Read nya huba 1 Korinti 16 Bible Online

1 Korinti 16 - nya huba bible

1 Korinti 16

¹Sakan ja, a təkəra tsəm sə ka njir nəuwa, hya mər wi nda ya nar nyi nə njir nəu Hyel inda vu Galati.

²Pəshir tangərmar hanyi nə kala sukəu, madawa həbiya vanyi sə ku kwaba nda cho uya cha fiya, tsa'aka ma ya shili a tsə'u njo ngya ka tsəm sə səkə wa.

³Ma ya shili, yo daɓiya nji'inda hya ɗəmtsə na tsəfətsəfər kainau, nda kwa char ənda a dləukərtə nji nanda, ka nda təra na ga'a kəhi yi Urshalima.

⁴Macha tsa'atsa'a tanyi na'a tsəu ya ma'i, yau ba'a nda ləbiya ɗa.

⁵Ma ya yi Makidoniya, yo shili da hi, aka tahə Makidoniya yo ma'i.

⁶Kustanyi yo səkardzə kushə kə'i hi, ndara tsəu mən həbiya vuya, ga hya nau vala ɗa tsa'a yatə mbwa nda yo gwa'a ma'i ti.

⁷A da yo i ya la'a hi sakanə tanyi ba'a tərabiya wa, chim ɗa ya səkardzə ka hi, ma Tlaka i.

⁸Kəl ja, yo ta'i hi Afisa, kəl pəchir Pentikos,

⁹aka a mbəɗiya ɗa tənji laku bang ka ya mər tlər mənakəu, madangə njir dawa ɗa ɗanghəu.

¹⁰Ma Timtawus tə shili ngwa hya da tlənda shanguɗa cha wa, aka tlər Tlakə ngə cho məra tang wi nda yo məra.

¹¹Ngwa mada ndə zhang da ngyar dləu nyi wa, hya səu nyi ku laku na piyarɗufəu ga cha ɓəl shili da ya, yo səkə nyi nanda ka alenya njir nəuwa.

¹²A təkəra zamən mən Apolos, a gədi nyi təya tsa'anyata cha yi da hi ka alenya zama, kəl nda a da cho i ma'i sakan wa, kəl ja, cho tsəu yi macha uya laku.

¹³Ngya ma na ɓəla, hya ta'i na jiri ku jirikur, hya ɗa na tsəɗufəu, hya ɗa na dunama.

¹⁴Hya mər dəhə sə ku nyida.

¹⁵A zəndətə hi ənda njir ki Istifanus ngə tangərmar nji'inda dləutsə Yesu vu Akaya, ya a nənyi tə nda kərnənda nə mər tlər nə nji'inda nə Hyel. Yo gədi hi ja ka zama,

¹⁶hya nənyi kərnəhi nə chul nji wi inga, nji'inda kwa daɓəkər ku mər tləra, ya kwa mər nda tlər nda.

¹⁷Ngatə təya məsəɗakə na shilir ka Istifanus, Fartunatus ana Akaikus, aka shili kənda hənda tə chim nda yo chim ya la'a hi.

¹⁸A tsətə ɗa tə nda ɗufəu tang wi nda nda tsətə hi, tuku hya la'a səli kənda.

¹⁹Njir nəu nda tə hə'i Asiya kwa usa hi. Akila na Bəriskila kwa usa hi 'ual'ual ku Tlakəu, əngə njir nəu inda kwa daɓədzə ku ki kənda.

²⁰Dəhə ka zama inda tangna kwa usa hi. Hya usar kərnəhi na gaɓədzə karti.

²¹Naya Bulus nə tə tsəfə usa inə na cha ya.

²²Shi'u ngya təkəra dəhə ndə nda pa'a nda kwa nyida Tlakəu. Maki Tlakəu shili!

²³Papa'akur nə Tlakə Yesu ngya tsa kə'i hi.

²⁴Nyida ɗa nə hi dəhə ku Kəristi Yesu. Aɗəmja.