Read nya huba 1 Korinti 2 Bible Online

1 Korinti 2 - nya huba bible

1 Korinti 2

¹Ka zama, nda ya shili ka ya dəkar hi sə ɗəwaɗəwa nə Hyel, a da ya shili na nau ɓwanya ndara dəma wa.

²Aka a ɓatliya təya ku ɗufwa ya nda ya kə'i hi ənda yo far na madami kəl Yesu Kəristi, ndə nda nja kukwanda.

³Nda ya shili da hi a dunama ɗa da wa, yo ləvəra ana dzədzi ual'ualəu.

⁴Dlədləɓə ɗa ana Mafakə ɗa nə hi, a da ɓwanya pətə nə dəma wa, kəl ndara ya ngya ka dunamar Shanguɗə Hyel.

⁵Ya mər ənga, tsa hya da ba'a fə jirikur kəhi təkəra dəmar ndəu, kəl ka gyalkur Hyel.

⁶Dəhə ka ənga, ma ya gu pama njir nəu inda na dunama ku jirikur yo ɓwanya na dəma, kəl nda a da chul dəma nə bəji nə ndara nə nji təltəl nə bəji nə nda gyalku rnyi kwa wur wa.

⁷Dəma ngə yo ɓwanya təkər nga nacha ngə dəmar Hyel nda tə ɗəwa, dəma nda cha ɓatliya təvi nja mər dunəya ka ga mən uya səli.

⁸Kəl ja, a nji təltəl nə dunəya nə da ngabiya wa, macha a ngabiya tə nda a da nda kwa nda kukwanda Tlakə kəmən nda na səli wa.

⁹Nacha nda likatəkatə tə na, “A ndə da ta la'a ndara ngatə wa, ya ndə da jigadəma nyi tə harə sənda Hyel tə ɓatliya ka nji'inda kwa nyida nyi wa.”

¹⁰Kəl ja, Hyel tə chabiya mən dəhə sə'ina təwa Shanguɗəu. Aka Shanguɗə ngə kwa gwa'abiya dəhə səu, ma'a sə'inda dzau tsa ngabiya təkəra Hyel.

¹¹A ndə nda kwa zəndəbiya jigadəmar ndə wa, kəl ndara shanguɗə kərnyi sənyi, ya ndər zəndəbiya jigadəmar Hyel da wa kəl ndara Shanguɗə Hyel sənyi.

¹²A dləutsətə mən Shanguɗə Hyel a da nə dunəya wa, aka ga məna zəndə sə mənakə inda Hyel tə nə mən ga'a.

¹³Eo ɓwanya təkəra sə'ina, a da na dlədləɓə nda hya'atə ku dəma ndə wa, kəl nda hya'atə ku Shanguɗəu, təwa dəkəbiya sə'inda nə Shanguɗə anə nji'inda nə Shanguɗəu.

¹⁴Kəl ja, nji'inda pa'a da ku Shanguɗə da kwa uya jiri nda hya'atə tsa Shanguɗə Hyel wa. Ma nda kwa ngati, kəkəngkur cha nənda, a da nda kwa ngabiya wa, aka kəl nji'inda ku Shanguɗə ngo ngabiya sənda Shanguɗə kwa cha.

¹⁵Ndə nda Shanguɗə Hyel kwa nəu na cha kwa nau tlanda nəuma təkəra madami, kəl ja, ndər nau tlanda nyi nəuma da wa.

¹⁶Wi nda likatəkatə tə na, “Wa zəndə jigadəma Tlakə pəlakər dlədləɓə nə nya?” Kəl ja, namən, jigadəma kəmən wi nə Kəristi.