Read nya huba Roma 8 Bible Online

Roma 8 - nya huba bible

Roma 8

¹Aka əngə ja, a nəumar tə da nə nji'inda nə Kəristi Yesu wa.

²Aka gyalkur Shanguɗə nə pi ku Kəristi Yesu, a dləuya hi tə tsa gyalkur səpəla'a ana tah.

³Sənda a gadlagadla Musa da kwa nau mərtə wa, aka təutətəutəkura ndəkurndəu, Hyel tə mərtə tah cha tsəya səpəla'a ku ndəkurndəu, təwa sətə zər kərnyi, nda shili ana kumur dza wi ndə nda na səpəla'a, aka ga cha hənda səpəla'a.

⁴Hyel tə mər ənga ga nja nau nyabiya sə tsa'atsa'a nda gadlagadla kwa gwa'a tsa mən, nji'inda kwa ngya təwa Shanguɗə a da təwa ngyar ndəkurndə wa.

⁵Nji nda kwa ngya ku ndəkurndəu, ndəkurndə kwa gəla ɗufwa nda aka mər sənda cho i. Nji nda kwa ngya təwa Shanguɗəu, Shanguɗə kwa gəla ɗufwa nda ka mər sənda cho i.

⁶Ma ndəkurndə kwa gəla ndəu, kwa shili na tah. Kəl ja, ma Shanguɗə kwa gəla ndəu, kwa shili na pi ana piyarɗufəu.

⁷Ana ənga nji kwa ɗa njir dawa na Hyel ma ndəkurndə kwa gəla nda, aka a da nda kwa mər sənda gadlagadla Hyel kwa i wa, ya tsa'anyata a da nda kwa nau wa.

⁸Nji nda kwa mər sənda ndəkurndə kwa i a da nda kwa mərtə ɗufwa Hyel kwa ɗa twas wa.

⁹Kəl ja, macha Shanguɗə Hyel na ngya ku hi, Shanguɗə ngə kwa gəla hi, a da ndəkurndə kəhi wa. Ndə nda pa'a da na Shanguɗə Kəristi a da cha nə Kəristi wa.

¹⁰Kəl ja, macha Kəristi na ngya ku hi, madangə dza hi ku lakur tə cha aka səpəla'a, Shanguɗə Hyel kwa nə hi pi; aka mərtə hi tə nji tsa'atsa'a na Hyel.

¹¹Macha Shanguɗə Hyel nda hya'andə Kəristi ku hwa na ngya ku hi, əngə tanyi tsəu Hyel nda hya'andə Yesu ku hwa kwa nənyi pi nə dza hi nda kwa tah təwa Shanguɗə nda na ngya ku hi.

¹²Aka əngə ja ka zama ka kwama, a məl ndəkurndə ka hya mər sənda cho i da təkəra hi wa.

¹³Aka ma hya ngya wi nda ndəkurndəu kəhi kwa gwa'a hyo tah; kəl ja, macha təwa Shanguɗə hya tsəya tlər ndəkurndə hyo mbəa.

¹⁴Dəhə nji'inda Shanguɗə Hyel kwa nəu na nda na nda ngə nguli Hyel.

¹⁵Aka shanguɗə nda Hyel tə nə hi a da kwa fəu nji ku mavakur wa, ya a da kwa mərtə nji njir ləvər wa, a təvəra ənga, Shanguɗə nda kwa mərtə nji nguli Hyel, ya təwa gyalkur Shanguɗə məno tiwi nə Hyel, “Abba Ada.”

¹⁶Shanguɗə Hyel ana nəkəmən kwa daɓiyadzə kwa na, namən nguli Hyel.

¹⁷Mangə nguli Hyel mən ja, njir fa'aki mən, njir fa'aki Hyel, bazhi fa'aki ka Yesu, aka ma məna təkəya ɓwaɓwatər Kəristi, məno təkəya səli nyi tsəu.

¹⁸Ma yo la'a ɓwaɓwatə nda məno sa sakana a da nji ka njo məməla na səli nda njo da chabiya ku mən wa.

¹⁹Dəhə sənda Hyel tə ɓatlə kwa səkə na hirgyaɗi gagaɗa, ənda nguli Hyel kwa chabiyadza.

²⁰Sə ɓatləɓatlə ɗatə ka sə ɓwa'atanyi, a da ka ikur kənda wa, kəl ja, Hyel tə i cha ɗa ənga, madangə fəkər da,

²¹ənda sə ɓatləɓatlə na kərnyi kwa da uya mbəɗa tsa mavakur yiɗa, ana nda təkəya səli nə dimukur nguli Hyel.

²²Zəndətə mən ənda atə bəji na, dəhə sə ɓatləɓatlə kwa ngi'i, wi ngə tə ɓəlakərya kwa ta.

²³Kəl nda a da sənda nja ɓatlə tanyi ngə kwa tiwi wa; ma'a namən nda uya Shanguɗə sənda tangərma ku ga'ar Hyel kwa ngi'i ku ɗufwa mən, wi ngə məno səkə bəji nda Hyel kwa hətə mən ka nguli nyi, cha pəliya dza mən.

²⁴Məna uya fəkər nga ahir nja mbəɗandə mən, kəl ja, ma məna la'a sənda məno fəkər kari, a tsəu cha fəkər wa. Wa kwa fəkər da sənda wurtə cha uya?

²⁵Kəl ja, ma məna fəkər da sənda pa'a məna la'a, məno səkə na səsə'ua.

²⁶Əngə tanyi tsəu Shanguɗə kwa shili da mən ka cha hagwa mən chi ku təutətəutənyi nga. Aka a da məno zəndə ənda məno kina pətlənya wa; Shanguɗə na kərnyi kwa gədi tsa Hyel ka mən, ana ngi'i nda a da nja kwa nau pəbiya wa.

²⁷Hyel nda kwa ngwahibiya ɗufwa mən, kwa zəndə jigadəmar ɗufəu, zəndətə ɗufwa Shanguɗəu, aka Shanguɗə kwa gədi nyar nənyawa nji wi nda Hyel kwa i.

²⁸Ətsəu, zəndətə mən ənda Hyel kwa mər sə dəhə ka mənakəkur nə nji'inda kwa nyida nyi, nji'inda cha nga ka sənda cho i.

²⁹Hyel wurtə zəndə nji'inda cha ɗəmətsi, cha dzəvəya nda nda ɗa pabiya da zər nyi, ga cha ɗa ka zər tangərma ku pama ka zama i.

³⁰Aka nji'inda Hyel tə ɗəmətsi, nanda ingə cha nga, nji'inda cha nga, cha mərtə nda tsa'atsa'a ma nyi, ana cha təkəya səli nyi kə'i nda.

³¹Mi sənda məno na təkəra ngəna ɓwanya? Macha Hyel kwa ta'i tə ya mən ya, wa ngo nau mər dawa na məna?

³²Nacha nda pa'a katə zər kərnyi, kəl ja, cha lətənyi ka cha tah aka dəhə mən ya, a da cho nə mən dəhə sə na chi wung ma?

³³Wa kwa nau nənyi bikə nə nji'inda Hyel tə ɗəmətsa? Hyel na kərnyi ngə tə mərtə nda kəla bikə ma nyi!

³⁴Wa ngə kwa tlanda mən nəumar tah? A ndə da wa, aka Kəristi Yesu tə tah ka mən, ga hya'ati na pi ka mən, ya tə ngya cha tə chisəma Hyel cho gədi ka mən!

³⁵Wa kwa nau təkəbiya mən na nyidar Kəristya? Ɓwaɓwatə zəma, aa tari, aa izza, aa huɓwa, aa ɗali, aa təmachi, aa tah?

³⁶Wi nda likatəkatə tə na, “Atə nya nghə ea ɗa ku nya tah dəhə bəji; nja hətə ea wi kətəng nda njo tla wulya təkəri.”

³⁷Dəhə ka ənga, aku dəhə sə'inga, a ndəɗə tə mən nja nga mən nji'inda kura, təwa Kəristi nda nyidatə mən!

³⁸Aka a dləukərtə ya təkəɗəu ənda vanya sə da nda kwa təkəbiya mən na nyidar Hyel wa. A da tah ndara pi wa, a da chama i'i ndara məlləm i'i wa, a da ngya nda sakana ndara nda biyama wa, ndara gyalkur inda kya huɗamələm,

³⁹ndara sənda kyo ndəla hə'i, ndara vanya sə ɓatləɓatlə da nda kwa nau təkəbiya mən na nyidar Hyel nda tə chabiyadzə təwa Kəristi Yesu Tlakən mən wa.