Read nya huba Roma 3 Bible Online

Roma 3 - nya huba bible

Roma 3

¹Əja ya, mi sənda njir Yahuda tə ndiya alenya nji na? Aa vanya səda tla bədzang kwa nənya ndə ya?

²A da ɗang tanyi təwa laku ɗanghəu. Sənda ndiya dəhəu, nacha ngə Hyel tə nənyi mafakə nyi nə njir Yahuda nda gəziya.

³Kəl ja, macha ɗa alenyi nji da ku huɗa nda a da na jirikur wa ya? Kwa gwa'atə Hyel kwa ɗa kəla jiri ya?

⁴Tsa'anyata a da wa! Hyel ndər jiri cha, mada dəhə nji kwa tla gəzhi. Wi nda Likatəkatə tə na, “Ka chabiya kərnghə tsa'atsa'a ma ko ɓwanya, ya kala ndə kwa dləukəri ənda ndər jiri ka wa'atanyi.”

⁵Kəl ja, ma tar ngya tsa'atsa'a kəmən tə chabiya tsa'atsa'akur Hyel tə babal ya, mi məno na? Kwa nau məna na Hyel tə mərtə səɗimi aka cha tlanda mən nəuma ya? (Ɓwanya tanyi nə yo ɓwanya wi nda nji kwa ɓwanya.)

⁶A da pa'a wa, ma cha əngə ya, aman Hyel kwa da mərtə nyi nəuma nə njir dunəya?

⁷Vanya ndə kwa nau na, ma tar jirikur ɗa tə gwa'atə jiri nə Hyel tə biya tə babal tahiu, nga ɗa ka sər həsəli nə Hyel ya, aman njo ɗana ɓəla tlanda ɗa nəuma səka bəra ndər səpəla'a ya?

⁸Macha ənga, mya gwa'atə a məno na, “Mən mər səɗimi ga sə mənakə biya kwa wa?” Tsa'anyata, alenya nji ngəlnda mən ti, ənda məno na, njo tlanda nda nəuma wi sənda ɗa tsa'atsa'a.

⁹Yau, namən njir Yahuda ndiya alenya nji ya? A da pa'a wa, aka wurtə məna chari ənda dəhə nji, mada njir Yahuda ndara nji'inda pa'a njir Yahuda, a da kiɗa gyalkur səpəla'a nda dəhə nda.

¹⁰Wi nda Likatəkatə tə na, “A ndə da ngya nyi tsa'atsa'a mar Hyel wa, a da mada zhang wa.

¹¹Ndə da na ngabiya wa, ndə da kwa gwa'a Hyel wa.

¹²Dəhə nda shar nyi dagəryi nə Hyel, dəhə nda ɗatə ka sə kəla sakəda, a ndə da kwa mər sə mənakə wa, a da mada zhang wa.

¹³Fəlangha nda wi hu nda banghəu, kyara nda ɗatə ka sər shakər, ɓwanya kənda wi kəlpə tsapəu.

¹⁴Ɓwanya kənda chaɓə na nya ɗimi ana ghərti.

¹⁵Ɗəɗəu nda təwa tsa ndəu,

¹⁶mada bar nda ma'i kəl ɓwaɓwatə ana səwa sə tanyi nda kwa məra.

¹⁷A da nda kwa zəndə ənda nda kwa ngya na piyarɗufəu ka nji wa,

¹⁸a ləvər Hyel da nya tanda mada kushə wa.”

¹⁹Sakan ja, a zəndətə mən ənda dəhə sənda gadlagadla kwa na anə nji'inda na ngya tə kiɗa gadlagadla ngani, ga nja katə dəhə chul sər biyatə nda nji kwa shili nə ana ga nja shili na dəhə dunəya tə kiɗa nəumar Hyel.

²⁰Aka ndə do ɗa tsa'atsa'a mar Hyel təwa ɓəlatə gadlagadla wa, sənda gadlagadla kwa məra nacha ngə, cha chari ənda mərtə mən səpəla'a.

²¹Kəl sakan ja, Hyel chabiya mən tə laku ənda məno ɗana uya ngya tsa'atsa'a nacha, matsa təwa gadlagadla, wi nda gadlagadla Musa ana njir mətakər tə ɓwanya təkəri.

²²Hyel kwa mərtə nji tsa'atsa'a təwa jirikur nda ku Yesu Kəristi. Hyel tə mər ənga nə dəhə nji'inda tə nənyi jiri nə Kəristi, nda a pam da kwa pa'a wa.

²³Aka dəhə nji mərtə səpəla'a, ya təutə tənda tsa səlir Hyel.

²⁴Kəl ja, təwa ɗanghali Hyel dəhə nji ɗati tsa'atsa'a təwa Kəristi, nda pəliya nda.

²⁵Aka Hyel tə sə Yesu cha ɗa ka sər hatəmachi nə bikə kəmən, aka təwa mashi nyi nja farbikər səpəla'a nji təwa jirikur kənda. Hyel tə mər ənga ga cha char tsa'atsa'akur nyi, ana təwa mbiyahuɗə nyi cha far na səpəla'a nda nja ɗaka mər ɗəɗəməu,

²⁶ətsəu, cha mər ənga ku bəji na ga cha char tsa'atsa'akur nyi, ga cha mərtə njir jirikur ku Yesu, nda ɗa nji kəla bikə mar Hyel.

²⁷Yau, a təkəra mi məno bu kərnəməna? Səda wa! Ya mi ngə sənda gwa'atə sənga? Abəra aka məna ɓəlatə gadlagadla ya? A'a aka məna nənyi jiri.

²⁸Aka məna udiya bəra ndə kwa ɗa tsa'atsa'a mar Hyel təwa jirikur a da təwa ɓəlatə gadlagadla wa.

²⁹Aa Hyel ya, Hyel njir Yahuda tanyi cha ya? A da cha Hyel ma'a nə nji'inda pa'a njir Yahuda ma? Ah, Hyel kənda cha tsəu.

³⁰Hyel zhang, ya cho mərtə njir Yahuda ana nji'inda pa'a njir Yahuda tsa'atsa'a na kərnyi təwa jirikur kənda.

³¹Sənga char ənda təwa jirikur a sənda təmən gadlagadla ya? A da pa'a wa, a təvəra ənga məna tsakətə chiya gadlagadla.