Read nya huba Roma 9 Bible Online

Roma 9 - nya huba bible

Roma 9

¹Jiri nə yo dəkə ku Kəristi, jigadəma nda Shanguɗə Karti kwa gəla chabiya tə ənda a da gəzhi nə yo tla wa.

²Ɗufwa ya nyinyinyi na huɗətla ɗimiɗimi nda pa'a kwa wur təkəra na'ana nji, kuvaɗa njir Yahuda.

³Nda chim ya, bəliya shi'u nda gyatə ya, nja təkəbiya ɗa na Kəristi, kəda ga ka njikə ea uya mbəɗa,

⁴na nda ingə njir Isra'ila. Nda Hyel tə mərtə nda ka nguli nyi, ga chabiya nda səli nyi; cha mər alkawal na nda, ga nənda gadlagadla, həsəli jirikur da tsa nda; a dləutsətə nda salkur nda Hyel tə hətə nənda.

⁵Nyandəla Ibrahim, Ishaku, ana Jakop nda. Kəristi na kərnyi ndər Isra'ila cha təwa ndəkur, ya Hyel cha, nda kwa mər təlkur təkəra dəhə səu, ya nacha ngə kwa kina fal nda ba'anawa, aɗəmja.

⁶A da yo na ənda a Hyel da nyabiya alkawal nyi wa, aka a da dəhə njir Isra'ila ngə nji ɗəmɗəm nə Hyel wa.

⁷Aka nda nyandəla Ibrahim da char ənda nguli Ibrahim nə jirijiri nda wa, aka Likatəkatə tə na, “Ishaku ngə zər nda təwa nyi njo jiga nyandəla ka.” Madangə alenya nguli Ibrahim da.

⁸Nga char a da dəhə nyandəla cha nda nja yah təwa piyar sal na mala ngə nguli Hyel wa, kəl nyandəla cha nda təwa alkawal ngə njo jiga.

⁹Aka anə sənda alkawal Hyel tə na, “Sakanə pəta yo ɓəl shili, Saratu kwa uya zər.”

¹⁰Zər nga nacha ngə Ishaku jival kəmən, nda cha hə Robeka cha yah ɓəli.

¹¹Ya təvi nja yah nda, təvi nda zəndə sə mənakə ana səɗimi, Robeka uya mafakə tsa Hyel, mafakə nga char ənda Hyel kwa ɗəmtsə nji məlməl na sənda cho i,

¹²cho nga nji a da ka sə mənakə ndara səɗimi nda nda kwa mər wa. Nja nar nyi ənda, “Zər dəgal nga kwa nda mər mavakur nə zər kushi nga.”

¹³Wi nda Likatəkatə tə na, “A nyidatə təya Jakop kəl ja, ngyar tə ya Isuwa.”

¹⁴Kwa nau məna na ənda Hyel kwa tazhira ya? A da pa'a wa.

¹⁵Aka Hyel tə nar nyi nə Musa, “Yo char nyi papa'akur nə ndə nda yo i, yo ngatə təhuɗə ndə nda yo i.”

¹⁶Aka əngə ja dəhə sə ta'itə təkəra təhuɗə nda Hyel ni, a da ka chim nda ndə kwa chima, ndara mbadzə nyi wa.

¹⁷Aka Hyel tə na nə Fir'auna ku likatəkata, “Ya fiya nghə təl ka ga ya mər tlər naka, ya char gyalkur ɗa ana ya bəzə tləm ɗa nə dunəya dəhəu.”

¹⁸Aka əngə ja, Hyel ana təhuɗə cha təkəra dəhə ndə nda cho i, ya cho mərtə ɗufwa dəhə nda cho i ɓaɓaləu.

¹⁹Aka ənga, hyo nau na, “Mya gwa'atə tsəutanyi Hyel kwa la'a bikər nja? Wa kwa nau katə sənda Hyel kwa i cha məra?”

²⁰Kəl ja, nakə wa kə ndəu, kwa nau ɓəlakə nyi nə Hyella? Kwa nau sənda nja ɓatlə nar nyi nə ndə nda ɓatlə nyi “Mya gwa'atə ka ɓatlə ɗa ənə ya?”

²¹Gyalkur da tsa ndər hər təm cha mər tlər na nyingha zhang cha hərtə təm, alenyi ka tlər nda na səli, alenyi ka tlər huɗəvi.

²²Ya əngə tanyi tsəu, madangə gyalkur da tsa Hyel ka cho char huɗətla nyi ana gyalkur nyi, nacha ndər səsə'u na nji'inda huɗətla nyi kwa səya təkəri cha, nji'inda nja ɓatliya ka kuɗa.

²³Hyel kwa səsə'ua ga cha chabiya 'ualkura səli nyi, anə nji'inda cho ngatə təhuɗə kənda, nji'inda cha ɓatliya ka səli nyi nda kwa shili.

²⁴Ndara nji'inda njir Yahuda ndara nji'inda pa'a njir Yahuda, namən ingə nji'inda cha nga.

²⁵Wi nda na cha ku likatəkatə Hosiya, “Nji nda pa'a na'a na nji yo nga nda na'a na nji, hə'i nda pa'a ya nyidati, yo nyidatə nda.”

²⁶Ana, “Atə mbwa nda nja na nə nda, ‘A da hi na'awa nji wa,’ njo nga nda ‘Nguli Hyel nda na pi.’ ”

²⁷Ishaya tə tiwi nyar Isra'ila ga na, “Madangə njir Isra'ila ɗang wi məshishi'ua nya dəl, tsaɗə tanyi ku pama nda kwa uya mbəɗa.

²⁸Aka Tlakə kwa tlanda nyi nəuma nə njir dunəya a da na ɗə bəji wa.”

²⁹Wi nda Ishaya tə na tangərma, “Pa'a Tlakə Ndər Gyalkur tə nda həya nyandəla ea tsaɗə wa, njo nda kuɗənda ea wi njir Sodom ana Gomora.”

³⁰Mi məno na nganə ja? Nji'inda pa'a njir Yahuda nda a da mbadzə ka gwa'a ɗa tsa'atsa'a na Hyel, a mərtə nda tə nji tsa'atsa'a na Hyel, ya təwa jirikur ngə səngə tə ɗa ənga.

³¹Kəl ja, njir Isra'ila nda tə mbadzə ka nda ɗa tsa'atsa'a na Hyel təwa nəu gadlagadla, a nda uya wa.

³²Mya gwa'ata anda uya wa? Aka a da nda gwa'a ɗa tsa'atsa'a na Hyel təwa jirikur wa, a təvəra ənga nda gwa'a təwa ɓəlatə gadlagadla. Nda tləhi tə “Mangu tləhi,”

³³wi nda cha tsəfətsəfə nyi bəra, “Anə ya fiya tə hangu ku Sihiyona, nda kwa gwa'atə nji kwa tləhi, hangu nda kwa gwa'atə nda kwa dla, kəl ja, dəhə ndə nda tə nənyi jiri a da cho sa kuzhi wa.”