Read nya huba 1 Korinti 14 Bible Online

1 Korinti 14 - nya huba bible

1 Korinti 14

¹Hya gwa'a lakur nyida, hya mbadzər chim ga'a i nə Shanguɗəu, a da wi takər ma'a wa.

²Aka ndər ɓwanya na nya nda pa'a njo ngabiya, a da nji ngə cha kwa ɓwanya nə wa, ana Hyel ngə cha kwa ɓwanya, aka ndə da kwa ngabiya sənda cho na wa, aka sə ɗəwɗəwa təwa gyalkur Shanguɗə ngə cha kwa pəa.

³Kəl ja, ndə nda kwa takər nə nji cha kwa ɓwanya ka tsakə dunama nənda, ana tsəɗufəu, ana fə ɗufəu.

⁴Ndər ɓwanya na nya nda pa'a njo ngabiya, kərnyi nda cho həra, kəl ja, ndə nda kwa takər njir nəu nda cho həra.

⁵Kwa i ya madawa ku pama hi cha ɓwanya na nya nda pa'a njo ngabiya, kəl nda sənda ya ndiya i hya məra, hya takər. Ndə nda kwa takər ndiya tə ndə nda kwa ɓwanya na nya nda pa'a njo ngabiya, kəl nda macha cho ɓəlabiya ka hər njir nəuwa.

⁶Sakan ja ka zama, ma ya shili da hi ga ɓwanya na nya nda pa'a njo ngabiya, sakəda mi yo mərtə hi macha a da ya shili na hi sənda Hyel tə chabiya ɗa, ndara zəndi, ndara takər, ndara dlədləɓə wa?

⁷Əngə tanyi ma'a sə'inda na kurakə ya a pi da ku tanda wa, wi ka mbalau ka zəmbəl, aman njo ɗana zəndə sənda nda kwa na macha a da nda biyandə kurakə pampam wa?

⁸Macha a nja mbəɗə papam tsa'atsa'a wa, aman njo ɗana ɓatliya ka biya ki pa?

⁹Əngə nahi tsəu, ma hya ɓwanya nə nji ku nya nda pa'a nda kwa ngabiya, aman nda kwa ɗana zəndə sənda hyo pəa? Atə gyang tanyi nda ɓwanya hi.

¹⁰Nya da pampam tə dunəya, ya a vanyi da kəla kər wa.

¹¹Ma tə ɗa a da yo zəndə sənda vanya ndə tə pə wa, ɗatə ya ka ndə shilishili nənyi nacha tsəu ndə shilishili na'a.

¹²Nahi tsəu, mangə hyo gwa'a hya uya ga'ar shanguɗəu, kəl hya mbabiyadzər gwa'a sə'inda kwa tsakətə nyi dunama nə njir nəuwa.

¹³Aka əngə ja, dəhə ndə nda ɓwanya ku vanya nya, cha pətlənya ənda cho nau ɓəlabiya sənda cha pəa.

¹⁴Aka ma ya pətlənya ku vanya nya, shanguɗa ya ngə kwa pətlənya, kəl ja, a jigadəma ɗa da uya sakədar madami wa.

¹⁵Mi yo mər ja? Yo pətlənya təwa shanguɗa ya, ya yo pətlənya na jigadəma ɗa tsəu, yo na miya ku shanguɗəu, yo na miya na jigadəma ɗa tsəu.

¹⁶Macha ko fal Hyel ku shanguɗə ya, aman ndə nda pa'a do ngabiya kwa na “Aɗəmja,” təkəra usaku nda ko usaku, ya a da cho zəndə sənda ko pə wa?

¹⁷Madangə a usaku təkə Hyel gagaɗa, kəl ja, a vanya ndə nda tsakə nə wa.

¹⁸A usaku təya Hyel ənda ya kwa ɓwanya na alenya nya matsa dəhə hi.

¹⁹Kəl ja, aku daɓədzər njir nəuwa, a ndiya ɗa təvi ya pə ɓwanya tufu nda njo ngabiya, tsa ɓwanya dubəu kumə ku nya nda pa'a njo ngabiya.

²⁰Ka zama, ngyar ma jigadəma wi ngulisha'a. Təwa pəla'akur hya ɗa wi nguli dizəu, kəl ja, hya ɗa njirawawa'a ku jigadəma.

²¹Tsəfətsəfə nyi ku gadlagadla, “Təwa nya alenya hə'i ana təwa kyara nji shilishili yo ɓwanya nə nji'ina, ya dəhə ka ənga a da nda kwa səhimi daya wa,” ənghwandə Tlakəu.

²²Aka əngə ja, ɓwanya na alenya nya sər muniya nga, a da nə njir nəu wa kəl nə nji'inda pa'a njir nəuwa, dəhə ka ənga ɓwanya mətakər ngə sənda na sakəda nə njir nəuwa a da nə nji'inda pa'a njir nəu wa.

²³Ma dəhə njir nəu tə daɓətə dza, madawa kwa ɓwanya ku nya pampaməu, ngə ndə nda pa'a kwa ngabiya ndara ndə nda pa'a ndər nəu tə səgwa, a da cho na kəra hi gwaɗətə ma?

²⁴Kəl ja, ma ndə nda pa'a ndər nəu ndara ndə nda pa'a kwa ngabiya tə səgwa həya madawa kwa ɓwanyar mətakər, ɓwanya kəhi nda kwa tsəka nyi ya cho dləukər ənda ndər mər səpəla'a cha, ya njo mərtə nyi nəuma na sənda cha ngati.

²⁵Ana ənga, njo labiya sənda tə ɗəwa ku ɗufwa cha, cho dla hu'i cho fal Hyel cho na “Jiri, Hyel ku pama hi!”

²⁶Ka zama, mi məno na ja? Ma hya daɓətə dza, vanya ndə kwa na miya, vanyi dlədləɓa, vanyi kwa pə takər nda cha uya, vanyi ɓwanya na vanya nya, vanya ndə tsəu kwa ɓəlabiya sənda nja pəa. Tuku nja mər sə'ingə dəhə ga nja tsakətə nyi dunama nə njir nəuwa.

²⁷Macha nji da kwa gwa'a ɓwanya na alenya nya, ba'a nji mətlə ɓwanya, ngwa nda da ndəɗə nji makər wa. Ya tuku nda ɓwanya kər zhang kər zhang, ana tuku vanya ndə ɓəlabiya sənda nda pəa.

²⁸Macha a ndər ɓəlabiya da wa, cha bəgə ɗiyu ku daɓədzər njir nəuwa, cha ɓwanya nə kərnyi ana Hyel.

²⁹Njir takər mətlə ndara makər nda ɓwanya, alenya nji'inda tsəu nda səndzə himi mənakə da sənda njo pəa.

³⁰Ya ma takər tə shili nə ndə nda tə ngya, ba'a ndə nda kwa ɓwanya nda bəgəu.

³¹Təwa ənga dəhə njir mətakər kwa uya bəjir ndəra, madawa tsəu kwa dlədləɓa ana uya tsəɗufəu.

³²Hya zəndi, njir mətakər ngə kwa gəla shanguɗə takər.

³³Aka a Hyel da ndər mər sə waraɓai wa, kəl nda nə piyarɗufəu, wi nda cha ku dəhə daɓədzər njir nəuwa.

³⁴Mahi'i bəgə ɗi ku daɓədzər njir nəuwa. A da ɗa tsa'atsa'a nda ɓwanya wa, nda ɗa na kəriwa wi nda gadlagadla tə na.

³⁵Macha vanya sə da nda kwa gwa'a jawa, nda jau tsa shili kənda ku ki, aka sər kuzhi cha malakə ɓwanya ku daɓədzər njir nəuwa.

³⁶Hyo har wi təkəra hi ngə ɓwanya Hyel tə ghəya ya, aa kəl nahi ngə nji'inda dləutsə ɓwanya Hyel ya?

³⁷Macha vanya ndə kwa har ənda ndər mətakər cha, ndara ga'ar shanguɗə da tsa cha, cha zəndə ənda sənə yo tsəfə nə hi na gadlagadla Tlakə na.

³⁸Macha ngyar dləukər səna, kərnyi ma'a nja ngya nyi.

³⁹Aka əngə ja ka zama, gwa'a ma hya takər, ya ngwa hya da ngyar ɓwanya na alenya nya wa.

⁴⁰Kəl ja, nja mər madami ku laku nda njo kina məra ana ku laku tsa'atsa'a.