Read nya huba 1 Korinti 7 Bible Online

1 Korinti 7 - nya huba bible

1 Korinti 7

¹Yau, a təkəra sənda hya tsəfətə ənda, a da tsa'atsa'a ndə hə mala wa.

²Kəl ja, mangə nji ɗang kwa mər kasalikur, kala ndə cha piya na mala kərnyi, kala mala tsəu cha piya na sal kərnyi.

³Sal cha nənyi sənda ngyar sal na mala təkəri, əngə tanyi mala tsəu nə sal nyi.

⁴Aka mala da na gyalkur təkəra dza cha wa, kəl nda sal nyi, ya əngə tanyi sal tsəu, a da cha na gyalkur təkəra dza cha wa, kəl nda mala nyi.

⁵Ngwa hya ka dza hi nə kərnəhi wa, kəl nda ma hya dləukər nə zər bəji kushiu, ga hya ɗa kəriwa ku pətlənya. Ahir nga hya ɓəla ɓəa, tsa Shantan da ba dzə hi təwa tar mbiyahuɗəu.

⁶Ɓwanya na, a da tsaubar nə wa, dəma nə yo dəkə nə hi.

⁷Chim ɗa dəhə nji ɗa wi nə ya na. Kəl ja, madawa na ga'a nda Hyel tə nənyi, vanya ndə na chul nənna, vanya ndə na chul ndanda.

⁸Nji'inda pa'a hədza, ana mahi'i nda shili kənda tə kuɗa, aku la'a ɗa a ndiya tə vi nda ngyata nda wi na'a na.

⁹Kəl ja, macha a da nda kwa nau mbiyahuɗə wa, mahi'i ɗəuwa, kala sal tsəu cha hə mala, aka bəliya hə mala ndara ɗəuwa, tsa mwaɓər kwa zhaliya ndəu.

¹⁰Nji nda tə hə mala ndara tə ɗəu tsəu, yo tsau nda bar, a da naya wa kəl nda Tlakəu. Ngwa mahi'i təkə ka shili kənda wa, ya ngwa shili təkə ka mahi'i kənda wa.

¹¹Kəl ja, ma cha təkə na sal, cha ngyata nyi kəla ɗəuwa, a da wa cha ɓəla ɓatliya na sal nyi. Sal tsəu ngwa cha gədlənda mala nyi wa.

¹²A nə alenya nji tsəu, yo na, madangə a da ya uya tsaubar təkər tsa Tlakə wa, ma vanya ndər nəu tə hə mala nda pa'a ndər nəuwa, ya dləukərtə cha nda kwa ngya, əngwa cha təkə nacha wa.

¹³Əngə tanyi tsəu ma vanya mala tə hə ndə nda pa'a ndər nəuwa, ya dləukərtə cha nda kwa ngya, ngwa cha təkə nacha wa.

¹⁴Aka sal nda pa'a ndər nəuwa, a ɗa tə cha ku pama nji'inda nə Hyel təwa ngya zhang na mala nyi. Əngə tanyi tsəu mala nda pa'a ndər nəuwa, ɗa tə cha ku pama nji'inda nə Hyel, təwa ngya zhang na sal nyi. Ma'a da wa ngulisha'a kəhi kwa ɗa ka sər həɗa, kəl ja, sakana ɗatə nda ku pama nji'inda nə Hyel.

¹⁵Kəl ja, ma sal ndara mala nda pa'a ndər nəu tə gwa'a lakur təra, cha təra. Aku ənga a da ɗa tuku nda ngya wa, aka Hyel tə nga hi hya ngya mənakəu.

¹⁶Nakə mala zəndətə nda ko mbəɗandə sal nghə ya? Nakə sal zəndətə tsəu nda ko mbəɗandə mala nghə ya?

¹⁷Kəl ja, kala ndə ku pama hi cha ngya chul ngya nda Tlakə tə fəu nyi kwa, ana cha ngya wi nda cha ku bəji nda Hyel tə nga nyi. Tsaubar nda ya nənyi nə dəhə njir nəu nga.

¹⁸Ndə nda tlatla bədzang ku bəji nda Hyel tə nga nyi, ngwa cha da gwa'a cha ɗa kəla tlatla bədzang wa. Ndə nda kəla tlatla bədzang ku bəji nda Hyel tə nga nyi tsəu, ngwa cha da gwa'a cha ɗa tlatla bədzang wa.

¹⁹Tlatla bədzang ndara kəla tlatla bədzang a da cha vanya sə wa, kəl nda nəu sənda Hyel kwa i, nacha ngə sənda tsa'atsa'a.

²⁰Ənda ndə ku bəji nda Hyel tə nga nyi ti, cha ngya ənda.

²¹Ndara mava kə ma nja nga ngha, ngwa ɗəngha wa. Kəl ja, macha lakur uya dimukur da tsa kə tsəu, ba'a ka mər tlər ni.

²²Aka dəhə ndə nda Tlakə tə nga ya mava cha, dimur ndə cha nə Tlakəu. Əngə tanyi tsəu ndə dimu nda Tlakə tə nga, mava Kəristi cha.

²³Ɗəlbiya hi ngə nja ɗəlbiya hi ga kinda, ngwa hya da ɗa ka mava nji wa.

²⁴Ka zama ka kwama, Ənda ndə ku bəji nda nja nga nyi ti, cha ngya ənda, tsa'a na Hyel.

²⁵Sakan ja, a təkəra ku'ipilyakəu, Tlakə da na'a tsaubar wa, kəl ja, yo dəkar sənda ku jigadəma ɗa, naya nda Tlakəu tə char ɗa təhuɗə nyi aka ənga njo nau na'a jiri.

²⁶Yo la'a bəliya ndə ngyata nyi wi nda cha, aka ghəya tənji gwa ku bəjir ɓwaɓwatəu.

²⁷Macha hə təkə mala ngwa ka da gədlənda wa. Macha aka taa hə mala wa, ngwa hə wa.

²⁸Kəl ja, maka hə mala a da ka mər səpəla'a wa, ya ma kwapəlyakə tə ɗəuwa, a da cha mər səpəla'a wa, dəhə ka ənga nji'inda hə mala ndara tə ɗəuwa kwa sa ɓwaɓwatə aka ngyar ki, ya yo i ya kanda hi tsari.

²⁹Sənda ɓwanya ngə təkər ka zama ka kwama, nacha ngə bəji ɗati kushiu. Fwatə sakana, nji'inda hə mala nda ngya wi anda hə mala wa.

³⁰Nji nda kwa tiwi, nda ɗa wi anda kwa tiwi wa, nji'inda kwa mər hirgyaɗi nda ɗa wi anda kwa mər hirgyaɗi wa, njir ɗəl sə tsəu, nda ɗa wi səda tsa nda wa,

³¹nji'inda kwa mər tlər na sər dunəya ngwa nda da ngya karə wa, aka ngyakəngyar dunəya na kwa tərabiya.

³²A da yo i hya wendə kərnəhi wa. Ndə nda pa'a tə hə mala kwa ɗəngha sənda nə Tlakə gagaɗa, ənda cho ɗana gwa'atə Hyel ngatə məsəɗakəu.

³³Kəl ja, ndə nda tə hə mala kwa wendə kənyi na sər dunəya, ənda cho ɗana gwa'atə mala nyi ngatə məsəɗakəu,

³⁴ya jigadəma nyi təkətə mətləu. Ya mala nda pa'a ɗəuwa ana kwapəlyakəu kwa ɗəngha na sənda nə Tlakəu, cha kwa gwa'a cha ɗa nə Tlakə ku dəhə sənda cho məra ana ku jigadəma nyi. Kəl ja, mala ɗəuɗəuwa kwa wendə kərnyi təkəra sər dunəya, ənda cho ɗana gwa'atə sal nyi ngatə məsəɗakəu.

³⁵Ya pə ənga aka sakəda kəhi ngani, a da ka ga ya dau hi lindzam wa, kəl nda ga ngya kəhi ɗa mənakəu, ya vanyi sə da kwa katə hi tsa mər tlər nə Tlakəu wa.

³⁶Ma vanyi ndə kwa har wi cho mər sənda pa'a tsa'atsa'a nə kwapəlyakə nda cha mbandər ni, ya cho chim nyi gagaɗa, ya cho la'a a ɗatə tsa'atsa'a cha hə nyi, nda hədza, a da səpəla'a ngə nda mər wa.

³⁷Kəl ja, ndə nda dləukər na jigadəmar kəra cha ənda a da cho hə kwapəlyakə nda wa, ya a da nja chiu nyi na tuku kwa wa, ya kwa nau cha mbiyahuɗəu, a mər tə cha sənda tsa'atsa'a.

³⁸Aka ənga ja, ma ndə nda hə kwapəlyakə nda cha mbandər ni, a mərtə cha tsa'atsa'a, ndə nda a da hə tsəu wa, a ndiyatə vi.

³⁹Malakə da kwa təkə na sal nyi ma tsəu sal nyi na pi wa, kəl ja, ma sal nyi tə tah, cho nau hə vanyi sal nda kəra cho i. Kəl nda cha ɗa ndə nda nə Tlakəu.

⁴⁰Kəl ja, na'ana jigadəma, cho ndiya ɗa na hirgyaɗi nənyi macha ngyata nyi kəla ɗəuwa. Ya yo hari təwa Shanguɗə Hyel nə ya ɓwanya.