Read nya huba 1 Korinti 4 Bible Online

1 Korinti 4 - nya huba bible

1 Korinti 4

¹Hya hətə ea wi njir mər tlər Kəristi, ana nji'inda Hyel tə tsau nda sə ɗəwaɗəwa nə Hyel.

²Ana ənga tuku ndə nda nja fəkər təkəra səu, cha ɗa na jiri.

³Ba naya, a da yo ɗəngha na ndara amanə hyo mərtə ɗa nəuma, ndara ənda gyalkur njir dunəya kwa mərtə ɗa wa, naya tsə'u a da yo mər nəuma nə kərɗa wa.

⁴Yo hari a da ya mər bikə wa, kəl ja, a da char ənda a da ya na bikə pa'a wa. Tlakə ngə na kərnyi kwa mərtə ɗa nəuma.

⁵Aka ənga ngwa hya da tla nəuma nə madawa təvi bəji tsa'atsa'a wa. Səkətə kəl Tlakə tə shili, aka cho həbiya sənda tə ɗəwa ku kutla zəbiya tə vimbəlmbəla, ba chabiya sə'inda ndə tə haɓətə ku ɗufwa cha. Bəji ngə ja, madawa kwa uya fal nda tsa'atsa'a tsa Hyel.

⁶Ka zama, ba'ada ngə mər ya na kərɗa ana Apolos, ka ga hya dlədləɓə sənda ɓwanya tə na ənda, “Ngwa hya da ndəɗə nda sənda nja tsəfəbiya wa.” Atsa hya da wovi na vanya ndər dlədləɓə matsa vanya ndəu.

⁷Aka wa mərtə hi ndiya matsa vanya nda? A da Hyel ngə tə nənghə dəhə sənda tsa kə ma, ya ma ngə hya kwa wovi nə wi da dləudləuhi wa?

⁸Hyo har wi uyatə hi dəhə sənda hyo gwa'a ya? Hyo har wi ɗatə hi njir gəna ya? Aa hyo har wi ɗatə hi ka nji təltəl ya? Kəl ja ya, na ea səda ea təkər wa ya? Macha chim uya cha hya ɗa nji təltəl, ka ga məna səm təlkur kə'i hi!

⁹Aka ku la'a ɗa, kə'i changhabal, Hyel fiya ea tə batəbatənyi ku dəhə nji, wi nji'inda nja tlanda nda nəumar tah, ka ga nja tsəya nda tə babal, aka ɗatə ea ka sənda dunəya dəhəu, Chama Hyel i, ka nji, kwa fə li təkəri.

¹⁰A ɗatə ea wi nji kəkəng aka Kəristi, kəl ja, dəma tsa hi ku Kəristi! Dunama da tsa ea wa, kəl ja, dunama tsa hi! Nja kwa la'a səli kəhi, kəl ja, na ea nja kwa həyatə ea!

¹¹Tsa'a tə bəji nənna eo ngatə huɓa ana hili, guzhalguzhal ngə dzən ea, nja kwa dəgə ea, ya a ki da tsa ea wa.

¹²Ea kwa mər tlər tsa'anyata ana cha ea. Ma nja ngəl ea, ea kwa səkər papa'akur, ma nja izza ea, ea kwa səsə'uti.

¹³Ma nja pə ɓwanya ɗimi nə ea, eo ɓəlakə nda na sənam. Tsa'a tə bəji na, ea ɗa wi dzəkə nə dunəya na, sənda madawa kwa həɗə tsari.

¹⁴A da ya tsəfə nə nəhi ga cha fəu hi ku kuzhi wa, kəl nda ga ya təɗəhimi nə hi, wi nguli ɗa nda yo nyida.

¹⁵Mada maləm dəbu kumə ngə tsa hi ku Kəristi, naya zhangta ɗa ngə adanə hi, aka ku Kəristi Yesu ya ɗa ka adanə hi təwa Mafakə Mənakəu.

¹⁶Aka əngə yo gədi hi hya ɗa wi naya.

¹⁷Nacha nə sənda gwa'atə ya sə Timtawus nda zər ɗa nda yo nyida, ndə nda na jiri tsəu ku Tlakəu. Cho ɗənghatə hi ngya ɗa ku Kəristi Yesu, nda tə dləukər na sənda ya dlədləɓə nə nji mada amani ku dəhə daɓədzər njir nəuwa.

¹⁸Alenya nji ku pama hi kwa bu ma'a kərnənda, nda kwa har bəra a da yo shili da hi wa.

¹⁹Kəl ja, ma Tlakə tə i yo shili da hi kacha'ana. Yo shili gwa'abiya ya la'a ndara gyalkur manə ngə tsa njir bu kərnənda inga, a da ɓwanya kənda tanyi wa.

²⁰Aka təlkur Hyel a da nə ɓwanya tə chimər nya tanyi cha wa, kəl nda nə gyalkur.

²¹Manə ngə hya tabiya, ya shili na wuɗa zəma, aa aku nyida ana sənam?