Read nya huba Roma 7 Bible Online

Roma 7 - nya huba bible

Roma 7

¹Sakanə ja ka zamə ɗa, manda nahi njir zəndə gadlagadla hi, hyo ngabiya sənə yo pə na. Gadlagadla kwa mər gyalkur təkəra nji kəl ku bəji nda nda na pi.

²Ba'ada, gadlagadla mbiya tə mala ɗəuɗəuwa nə sal nyi ma sal nda na pi. Kəl ja, macha tah, pəlpələnyi cha tsa gadlagadla nda mbiya nyi nə sal nyi nda.

³Aka ənga, macha hə vanya sal ya tsəutanyi sal nyi nda na pi, kasalikur nda cho məra. Kəl ja, ma sal nyi tə tah, a ɗatə cha tə butər kərnyi nə gadlagadla, ya mada cha ɓəla hə vanyi ndəu, a da cha ndər mər kasalikur wa.

⁴Aka əngə ja ka zamə ɗa, ba'ada nga, təkəra hi. A wurtə hi tah nə gadlagadla təwa dza Kəristi, təwa ənga hya ɗa ka nənyi, nacha nda nja hya'andə ku hwa, ga hya mər sakəda nə Hyel ku ngya kəhi.

⁵Aka sakanda mən na ngya ku ndəkurndəu, mbukər səpəla'a inda gadlagadla tə shili nə kwa tsəkumən, ya dəhə sə nda mən kwa məra kwa gwa'atə məno tah.

⁶Kəl ja, sakana, ɗa təmən tə butər kərnəmən tsa gadlagadla, aka tə tə mən nə gadlagadla nda tə fəu mən ku jarum. Aka ənga, a tsə'u məno mər mavakur nə ɗəɗəmər laku tsəfətsəfər gadlagadla wa, kəl nda aku taɗər laku nə Shanguɗə Hyel.

⁷Mi məno na? Gadlagadla təkərnyi ya, səpəla'a cha ya? A da pa'a wa! Kəl ja, gadlagadla ngə tə chabiya ɗa ya zəndə ndara mi ngə səpəla'a. A da yo nda zəndə ndara mi ngə njo na nə huɓər sər ndə wa, macha a gadlagadla da na, “Ngwa ka da huɓur sər vanya ndə wa.”

⁸Kəl ja, səpəla'a tə mər tlər na tsaubar, ga tsukutə dəhə chulkə huɓur sər ndə nda ku ya. Macha gadlagadla da wa, səpəla'a sə tətə cha.

⁹Ɗakaɗa ana pi ya, ya gadlagadla da nda kwa nar ɗa məra ndara ngwa ka da mər sənənnə wa, kəl ja, nda ya zəndə tsaubar, səpəla'a tə ɗa na pi,

¹⁰əngə ya tah. Ngə ya zəndəbiya ənda tsaubar nda kwa kina shili na pi, tə shili na tah.

¹¹Səpəla'a tə uya laku təwa tsaubar, cha shandə ɗa kər ga tsəya ɗa.

¹²Kəl ja, ba'aka ənga, gadlagadla ana tsaubar nyi hya'atə tsa Hyel cha, tsa'atsa'a ya mənakəu.

¹³Yau, kwa nau nja na ənda, sənda mənakəu tə gwa'atə ya tə ya? A'a, a da pa'a wa! Səpəla'a ngə tə gwa'ati. Təwa mər tlər na sənda mənakəu, səpəla'a tə shili na tə na'a, aka ga nja zəndə pa'akura səpəla'a. Aka təwa tsaubar səpəla'a tə biyatə babal ana dəhə pəla'akur nyi.

¹⁴A zəndətə mən gadlagadla sənda nə shanguɗə nga, kəl ja, naya ana ndəkurndə ya, ya mava səpəla'a.

¹⁵A da yo zəndə sənda ya kwa mər wa. Aka sənda ya kwa i ya məra a da nacha ngə ya kwa mər wa, kəl ja, sənda ngyar ya nacha ngə yo məra.

¹⁶Ya macha sənda yo məra nacha ngə sənda pa'a yo i ya məra, a dləukərtə ya ndani ənda gadlagadla sə mənakə cha.

¹⁷Aka vəlvəl a da naya ngə na kərɗa kwa mər sə ngə wa, kəl nda səpəla'a nda na ngya ku ya nga.

¹⁸Ya zəndətə ya ndəkurndə ɗa da kwa ngya ɗa ya mər sə mənakə wa. Aka mada yo i ya mər sə mənakəu, a da yo nau mər wa.

¹⁹A da yo mər sə mənakə nda yo i ya mər wa, kəl nda pəla'akur nda a da yo i ya mər wa.

²⁰Macha yo mər sənda a da yo i ya mər wa, a char tə ənda a da naya ngə kwa mər ngəna səwa, kəl nda səpəla'a nda na ngya ku ya nga.

²¹Aka ənga a ngabiya təya sənə kwa maka ɗa na. Ma yo i ya mər sənda mənakəu, kəl pəla'akur ngə wurnya sənda tsa ya.

²²Ɗufwa ya kwa mər hirgyaɗi na gadlagadla Hyel.

²³Kəl ja, ya kwa la'a vanya gadlagadla pam kwa pa na jigadəma ɗa, ngəna gyalkur tə fəu ɗa ku jarum səpəla'a nda na ngya ku ya.

²⁴Kirpəu naya! Sər təhuɗəu! Wa no dləuya ɗa tsa dzə nə kwa yi na ya ku tə na?

²⁵Usaku nə Hyel, aka cha dləuya ɗa təwa Tlakən mən Yesu Kəristi. Aka ənga, naya təkərɗa aku jigadəma ɗa vəlvəl yo i ya hətə nyi səli nə gadlagadla Hyel, kəl ja, aka ndəkurndə ɗa nə səpəla'a ya ɗa ka mava səpəla'a.