Read nya huba 1 Korinti 11 Bible Online

1 Korinti 11 - nya huba bible

1 Korinti 11

¹Hya dlədləɓə ɗa, wi nda yo dlədləɓə Kəristi.

²Ya kwa fal hi aka hya kwa ɗənghatə naya ku dəhə səu, ana ənda hya gəziya dlədləɓə inda, wi nda ya nə hi.

³Kəl ja, yo i hya ngabiya ənda ndə nda təkəra sal nacha ngə Kəristi, ya ndə nda təkəra mala nacha ngə sal, ndə nda təkəra Kəristi tsəu, nacha ngə Hyel.

⁴Ma dəhə sal nda tə pətlənya ndara tə takər na kəra cha mbumbunyi, a həyatə cha tə ndə nda təkəra cha.

⁵Ya ma mala nda tə pətlənya ndara tə takər ya a da cha mbuya kəra cha wa, a həyatə cha tə ndə nda təkəra cha, məlməl tanyi na cha sənda kəra cha ndani.

⁶Ma malakə tə ngyar mbuya kəra cha, kəl cha sənda kəra cha, kəl ja, macha sər kuzhi cha nə malakə cha sənda kəra cha, cha mbuya kəra cha.

⁷Sal nənyi a da ki cha mbuya kəra cha bəjir həsəli wa, aka nja mər nyi pabiya da Hyel ya cho cha səlir Hyel. Kəl ja, mala kwa cha səlir sal.

⁸Aka tangərma, a da ku dza mala sal tə biya wa, kəl nda mala ngə tə biya ku dza sal.

⁹Ya a da nja ɓatlə sal ka mala wa, kəl nda mala ka sal.

¹⁰Aka ənga, ana aka Chama i'i kwa ndzama, tuku mala cha mbuya kəra cha, ga cha char ənda a da kiɗa gyalkur cha.

¹¹Dəhə ka ənga, ku ngya kəmən ku Tlakəu, a mala do ngya kəla sal wa, ya sal do ngya kəla mala wa.

¹²Madangə mala ku dza sal biya cha tangərma, kəl ja, kala sal mala ngə tə yah, ətsəu, dəhə səu hya'atə tsa Hyel cha.

¹³Jigar ma dəma na kəra hi, tsa'atsa'a tanyi malakə pətlənya nə Hyel na kəra cha bang ya?

¹⁴Kərnəhi zəndətə ənda sər kuzhi cha ma sal tə ɗa na shishi nyi dzəgam dzəgaməu.

¹⁵Kəl ja, ma malakə na shishi dzəgam dzəgaməu, səli cha nənyi, aka nja nənyi shishi dzəgam dzəgam ga cha mbuya kəra cha.

¹⁶Macha vanya ndə kwa kəpal təkəra nga, a da ea zəndə vanya sə səkə wa, ya əngə tanyi alenya njir nəu Hyel.

¹⁷Aku tsaubar inənna, a da ya faliya hi wa, aka tsəmdzə kəhi a da nə mənakəkur cha wa, nə zazaɓəkur nga.

¹⁸Tangərma, ya ngatə ənda ma hya tsəmtədzə wi njir nəuwa, ngya pampam da ku pama hi, ya a dləukəri təya.

¹⁹Kəpal da wa njo uya ngya pampam ku pama hi, ga cha char nji'inda Hyel tə dləukər ni.

²⁰Ma hya tsəmtədza, a da sərsum daɓəkər ngə hyo səm wa.

²¹Aka ku səm sərsum kəhi, kala ndə kwa səm sənyi a da cho ɗəngha na alenya nji wa. Vanya ndə kwa ngya na huɓa vanya ndə kwa sa kwa wi.

²²A ki da tsa hi nda hyo səm hyo sa kwa ma? Aa hya həyatə njir nəu Hyel, hya kwa fəu nji'inda pa'a sə tsa nda ku izza ya? Kwa faliya hi ya təkəra ngə ja? Jiri a da wa!

²³Səngə ya nə hi nga, tsa Tlakə Yesu ngə ya dləutsi, bəra, aku vu'i nda nja tləɗanda nyi cha hətə gwazhilakəu,

²⁴ahir cha usaku Hyel, cha pəpasəu ga na, “Nənna dzaya na, nda njo lənda ka hi. Hya maka mər ənga ga hya ɗəghatə naya.”

²⁵Əngə tanyi tsəu ahir sərsum akə nda, cha hətə ɗeɗika ga na, “Ɗeɗika nə taɗər alkawal na ku mashi ɗa. Hya mər ənga, ku sakanda hyo sa ti, ga hya ɗənghatə naya.”

²⁶Aka ənga, dəhə bəji nda hyo ɓanghə gwazhilakə na, ana hyo sa ku ɗeɗika na, Mafakə tər Tlakə nda hyo bəza, kəl bəji nda cha ɓəl shili ti.

²⁷Aka ənga ja, dəhə ndə nda ɓanghə gwazhilakə ndara cha sa ku ɗeɗika Tlakə na, ya a da cha tsa'atsa'a wa, a mərtə cha səpəla'a nə dza Tlakəu ana mashi Tlakə ndani.

²⁸Kəl madawa cha dzətə kərnyi təvi cho ɓanghə gwazhilakə ana cha sa ku ɗeɗika.

²⁹Aka dəhə ndə nda tə ɓanghə gwazhilakə ana cha sa ku ɗeɗika, ya a da cho la'a səlir dza Kəristi wa, nəuma nda cho təɗəkənyi nə kərnyi.

³⁰Nacha gwa'atə nji ɗang ku pama hi tə təuta, ana tar yiyingkur, alenya nji ma'a tə kuɗa.

³¹Kəl ja, ma məna dzətə kərnəmən, a da məno gwa da kiɗa nəumar Hyel wa.

³²Macha Hyel ngə kwa tla nəuma nə mən tsəu, ɓu mən nda cho ɓu mən tsa nja da tlanda mən nəuma ka njir dunəya.

³³Aka əngə ja ka zamə ɗa, ma hya tsəmtədzə ka səm sərsuma, hya səkətə dza.

³⁴Macha vanya ndə kwa ngatə huɓa, cha səm sərsum ku ki, aka ma hya tsəmtədza, a do shili nahi nəuma wa. Ma ya shili yo tsakətə nə hi tsaubar təkəra alenya səu.