Read nya huba 1 Korinti 1 Bible Online

1 Korinti 1 - nya huba bible

1 Korinti 1

¹Hya'atə tsa Bulus, ndə nda nja nga ka cha ɗa ka changhabal Kəristi Yesu təwa ikur Hyel, ana zamən mən Sastanis.

²Yada njir nəu Hyel inda vu Korinti, nji'inda nja nga ka nda ɗaka nji karti nyi aku Kəristi Yesu, daɓə dəhə nji'inda kwa pətlənya tə dəhə mbwa aku tləmər Yesu Kəristi Tlakən mən, Tlakə kənda ana nəkəmən dəhəu.

³Papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi ngya tsa'a nahi.

⁴Wa'atanyi yo usaku Hyel aka hi, aka ga'ar ɗanghali inda cha nə hi aku Kəristi Yesu.

⁵Aka cha mərtə hya ɗa njir uya dəhə səu aku Kəristi, aku dəhə ɓwanya ana dəhə dəma.

⁶Nacha nga chabiya ənda sənda ya dəkə nə hi təkəra Kəristi nda jiri.

⁷Aka ənga uyatə hi dəhə ga'ar Shanguɗə nda hyo gwa'a, wi nda hyo səkə bəji nda Tlakən mən Yesu Kəristi kwa ɓəla shili.

⁸Ya cho nə hi dunama yi tsa'a tə udiya nyi, ga hya ɗa ka nji kəla sər ngəla pəshinda Tlakən mən Yesu Kəristi kwa ɓəla shili.

⁹Hyel nda nga hi ka hya daɓətə kər na Zər nyi Yesu Kəristi Tlakən mən, nacha ngə ndə nda njo dləukər ni.

¹⁰Yo gədi hi ka zama aka tləmər Tlakə Yesu Kəristi, nya hi ɗa zhang. Ngwa hya da ba'a təkəbiyadzə wa, hya daɓətə kər ana jigadəma zhang, sənda hyo i zhang.

¹¹Ka zama, njir ki Kuluwi tə nar ɗa ənda hyo pa kərnəhi.

¹²Jan səngə yo ɓwanya təkər nga, alenya nji ku pama hi kwa na, “Naya, ndər nəu Bulus ya.” Alenya nji tsəu, “Yo nəu Apolos,” ndara “Yo nəu Bitrus,” a əngə wa “Kəristi ya kwa nəuwa.”

¹³Na nja təkəbiya Kəristi ka dzuk ka dzukə ya? Naya Bulus ngə nja kukwanda ka hi ya? Aa na nja mərtə nyi baɓtisma nə mada zhang kəhi ku tləmər Bulus ya? A'a, a da wa!

¹⁴A usaku tə ya Hyel, a da ya mər baɓtisma nə mada zhang kəhi wa, kəl nda nə ka Kiribus ana Gayus.

¹⁵Aka ənga, a ndər na da, ku tləm ɗa nja mərtə hi baɓtisma wa.

¹⁶(A zəndətə ya, a mər təya baɓtisma nə ki Istifanus, kəl ja, matsa nga, a da yo tsəu ɗənghatə ndara mərtə nyi təya baɓtisma nə vanya ndə wa.)

¹⁷Aka Kəristi da sə ɗa ka ya mər baɓtisma wa, kəl nda ka ya bəzə Mafakə Mənakəu, a da ku ɓwanya dəma nə ndə wa, tsa nja da həyatə gyalkur taməngəla Kəristi.

¹⁸Mafakə nda təkəra tər Yesu tə taməngəla, kəkəngkur cha nə nji'inda ku lakur tah, kəl ja, gyalkur Hyel cha a nə mən, namən nda kwa uya mbəɗa.

¹⁹Tsəfətsəfə nyi cha, “Yo səwandə dəmar nji'inda na dəma. Yo gwazhiya kəra nji'inda kwa har ənda kwa zəndə nda səu.”

²⁰Yau, a manə njir dəma? A manə njir zəndə gadlagadla? A manə njir bəji nə nda kwa har wi kwa nau nda chiya nji na ɓwanya? A Hyel da shandə dəmar njir dunəya ka kəkəngkur ma?

²¹Mangə Hyel aku dəma nyi tə ɓatliya ənda a njir dunəya da kwa zəndəbiya nyi təwa dəmar ndə wa, cha mər tlər na mafakə kəea nə kəkəngkur ka cha dləuya nji'inda tə nənyi jiri.

²²Aka njir Yahuda kwa gwa'a ba'ada, njir Heleni tsəu kwa gwa'a dəma.

²³Kəl ja, na ea eo bəzə mafakər Kəristi nda nja kukwanda, sər tləhi nə njir Yahuda, kəkəngkur nə nji'inda pa'a njir Yahuda.

²⁴Kəl ja, ba nji'inda Hyel tə nga ka uya mbəɗa, njir Yahuda ka nji'inda pa'a njir Yahuda, Kəristi ngə gyalkur Hyel ana dəmar Hyel.

²⁵Aka kəkəngkur Hyel ndəya tə dəmar ndəu, ya təutətəutəkura Hyel ndəya tə dunamar ndəu.

²⁶Ɗənghatə ma ka zama, aku bəji nda Hyel tə nga hi. Nji tsaɗə tanyi ku pama hi inda na dəma aku la'a ndəu, ya nji tsaɗə tanyi ngə na dəgalkur, ya nji tsaɗə tanyi ngə nguli njirawawa'a.

²⁷Kəl ja, Hyel tə tabiya sə'inda dunəya kwa la'a kəkəng, ga cha nənyi kuzhi nə njir dəma. Cha tabiya sə'inda təutətəutənyi tə lya nji ga cha nənyi kuzhi nə sə'inda na dunama.

²⁸Hyel tə tabiya sə'inda dunəya həyati, sə'inda dunəya kwa la'a wi sə ɓwa'atanyi, ga mər tlər nanda ga cha zhazhinda sənda dunəya kwa la'a na sakəda.

²⁹Aka əngə ja, a ndər bukər nyi da mar Hyel wa.

³⁰Hyel daɓətə mən tə ka Kəristi Yesu. Cha mərtə nyi cha ɗa ka dəma nə mən. Kəristi tə mərtə mən tsa'atsa'a mar Hyel, cha mərtə mən ka nənyawa nji, cha dləuya mən ku səpəla'a.

³¹Aka əngə ja, wi nda likatəkatə tə na, “Dəhə ndə nda kwa gwa'a bukər nyi, kəl ndara cha mər ku Tlakəu.”