Read nya huba Roma 4 Bible Online

Roma 4 - nya huba bible

Roma 4

¹Mi məno na təkəra Ibrahim jival kəməna? Mi sənda cha ngabiya təkəra jirikura?

²Macha mərtə tənji Ibrahim tsa'atsa'a na Hyel aka sənda cha məra, cho nda uya sər wovi ni, kəl ja, a da mar Hyel wa.

³Likatəkatə tə na ya, “Ibrahim tə nənyi jiri nə Hyel, ya aka jirikur nyi Hyel tə dləutsə nyi ka ndə nda tsa'atsa'a.”

⁴Ndə nda tə mər tləra njo kinda nyi wazəba nyi, ya a da ga'a nda nənyi nji wa, vituku nyi nda.

⁵Kəl ja, nji'inda a da ta'i təkəra tlər kənda wa, ya nda nənyi jiri nə Hyel nda kwa mbəɗandə njir mər bikəu, jirikur kənda kwa mərtə nda tsa'atsa'a mar Hyel.

⁶Nacha ngə sənda Dauda tə chari, nda cha ɓwanya təkəra hirgyaɗi ndə nda Hyel tə dləutsə aka ndə nda tsa'atsa'a, a da ka sənda ndə tə mər wa.

⁷Nda na, “Njir papa'akur ngə nji'inda nja farbikə kənda, nji'inda nja zhazhinda səpəla'a kənda.

⁸Ndər papa'akur ngə ndə nda a Tlakə do tsəfə bikə nyi wa.”

⁹Chul hirgyaɗi ngə Dauda tə ɓwanya təkər ngə ya, nə nji tlatla bədzang ngə səkənda ya? A da wa! Ma'a nji kəla tla bədzang. Aka ngatə tə mən ənda Likatəkatə tə na, “Ibrahim tə nənyi jiri nə Hyel, aka jirikur nyi Hyel tə dləutsə nyi ka ndə nda tsa'atsa'a.”

¹⁰Ku bəji manə ngə nja nga Ibrahim ndə nda tsa'atsa'a? Ahir tlanda nyi tənji bədzang zəma aa təvi nja tlanda nyi? Təvi nja tla bədzang nənyi, a da ahir tla bədzang wa.

¹¹A hi ngə nja nda tla bədzang nənyi. Ga cha chari ənda aka jirikur nyi, Hyel tə dləutsə nyi ka ndə nda tsa'atsa'a təvi nja nda tla bədzang nənyi. Aka ənga Ibrahim ngə Adanya dəhə njir nənyi jiri nə Hyel, ya Hyel dləutsə nda tə ka nji tsa'atsa'a, madangə a da nja tlanda nda bədzang wa.

¹²Ya nacha ngə tsəu Adanya nji'inda nja tlanda nda bədzang, kəl ja, macha jirikur tsa nda wi nə Ibrahim təvi nja tlanda nda bədzang.

¹³Nda Hyel tə hətə nyi salkur nə Ibrahim ana nyandəla cha ənda cho nənda dəhə dunəya, cha mər ənga, a da aka Ibrahim tə nəubiya gadlagadla wa, kəl ja, aka cha nənyi jiri nə Hyel, aka ənga Hyel tə dləutsə nyi ka ndə nda tsa'atsa'a.

¹⁴Macha sənda Hyel tə hətə salkur salkurnyi nja kwa nənyi nə nji'inda kwa nəubiya gadlagadla, a sakədar jirikur da wa, ya salkur nda Hyel tə hətə, ɗatə ka sə ɓwa'atanyi.

¹⁵Kəl ja, tar nəubiya gadlagadla kwa tla huɗa Hyel, aka dəhə mbwa nda a gadlagadla da wa, a tar nəubiya gadlagadla da wa.

¹⁶Aka ənga ja, alkawal ta'itə təkəra jirikur, ga alkawal Hyel ɗa ngyangyanyi ka ga'ar Hyel nə dəhə nyandəla Ibrahim, a da kəl anə nji'inda nəubiya gadlagadla wa, kəl ja, anə nji'inda tə nənyi jiri wi nda Ibrahim tə nənyi jiri tsəu. Aka Ibrahim ngə Adanya dəhə njir nənyi jiri,

¹⁷wi nda Likatəkatə tə na, “A fiya nghə təya ka Adanya jul nji ɗanghəu.” Aka ənga, nja mərtə nyi alkawal nə Ibrahim nda nənyi jiri nə Hyel nda kwa fəunyi pi nə ndə nda tah, ya nacha ngə ndə nda kwa mərtə sənda a da wa, cha ɗa a da.

¹⁸Ibrahim tə nənyi jiri ngə cha fəkər, madangə a səda gwa'atə cha fəkər wa, ana ənga cha ɗa Adanya jul nji ɗanghəu, wi nda Likatəkatə tə na, “Nyandəla kə kwa ɗa ɗang wi ngə tə ɗangkura sasəlga.”

¹⁹Aku bəji nda fa nyi ɗatə ləhə dza gharəu, kəl ja, a jirikur nyi da təutə madangə a haltə cha tsa yah wa, ya Saratu tsəu halti.

²⁰A cha təkə na jirikur nyi wa, ya a cha kəpal alkawal nda Hyel tə mərtə nyi wa, jirikur nyi tə tsakətə nyi dunama ana gyalkur, cha fal Hyel.

²¹Ɗufwa cha chatə nyi tə pa'a ənda Hyel kwa mərtə sənda cha hətə salkur salkurnyi.

²²Nacha nga gwa'atə Ibrahim, təwa nənyi jiri, “Hyel tə dləutsə nyi ka ndə nda tsa'atsa'a.”[1]

²³Ɓwanya nə kwa na ənda, “Nja dləutsə nyi ka ndə nda tsa'atsa'a,” a da tsəfətsəfə nyi ka cha sənyi wa.

²⁴Tsəfətsəfə nyi cha aka ma'a namən nda njo dləutsə ka nji tsa'atsa'a, nji'inda nənyi jiri nə Hyel nda hya'andə Yesu Tlakən mən ku hwa.

²⁵Aka Hyel tə sətə Yesu ka nja tsəya nyi aka səpəla'a kəmən, ngə nja hya'andə nyi ana pi aka ga nja mərtə mən tsa'atsa'a mar Hyel.