Read nya huba Roma 15 Bible Online

Roma 15 - nya huba bible

Roma 15

¹Namən nda na dunama ku jirikur məno kina hagwa nyi chi nə nji'inda təutətəutənyi ku jirikur, ngwa mən da mər mənakəkur kəl nə kərnəmən wa.

²Madawa ku pama mən cha mər sənda ka təwul nyi kwa mər hirgyaɗi nə ana sənda kwa mərtə nyi sakəda, aka ga məna handə nda ku jirikur.

³Aka Kəristi na kərnyi ma'a da mər sənda mənakə kəl ka kərnyi wa. Wi nda Likatəkatə tə na, “Ngəl hi nda nji kwa ngəl hi tə ɗa ka na'a.”

⁴Aka dəhə sənda tsəfətsəfə nyi ku Likatəkatə Hyel ɗəɗəməu ka ga nja dlədləɓətə mən ngani, ga məna ɗa na fəkər təwa səsə'ua ana tsəɗufəu, nda Likatəkatə Hyel kwa nə mən.

⁵Ga Hyel nda kwa nənyi səsə'u ana tsəɗufəu nə nji, cha nə hi shanguɗə nə daɓəkər ənda hyo ɗa ma hyo nəu dərpər Kəristi Yesu,

⁶aka dəhə hi hya hətə nyi səli nə Hyel Adanya Tlakən mən Yesu Kəristi, ana ta zhang ana kurakə zhang.

⁷Dləutsə ma kərnəhi wi nda Kəristi tə dləutsə hi, ga tləmər Hyel uya səli.

⁸Yo nar hi Kəristi tə ɗa ka mava njir Yahuda, ga cha char ənda vəlvəl Hyel nyabiya tə alkawal nda nja mərtə nyi nə ka jival kəmən.

⁹Ana tsəu ga nji'inda pa'a njir Yahuda nda hətə nyi səli nə Hyel aka təhuɗə nda cha ni, wi nda nja tsəfətə ku Likatəkatə bəra, “Aka ənga, yo fal ngha ku huɗa nji'inda pa'a njir Yahuda, yo na miya fala nə ngha.”

¹⁰Ətsəu likatəkatə tə ɓəla na, “Mər ma hirgyaɗi kə'i nji nyi, nahi nji'inda pa'a njir Yahuda.”

¹¹Ana tsəu, “Fala ma Tlakəu, nahi nji'inda pa'a njir Yahuda, hya na miya fal tsəu, nahi dəhə njir dunəya.”

¹²Ana tsəu Ishaya tə na, “Vanya ndə kwa hya'atə ku nyandəla Jesi, cho shili mər təlkur təkəra nji'inda pa'a njir Yahuda, ya nda kwa fəkər da cha.”

¹³Hyel nda kwa shili na fəkər, cha nyandə hi na hirgyaɗi ana piyarɗufəu təwa jirikur nda hi ni, a nə nyi, aka ga fəkər kəhi biyama na həa təwa gyalkur Shanguɗə Karti.

¹⁴Ka zamə ɗa, naya təkərɗa zəndə təkəɗə ənda nyinyi hi na mənakəkur, ya a zəndətə hi sə dəhəu, ya tsəu kwa nau hi dlədləɓə nə kərnəhi.

¹⁵Aku tsəfə ɗa ya biya tə babal yo ɓwanya təkəra alenya sə ka ga ya ɗənghatə hi. Ya mər ənga aka ɗanghali nda Hyel tə char ɗa,

¹⁶cha gwa'atə ya ɗa ka ndər mər tlər Kəristi nə nji'inda pa'a njir Yahuda. Yo mər tlər fərist təwa bəzə Mafakə Mənakə Hyel aka nji'inda pa'a njir Yahuda nda ɗa ka sər hatəmachi nda Hyel kwa dləukəri, nji'inda nja dzəvəya ka cha təwa Shanguɗə Karti.

¹⁷Aka ənga yo nau ɓwadzə na dəhə sənda Kəristi Yesu tə mər təwa tlər nda yo mər nə Hyel.

¹⁸A yo ɓwanya təkəra vanya sə wa, kəl sənda Kəristi tə nyabiya təwa ɗa, ya mərtə tənji nji'inda pa'a njir Yahuda nda ɗa ka njir nəu nya Hyel. Cha mər ənga təwa tlər ɗa ana ɓwanya ɗa i,

¹⁹təwa gyalkur səshinshin ana sər muniya, ana təwa gyalkur Shanguɗə Karti. Aka ənga, fwatə vu Urshalima bətə yi Ilirikum ya bəzə Mafakə Mənakə Kəristi, ga nyabiya dəhə tləra ɗa.

²⁰Chim ɗa wa'atanyi, ya bəzə Mafakə Mənakə tə dəhə mbwa nda pa'a nji ta zəndə Kəristi ti, aka tsa yada hər təkəra hyavi nda vanya ndə tə səya.

²¹Wi nda cha tsəfətsəfə nyi ku Likatəkatə bəra, “Nji'inda pa'a nji ta dəkar nda sə təkəra cha nda kwa la'a, nji'inda pa'a ta ngatə tsəu nda kwa ngabiya.”

²²Nacha ngə sənda katə ɗa yada hi zhaka ɗang tanyi.

²³Manə wurandə təya tlər ɗa təwa bana, ya manda fa ɗang tanyi yo chim ənda ya ɗa na yada hi ka ya la'a hi,

²⁴ya ɓatliya ka yo mər ənga ma yo yi Asbaniya. Yo chim ya la'a hi ma yo tərabiya, ana ya uya vala tsahi ka yi nda, ahir ma ya usa hi nə bəji kushi.

²⁵Nəchana, yi Urshalima nə ya ka ga ya yi na vala nə njir nəu nda hinda.

²⁶Aka njir nəu nda hi Makidoniya ana Akaya tə nənyi ga'a nə nji ɗaliɗali ku pama njir nəuwa inda hi Urshalima ana hirgyaɗi.

²⁷Jigadəma nga, nə kərnənda ngə səkənda, madangə ɗatə tsa'atsa'a nda hagwa nda chi. Manda njir Isra'ila təkəya tə papa'akur Hyel ka nji'inda pa'a njir Yahuda, ɗatə wi məl nə nji'inda pa'a njir Yahuda ka nda təkəya papa'akur kənda nə dunəya kə'i njir Yahuda.

²⁸Ma ya nənda vala nda nja tsəmiya kanda, yo təra yi Asbaniya, ma yo tərabiya yo tyatə da hi.

²⁹Zəndətə ya ma yo yi, yo yi na papa'akur Kəristi chaɓəu.

³⁰Yo gədi hi ka zama ka kwama, aka Tlakən mən Yesu Kəristi ana təwa nyida nda Shanguɗə kwa nənyi nə nji, hya daɓətə kər ka ya təwa pətlənya na'a tsa'anyata nə Hyel.

³¹Hya pətlənya ənda yo ɗa na mbəɗa tsa nji'inda ngyar nəu nya Hyel tə hə'i Yahudiya, ana ənda njir nəu inda vu Urshalima kwa dləutsi vala nda yo yi ni.

³²Ma Hyel tə i ya yi da hi na hirgyaɗi 'ualəu, məno ɓəliyasar kə'i hi.

³³Hyel nda kwa nə mən piyarɗufəu, cha ngya tsa'a kə'i hi. Aɗəmja.