗə Karti,

¹⁸ya dəhə ndə nda kwa həsəli nə Kəristi təwa ngəna laku, ɗufwa Hyel kwa ɗa twas nacha, ya nji kwa dləukər nacha.

¹⁹Aka əngə ja, mən mbadzə məna mər sə inda kwa shili na piyarɗufəu ana tsakətə nyi dunama nə kərnəmən ku jirikur.

²⁰Ngwa hya da wazənda tlər Hyel nyar sərsum wa. Dəhə sərsum chaməu, kəl ja, a da cha tsa'atsa'a nja səm sənda kwa gwa'atə vanya ndəu kwa tləhi wa.

²¹A ndiya tə ɗa mənakə ngwa ka ɗə kum, ndara ka sa ɓitir anapəu, ndara ka mər vanya sənda kwa gwa'atə alenya njir nəu kwa tləhi wa.

²²Aka ənga madami sənda ka dləukər təkəra sə'inga, cha ɗa ku pama hi na Hyel ngha. Ndər papa'akur ngə ndə nda pa'a ɗufwa cha kwa nənyi bikə təkəra sənda cha har ku jigadəma nyi ənda tsa'atsa'a tanyi.

²³Kəl ja, ndə nda na kəpala ku ɗufwa cha təkəra sənda cho səma, səpəla'a nda cho məra macha səma, aka a da cha sənda cha nənyi jiri wa, ya dəhə sənda ka məra ya a da ka nənyi jiri ənda tsa'atsa'a tanyi wa, səpəla'a nda.