Read nya huba Roma 6 Bible Online

Roma 6 - nya huba bible

Roma 6

¹Mi məno na ja? Məno biyama na mər səpəla'a ka ɗanghali Hyel tsakə ya?

²Tsa'anyata a da wa! Aka wurtə məna ɗa tətənyi nə səpəla'a. Aman məno ɗana biyama na mər səpəla'a?

³Aa a hya zəndə ənda nda nja daɓətə mən ka Kəristi Yesu təwa baɓtisma nda ya, wi tə nda məna tə kə'i cha ma?

⁴Təwa baɓtisma nda nja mərtə mən nja haɗiya mən ka cha, məna ɗa zhang ka cha tsəu ku tənyi, aka wi nda nja hya'andə kəristi təwa səlir gyalkur Ada, əngə tanyi tsəu məno ngya ku taɗər pi.

⁵Aka manə ɗatə mən zhang ka cha ku tənyi, kəpal da wa məno ɗa zhang ka cha tsəu ku hya'atənyi ku hwa.

⁶Ya zəndətə mən ənda kukwanda tənji ngya kəmən nda haaɗa nda kə'i cha, ka ga nja həbiya gyalkur səpəla'a nda ku mən, tsa məna da ɗa ka mavi'i səpəla'a səkəu.

⁷Aka ma ndə tə tah, a uyatə cha dimukur tsa gyalkur səpəla'a ndani.

⁸Mangə wurtə mən tə ka Kəristi, nənyi təmən jiri tsəu ənda məno ngya na pi kə'i cha.

⁹Aka zəndətə mən manda a hya'andə tənji Kəristi ku hwa, a tsə'u cho ɓəla tə səkə wa, tə tsə'u da na gyalkur təkəra cha wa.

¹⁰Tə nda cha tə kyang zhang nda, cha wazənda gyalkur səpəla'a, sakana ana pi cha, ya ngya nyi ɗatə aka Hyel.

¹¹Əngə tanyi nahi tsəu hya hətə kərnəhi wi nji kuɗəkuɗə nə gyalkur səpəla'a, kəl ja, nji'inda na pi aka Hyel təwa Kəristi Yesu.

¹²Aka ənga, ngwa hya da i səpəla'a mər təlkur nahi nda kwa gwa'atə hyo nəu jigadəmar ndəkurndə wa.

¹³Ngwa hya da ngyar səɗimi cha mər tlər na dza hi ka mər səpəla'a wa. A təvəra ənga, hya nənyi kərnəhi nə Hyel, wi nji'inda nja dləuya ku nya tah, ya ku pi, hya nənyi kərnəhi tsəu nə Hyel cha ɗa ka sər mər tlər tsa'atsa'akur.

¹⁴Ngwa səpəla'a da ɗa ka tlakən hi wa, aka a da hi da kiɗa gadlagadla wa, kəl ja, a da kiɗa ɗanghali Hyel.

¹⁵Aman nganə ja? Məna mər səpəla'a, aka a da mən da kiɗa gadlagadla wa kəl nda a da kiɗa ɗanghali Hyel ya? A'a laku da wa!

¹⁶A hya zəndə ənda mavi'i kala ndə nda hyo nəu nya cha hi ma? Hyo nau ɗa ka mavi'i səpəla'a nda kwa yi na hi ku tah, ndara mavi'i Hyel nda kwa yi na hi ku tsa'atsa'akur.

¹⁷Ɗakaɗa mavi'i səpəla'a hi, kəl ja, Usaku nə Hyel! Aka sakanə nənyi, kwa ngatə hi nya Hyel na dəhə ɗufwa hi təwa ɓəlatə dəhə dlədləɓə nda hya dləutsi.

¹⁸A dləuya hi tə nji tsa səpəla'a, ngə hya ɗaka mavi'i tsa'atsa'akur.

¹⁹Ba'ada ngə ya kwa mər na mavakur na, təutətəutənyi hi ku ndəkurndə kəhi aka ənga dzau hyo ngabiya laku jiri na, aka ɗakaɗa hya fiya kərnəhi ka mavi'i səɗimi ana pəla'akur ka mər zazaɓəkur. Əngə tanyi tsəu, hya fiya kərnəhi ka mavi'i tsa'atsa'akur nda kwa yi na hi ku kartikur.

²⁰Aku bəji nda hi mavi'i səpəla'a, a da ɗa tuku hya ngya tsa'atsa'a wa.

²¹Mi sənda hya uya ku mər sə inda sakanə tə ɗa ka sər kuzhi nə hya? Sənda sə'ingo shili nə nacha ngə tah!

²²Kəl ja, sakana dləuya hi tənji tsa gyalkur səpəla'a, ɗatə hi ka mavi'i Hyel. Sakəda nda hya kwa uya ku sə'ingə nacha ngə Kartikur nda kwa yi na hi ku pi nda ba'anawa.

²³Aka wazəbar səpəla'a nacha ngə tah, kəl ja, ga'ar Hyel nacha ngə pi nda ba'anawa təwa Kəristi Yesu Tlakən mən.