Read nya huba 1 Korinti 6 Bible Online

1 Korinti 6 - nya huba bible

1 Korinti 6

¹Ma kuvanghə ndər nəu tə zandə nghə səu, a sər kuzhi ngə maka ki wula nyi nə nji kəla zəndə Hyel, matsa njir nəu Hyel ma?

²A da hya zəndə ənda njir nəu Hyel ngə kwa da mərtə nyi nəuma nə dunəya ma? Ya macha nahi ngə kwa da mərtə nyi nəuma nə dunəya ya, mya gwa'atə a da hyo nau wurandə nəuma təkəra sə kushkush ingə wa?

³A da hya zəndə ənda namən ngə kwa mərtə nyi nəuma nə Chama Hyel i ma? Abiyakata təkəra ngyar dunəya?

⁴Aka əngə ja, macha chul wula ingə da tsa hi, mya gwa'tə hyo yi nə mar nji'inda a da nda sə nə njir nəu wa?

⁵Yo ɓwanya əngə ga kuzhi səya hi! A vanya ndə da ku pama hi nda na dəma kwa nau ɓatliya pama ndə na kuvanyi wa ya?

⁶Ya aman kwa ɗa ndər nəu kwa wula kuvanyi huɗə nji kəla zəndə Hyella?

⁷Wula ngə hyo wuladzə ngə ma'a a chartə ənda təutə tə hi. A bəliya nja guguriya hi ma? Hya mbiyahuɗə nja ɗiya hi?

⁸Kəl ja, nahi na kərnəhi kwa gugur nji kwa ɗiya nji, ya ma'a nə ka zamən hi.

⁹A da hya zəndə ənda nji ɗimi da kwa gwa ku təlkur Hyel wa ya? Ngwa nja shandə hi kər wa, aka njir mər sə shushu'a, njir həsəli nə katəu, njir kasali, zawar shili, ana shili nda kwa piya na kuvanda,

¹⁰ndara njir həl, njir huɓursəu, njir wi na mbadla, njir ngəl nji, ndara njir ɗiya nji da kwa fa'aki na təlkur Hyel wa.

¹¹Alenya nji ku pama hi əngə nda ɗakaɗa, kəl ja, chinda hi tənji, nja mərtə hi ka nə Hyel, ya mərtə hi tə nji ka nji kəla bikə mar Hyel, ku tləmər Tlakən mən Yesu Kəristi ana təwa Shanguɗə nə Hyel kəmən.

¹²Alenya nji kwa nau na, “A dləukərtə nji məna mər dəhə səu.” Kəl ja, yo nar hi, a da dəhə sə ngə na sakəda wa. Aka ənga, a da yo ɗa mava madami wa.

¹³Hya kwa na tsəu, “Nja mər sərsuma ka ta, ya ta tsəu ka sərsuma.” Ya Hyel kwa kuɗənda kya'a. A da ka mər sə shiushiu ngə dzə wa, kəl nda aka Tlakəu, Tlakə tsəu ka dza.

¹⁴Hyel tə hya'andə Tlakə ku hwa, ya cho hya'andə mən təwa gyalkur nyi tsəu.

¹⁵A da hya zəndə ənda dza hi ya mədlə dza Kəristi ngə ma? Tsa'atsa'a tanyi ndə hətə mədlə dza Kəristi cha dlətə na nə zawar ya? Tyatəu.

¹⁶A da hya zəndə ənda dəhə ndə nda dlətə dzə na zawar ya a ɗatə nda dzə zhang ma? Aka ku tsəfətsəfər ɓwanya Hyel nja na, “Nji mətlə inda nda kwa ɗa zhang.”

¹⁷Kəl ja, dəhə ndə nda dlətə dzə na Tlakəu ɗa tə nda zhang ku shanguɗə ndani.

¹⁸Hwi ma tsa kasalikur. Dəhə alenya səpəla'a nda ndə kwa mər da kwa səwandə dza ndə wa, kəl nda ja, ma ndə tə mər kasalikur a mər tə cha səpəla'a nə dza cha.

¹⁹A da hya zəndə ənda dza hi ya mbwa'alə Shanguɗə Karti, nda ku hi, nda hya dləutsə tsa Hyel ngə ma? A da hi nə kərnəhi wa.

²⁰Ɗəlbiya hi ngə nja ɗəlbiya hi ga kinda. Aka ənga ja, hya həsəli Hyel na dza hi.