Read nya huba 1 Korinti 13 Bible Online

1 Korinti 13 - nya huba bible

1 Korinti 13

¹Mada ya ɓwanya na nya nji ana nya Chama i'i, ya a da ya na nyida wa, a ɗatə ya wi tatang tanyi nda kwa tiwi ndara dang nda kwa tiwi gagaɗa.

²Mada yo takər, ya kwa zəndəbiya dəhə sənda tə ɗəwa, ya dəhə zəndə tsa ya, mada jirikur tsa ya gagaɗa, nda kwa nau tsaɗənda mə i, ya macha a da ya na nyida wa, səda ya kar wa.

³Mada ya nənyi dəhə sənda tsa ya nə njir ɗali, ya nənyi dza ya nə nji ka nja nginda, ya a da ya na nyida wa, a da ya uya zhar madami wa.

⁴Nyida kwa mbiyahuɗəu, kwa mər mənakəkur, nyida do mər səlkəkur wa, a do bukər wa, a do jalvi wa.

⁵Nyida do mər dzaukur ndara gwa'a kərnyi wa, nyida do həɗufəu kuskus wa, nyida do gəzə ndə nya ta wa.

⁶Nyida do ngatə məsaɗakə na səɗimi wa, kəl nda kwa mər hirgyaɗi na jiri.

⁷Nyida kwa ɓəlati dəhə səu, kwa dləukər na dəhə səu, ana fəkər ku dəhə səu, ana mbiyahuɗəu ku dəhə səu.

⁸Ba'anawa nyida do wur wa. Kəl ja, takər kwa wura, nya pampam tsəu kwa sa, zəndi kwa tərabiya.

⁹Zəndə kəmən da nyabiyadzə wa, takər kəmən ma'a da nyabiyadzə wa,

¹⁰kəl ja, ma tsa'atsa'anyi tə shili, inda pa'ada nyabiyadzə kwa zhazha.

¹¹Nda ya zər, ya kwa ɓwanya wi zər, ya kwa jigadəma wi zər, yo hə sə na kər wi zər. Nda ya ɗa ka ndəu, ya ngyar zərkur.

¹²Sakana məno la'a sə dlərvəkə wi tə ɗauragal, atə bəji nga məno la'a li na li. Sakana zəndə ɗa da nyabiyadzə wa, atə bəji nga yo zəndə wi nda Hyel tə zəndəbiya ɗa.

¹³Sakanə ja, sə makər ingə ngya ti, jirikur, fəkər ana nyida. Kəl ja, nda ndiya dəhəu, nacha ngə nyida.